ដោយៈ គង់ ម៉ាលីនណា
ភ្នំពេញៈ របាយការណ៍របស់សមាគមធានារ៉ាប់រងកម្ពុជាបានឱ្យដឹងថា វិស័យធានារ៉ាប់រងនៅកម្ពុជា នៅតែមានកំណើនជាវិជ្ជមាន ដោយក្នុងត្រីមាសទី១ឆ្នាំនេះ បុព្វលាភដែលវិស័យនេះទទួលបានមានចំនួនសរុប៩៦លានដុល្លារ។
ចំនួននេះ គឺគិតក្នុងរយៈពេលត្រឹមដំណាច់ត្រីមាសទី១ឆ្នាំនេះ កើនឡើង ៥,៥ ភាគរយ ធៀបនឹងត្រីមាសទី១ ឆ្នាំ ២០២២។
លោកហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជាបានឱ្យដឹងនៅថ្ងៃទី២៩ ខែឧសភាកន្លងមកថា បើយើងពិនិត្យមើលក្នុងត្រីមាសទី១ ឆ្នាំ២០២៣ ក្នុងទីផ្សារធានារ៉ាប់រងរបស់យើងនេះ យើងនៅតែរក្សាបានកំណើនទីផ្សារជាវិជ្ជមានដដែល ដោយគិតទៅលើបុព្វលាភមានកើនឡើង៥,៥ភាគរយ ប៉ុន្តែកំណើននេះមានការថមថយបន្តិច បើធៀបនឹងត្រីមាសទី១ ឆ្នាំ២០២២ ដែលការថយនៃកំណើននៅក្នុងវិស័យធានារ៉ាប់រងនេះ ដោយសារតែវិបត្តិសកល ដែលកំពុងតែកើតមាននាពេលបច្ចុប្បន្ននេះ។
លោកបញ្ជាក់ថា បុព្វលាភសរុបដែលសមាគមទទួលបានក្នុង ត្រីមាសទី១កន្លងទៅនេះ មានប្រមាណ៩៦លានដុល្លារ ដូចជា ធានារ៉ាប់រងទូទៅ ធានារ៉ាប់រងអាយុជីវិត និងធានារ៉ាប់រងខ្នាតតូច។ នៅក្នុងចំនួនទីផ្សារធានារ៉ាប់រងទូទៅ បានកើនឡើង៧ភាគរយច្រើនជាងគេ ធានារ៉ាប់រងអាយុជីវិត៣,៣ភាគរយ ខណៈដែលធានារ៉ាប់រងខ្នាតតូច ចាប់ផ្តើមមានកំណើនខ្ពស់មកវិញ ប្រមាណ៤៣ភាគរយបន្ទាប់ពីមានកំណើនកាលពី២ឆ្នាំមុន(២០២១-២០២២)ដោយសារវិបត្តិកូវីដ១៩។
លោកហ៊ុយ វ៉ាថារ៉ូ បានបន្តថាទន្ទឹមនឹងគ្នានេះដែរ បើទោះបីជាបុព្វលាភកើនឡើងក៏ពិតមែន តែសំណងវិញក៏មានការកើនឡើងច្រើនដែរ ដែលមានន័យថា ហានិភ័យបានកើតឡើងទៅលើអ្នកទទួលបានការធានារ៉ាប់រងទាំងអស់នោះហើយ។
លោកបានបន្ថែមថា នៅក្នុងសំណង ដែលក្រុមហ៊ុនធានារ៉ាប់រងទាំងអស់ នៅក្នុងប្រទេសកម្ពុជា បានទូទាត់ទៅឱ្យអតិថិជនរបស់ខ្លួនមានប្រមាណជាង១២លានដុល្លារ ដែលកើនឡើង២៤ភាគរយ ធៀបនឹងត្រីមាសទី១ ក្នុងឆ្នាំ២០២២៕
