ដោយៈលក្ខិណា
ភ្នំពេញៈ ចាប់តាំងពីផ្ទុះនូវព្រឹត្តិការណ៍ ឆ្លងសហគមន៍ជាលើកទី៣ ( ២០ កុម្ភៈ ) អាជ្ញាធរកម្ពុជា បានរកឃើញទីតាំងពាក់ព័ន្ធនឹងព្រឹត្តិការណ៍ ហើយអាជីវកម្មជាច្រើនក៏បានបិទ ដើម្បីស្រាវជ្រាវរកអ្នកពាក់ព័ន្ធមកធ្វើតេស្តនិង ធ្វើចត្តាឡីស័ក។
យោងតាមរបាយការណ៍របស់អាជ្ញាធរ ដែលត្រូវបានចែកចាយតៗគ្នាបានឱ្យដឹងថា ទីតាំងចំនួន៤៧ទីតាំងហើយបានបិទ ដែលជាប់ពាក់ព័ន្ធនឹងព្រឹត្តិការណ៍២០កុម្ភៈ ហើយអាជ្ញាធរកំពុងស្វែងរក ដែលជាប់ពាក់ព័ន្ធជាច្រើនទៀតផងដែរ ។
ការបិទទីតាំងអាជីវកម្មទាំងនេះ វាបានប៉ះពាល់ដល់ប្រាក់ចំណូលរបស់ប្រជាពលរដ្ឋជាច្រើនផងដែរ ដូចជាក្រុមអ្នករត់ម៉ូតូឌុប កង់បី តាក់ស៊ី និងក្រុមហ៊ុនលក់ម្ហូបអាហារនៅក្បែរអាជីវកម្មទាំងនោះផងដែរ។
ប្រធានសមាគមសេដ្ឋកិច្ចឯករាជ្យក្រៅប្រព័ន្ធ លោកវ៉ន ពៅបានឱ្យដឹងតាមទូរស័ព្ទនារសៀលថ្ងៃទី២៣ កុម្ភៈនេះថា ការបិទអាជីវកម្ម វាពិតជាប៉ះពាល់ដល់អាជីវករ និងអ្នកដែលទទួលបានប្រយោជន៍ ពីទីតាំងអាជីវកម្មទាំងនោះ ក៏ប៉ុន្តែដើម្បីទប់ស្កាត់ការឆ្លងរាលដាលបន្តទៀត អាជ្ញាធរធ្វើបែបនេះគឺជាការត្រឹមត្រូវ ហើយបើសិនជាបណ្ដែតបណ្ដោយ ឱ្យមានបើកបន្តទៀត នឹងធ្វើឱ្យវិបត្តិនៃបញ្ហាកាន់តែធ្ងន់ធ្ងរ ។
លោកបន្តថា “អ្នកប៉ះពាល់ពីការបិទអាជីវកម្មនោះ ដំបូងគឺបុគ្គលិកបម្រើការនៅទីតាំងទាំងនោះ បន្ទាប់មកគឺអ្នកដែលបានផលប្រយោជន៍ ជាប្រយោល ដូចជាអ្នកផ្គត់ផ្គង់សេវាកម្មសម្រាប់បុគ្គលិកនៅក្នុងទីតាំងនោះជាដើម”។
ចំណែកលោក ចាន់ថា អ្នករត់កង់បីនៅភ្នំពេញមួយរូប បានឱ្យដឹងថា ចាប់តាំងពីកូវីដ១៩ឆ្លងសហគមន៍ជាថ្មី លោកចាប់ផ្ដើមខ្លាចរអារ និងលែងចង់ដឹកភ្ញៀវទៀតហើយ ខណៈមុនពេលកើតមានបញ្ហានេះ លោកក៏បានសម្រាកនៅផ្ទះជាច្រើនខែ ដើម្បីការពារខ្លួន តែពេលនេះវាជាបញ្ហាធ្ងន់ជាងមុនៗ ដោយសារតែការឆ្លងលឿនពេក ហើយរដ្ឋាភិបាលក៏បានប្រកាសឱ្យពលរដ្ឋប្រុងប្រយ័ត្នពីការឆ្លងលឿននេះដែរ៕