ដោយ: គង់ លាងហួរ
ប៉េកាំង: ក្រុមហ៊ុនចិន COMAC គ្រោងពង្រីករោងចក្រផលិតយន្តហោះប្រភេទ C919 របស់ខ្លួន ដែលមានមូលដ្ឋាននៅទីក្រុងសៀងហៃ ខណៈដែលក្រុមហ៊ុនទទួលបានការបញ្ជាទិញរាប់រយគ្រឿង។នេះបើយោងតាមសារពត៌មាន Retuers។
ក្រុមហ៊ុនរដ្ឋ China Aviation Planning and Design Institute (AVIC-CAPDI) ដែលជាអ្នកម៉ៅការគម្រោងនេះ បានបញ្ជាក់នៅលើគណនី WeChat របស់ខ្លួនកាលពីចុងខែមេសាថា ក្រុមហ៊ុនបានឈ្នះការដេញថ្លៃសម្រាប់ដំណាក់កាលទី២នៃគម្រោងកសាងសមត្ថភាពផលិតយន្តហោះដឹកអ្នកដំណើរខ្នាតធំ C919”។
យោងតាមក្រុមហ៊ុនម៉ៅការខាងលើបានឱ្យដឹងថា គម្រោង ពង្រីករោងចក្រនេះ ស្ថិត ក្នុង តំបន់ Pudong នៃទីក្រុង សៀងហៃ ហើយ មាន ផ្ទៃដី សាងសង់ សរុបចំនួន៣៣ម៉ឺន ម៉ែត្រការ៉េ ខណៈក្រុមហ៊ុន COMAC មានទីស្នាក់ការកណ្តាលនៅទីក្រុងសៀងហៃស្រាប់។
ប្រភពដដែលបញ្ជាក់ថា នៅពេលរោងចក្រនេះត្រូវបានពង្រីករួចរាល់ វានឹងបំពេញតម្រូវការផលិតកម្មយន្តហោះដឹកអ្នកដំណើរខ្នាតធំ C919នាពេលអនាគត ព្រមទាំងធ្វើឱ្យប្រសើរឡើងនូវប្រសិទ្ធភាពផលិតកម្ម និងផ្តល់នូវការគាំទ្រសម្រាប់ប្រតិបត្តិការពាណិជ្ជកម្ម និងការប្រកួតប្រជែងទីផ្សារយន្តហោះខ្នាតធំ ដែលផលិតក្នុងស្រុក”។
គម្រោងដំណាក់កាលទី២នេះ ភាគច្រើនរួមមាន ការសាងសង់រោងចក្រដំឡើង និងឃ្លាំងគ្រឿងបន្លាស់ជាដើម។នេះបើយោងតាមក្រុមហ៊ុន China Aviation Planning and Design Institute(AVIC-CAPDI)។
សេចក្តីថ្លែងការណ៍របស់ក្រុមហ៊ុនម៉ៅការមួយនេះ ត្រូវបានប្រព័ន្ធផ្សព្វផ្សាយក្នុងស្រុក ដកស្រង់យកទៅរាយការណ៍យ៉ាងព្រោងព្រាត កាលពីថ្ងៃចន្ទ ទី៦ ខែឧសភា ប៉ុន្តែក្រុមហ៊ុនបានលុបចោលវិញកាលពីថ្ងៃអង្គារ។ ជុំវិញបញ្ហានេះ ក្រុមហ៊ុន AVIC-CAPDI និងក្រុមហ៊ុន COMAC មិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ៕ប្រភព: Reuters៕
