ដោយ: គង់ លាងហួរ
អន្តរជាតិ: តម្លៃហាងឆេងមាសបានស្ថិតក្នុងសភាពទ្រឹង នៅព្រឹកថ្ងៃព្រហស្បតិ៍នេះ ខណៈអ្នកវិនិយោគកំពុងរង់ចាំទិន្នន័យសេដ្ឋកិច្ចសំខាន់ៗ ដែលអាចផ្តល់ភាពច្បាស់លាស់បន្ថែមទៀតជុំវិញពេលវេលានៃការកាត់បន្ថយអត្រាការប្រាក់របស់សហរដ្ឋអាមេរិក។
តួយ៉ាង តម្លៃមាស Spot Gold បានងើបឡើង០,១៣%ដល់២៣១៨,៩៤ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,៣១ភាគរយដល់២៣៣១,១ដុល្លារ ក្នុងមួយអោន គិតត្រឹមម៉ោង៩:៤៦នាទីព្រឹក។
លោក Jim Wyckoff អ្នកវិភាគជាន់ខ្ពស់នៅក្រុមហ៊ុន Kitco Metals បានលើកឡើងថា “ទីផ្សារកំពុងវិលត្រលប់ទៅផ្តោតលើរបាយការណ៍សេដ្ឋកិច្ចអាមេរិក។ ប្រសិនបើទិន្នន័យអតិផរណាកើនឡើងខ្ពស់ជាងមុន នោះធនាគារ Fed នឹងពិបាកក្នុងការសម្រេចចិត្តបញ្ចុះអត្រាការប្រាក់ ហើយតម្លៃមាសអាចធ្លាក់ចុះមកក្រោម២.២០០ដុល្លារក្នុងមួយអោន”។
ស្របពេលជាមួយគ្នានេះ ទីផ្សារមើលឃើញឱកាសចំនួន៧០ភាគរយនៃការកាត់បន្ថយអត្រាការប្រាក់ ដោយធនាគារកណ្តាលអាមេរិក(Fed) នៅក្នុងខែកញ្ញាខាងមុខ។ នេះបើយោងតាមឧបករណ៍ CME FedWatch។
សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណដុល្លារអាមេរិក ធៀបទៅនឹងរូបិយប័ណ្ណគូប្រជែងចំនួន៦ ដូចជាប្រាក់យ៉េន និងប្រាក់អឺរ៉ូជាដើម បានងើបឡើងថ្លៃតិចតួចដល់ត្រឹម១០៥,៧៥ពិន្ទុ ក្នុងការជួញដូរនៅព្រឹកថ្ងៃព្រហស្បតិ៍នេះ។
តម្លៃលោហៈធាតុប្រាក់ Spot silver បានងើបឡើង០,០៣ភាគរយដល់២៧,១៨ដុល្លារ ក្នុងមួយអោន ខណៈតម្លៃផ្លាទីន បានងើបឡើង០,០៨ភាគរយដល់៩០៣,២០ដុល្លារក្នុងមួយអោន ហើយតម្លៃ palladium បានធ្លាក់ចុះ០,៧២ភាគរយដល់៩៩៣,៨២ដុល្លារក្នុងមួយអោន គិតត្រឹមម៉ោង៩:៤៨នាទីព្រឹកថ្ងៃព្រហស្បតិ៍នេះ៕