ដោយៈ ចំណាន
ភ្នំពេញៈ ទិន្ន័យបានបង្ហាញថា ទំហំពាណិជ្ជកកម្មអន្តរជាតិរបស់កម្ពុជានៅតែបន្តភាពវិជ្ជមាន ដោយក្នុងរយៈពេល៨ខែឆ្នាំ២០២៦ នេះមានទំហំសរុបជាង៥០ពាន់លានដុល្លារ កើនឡើងជាង២០ភាគរយ។
ប្រទេសដៃគូពាណិជ្ជកម្មសំខាន់ៗរបស់កម្ពុជា រួមមាន ចិន អាមេរិក និងវៀតណាម។
យោងតាមទិន្នន័យអគ្គនាយកដ្ឋានគយ និងរដ្ឋាករកម្ពុជា(GDCE)ចេញផ្សាយកាលពីថ្ងៃទី១០ ខែកញ្ញា បង្ហាញថា ការផ្លាស់ប្តូរទំនិញរវាងកម្ពុជា ជាមួយប្រទេសដៃគូអន្តរជាតិទាំងអស់ ចន្លោះពីខែមករា-សីហា ឆ្នាំ២០២៦ មានតម្លៃសរុប៥០,៦៨ ពាន់លានដុល្លារ កើនឡើង២០,២% បើធៀបនឹងរយៈពេលដូចគ្នាក្នុងឆ្នាំ២០២៥។ ក្នុងចំនួននេះ គឺកម្ពុជានាំចេញ២៤,១៦ពាន់លានដុល្លារ កើនឡើង១៩,៧ ភាគរយ។ ចំណែកទំនិញនាំចូលមកវិញ២៦,៥២ ពាន់លានដុល្លារ កើនឡើង ២០,៧%។
ទំនិញសំខាន់ៗដែលកម្ពុជា នាំចេញទៅទីផ្សារអន្តរជាតិ រួមមាន ផលិតផលសម្លៀកបំពាក់ ស្បែកជើង សម្ភារធ្វើដំណើរ ផលិតផលកសិកម្ម សំបកកង់រថយន្ត គ្រឿងបង្គុំអេឡិចត្រូនិក-អគ្គិសនី និងសង្ហារឹម ជាដើម។ ចំណែកទំនិញនាំចូលមានដូចជា វត្ថុធាតុដើមក្នុងវិស័យកាត់ដេរ រថយន្ត ប្រេងឥន្ធនៈ គ្រឿងអេឡិចត្រូនិក និងឱសថ ជាដើម។
សាស្ត្រាចារ្យផ្នែកសេដ្ឋកិច្ច លោក ឌុច ដារិន្ទ បានមានប្រសាសន៍ឲ្យដឹងថា កំណើនពាណិជ្ជកម្មអន្តរជាតិ គឺបញ្ជាក់ថាផលិតផលកម្ពុជាកំពុងមានតម្រូវការខ្ពស់ ខណៈចំនួនគម្រោងវិនិយោគលើរោងចក្រ/សហគ្រាសនៅកម្ពុជា ក៏កំពុងកើនឡើងជាច្រើនដែរ។ លោកបន្ថែមថា កិច្ចព្រមព្រៀងពាណិជ្ជកម្មសេរីទ្វេភាគី និងពហុភាគីដែលរដ្ឋាភិបាលបានចុះហត្ថលេខាជាមួយប្រទេសចិន កូរ៉េ និងRCEP ក៏ជាចំណែកសំខាន់ដែលរួម ចំណែកធ្វើឱ្យការនាំចេញ-នាំចូលទំនិញរបស់កម្ពុជាជាមួយទីផ្សារអន្តរជាតិមានកាន់តែច្រើនផងដែរ។
លោកបន្តថា “កិច្ចខិតខំរបស់រាជរដ្ឋាភិបាលកម្ពុជា ផ្នែកឯកជនក៏បានធ្វើកិច្ចការជាច្រើនផងដែរ ដើម្បីផ្សព្វផ្សាយ និងទាក់ទាញភ្ញៀវ និងវិនិយោគិនអន្តរជាតិឱ្យចូលមកប្រទេសកម្ពុជាកាន់តែច្រើន”។
លោកបានពន្យល់ថា ការនាំចេញកើនឡើង គឺដោយសារវិស័យកាត់ដេរ ទំនិញធ្វើដំណើរ កសិផល និងការទាញយកអត្ថប្រយោជន៍ពីកិច្ចព្រមព្រៀងពាណិជ្ជកម្មសេរី។ ទន្ទឹមនឹងនេះ ការនាំចូលក៏កើនឡើងដែរ ដោយសារសេដ្ឋកិច្ចកម្ពុជា ត្រូវការនាំចូលវត្ថុធាតុដើម គ្រឿងម៉ាស៊ីន និងប្រេងឥន្ធនៈជាដើម ដើម្បីគាំទ្រការផលិត ការវិនិយោគ និងកំណើនសេដ្ឋកិច្ច។
កាលពីឆ្នាំ២០២៥ ការនាំចេញ-នាំចូលទំនិញរវាងកម្ពុជាជាមួយដៃគូអន្តរជាតិទាំងអស់ មានទំហំទឹកប្រាក់សរុប៦៥,២៥ ពាន់លានដុល្លារ កើន ១៧,៦៦% បើធៀបនឹងឆ្នាំ២០២៤ ដែលមាន ៥៥,៤៥ ពាន់លានដុល្លារ៕
