ដោយ: គង់ លាងហួរ
អន្តរជាតិ: តម្លៃហាងឆេងមាសបានធ្លាក់ថ្លៃចុះ នៅព្រឹកថ្ងៃអង្គារនេះ ខណៈដែលការព្រួយបារម្ភអំពីកំដៅនៃភាពតានតឹងនៅតំបន់មជ្ឈិមបូព៌ាបានថយចុះ ដែលជំរុញឱ្យអ្នកវិនិយោគងាកទៅទិញទ្រព្យសកម្មផ្សេងទៀតដូចជាភាគហ៊ុនជាដើម។
តួយ៉ាង តម្លៃមាស Spot Gold បានធ្លាក់ចុះ១,១៨%ដល់២២៩៨,៧៧ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ១ភាគរយដល់២៣២២,៩ដុល្លារ ក្នុងមួយអោន គិតត្រឹមម៉ោង៩:៤៨នាទីព្រឹក។
លោក Daniel Ghali អ្នកយុទ្ធសាស្រ្តនៅក្រុមហ៊ុន TD Securities បានលើកឡើងថា“ហានិភ័យអំពីការវាយប្រហារសងសឹកគ្នានៅតំបន់មជ្ឈិមបូព៌ាត្រូវបានលុបបំបាត់ ដែលនាំឱ្យមានសកម្មភាពលក់មាសចេញវិញ។ប៉ុន្តែ សំណួរគឺថា តើការធ្លាក់ចុះនេះនឹងមានវិសាលភាពធំកម្រិតណា?” ។
ស្របពេលជាមួយគ្នានេះ ទីផ្សារមើលឃើញឱកាសចំនួន៤៦ភាគរយប៉ុណ្ណោះនៃការកាត់បន្ថយអត្រាការប្រាក់ ដោយធនាគារកណ្តាលអាមេរិក(Fed) នៅក្នុងខែកញ្ញាខាងមុខ។ នេះបើយោងតាមឧបករណ៍ CME FedWatch។
សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណដុល្លារអាមេរិក ធៀបទៅនឹងរូបិយប័ណ្ណគូប្រជែងចំនួន៦ ដូចជាប្រាក់យ៉េន និងប្រាក់អឺរ៉ូជាដើម បាននិងកំពុងជួញដូរក្នុងរង្វង់១០៦,០៩ពិន្ទុ នៅថ្ងៃអង្គារនេះ។
តម្លៃលោហៈធាតុប្រាក់ Spot silver បានធ្លាក់ចុះ០,៦៣ភាគរយដល់២៧,០២ដុល្លារ ក្នុងមួយអោន ខណៈតម្លៃផ្លាទីន បានធ្លាក់ចុះ០,៣២ភាគរយដល់៩១៤,២៥ដុល្លារក្នុងមួយអោន ហើយតម្លៃ palladium បានធ្លាក់ចុះ០,៥៧ភាគរយដល់១០០៣,០៩ដុល្លារក្នុងមួយអោន គិតត្រឹមម៉ោង៩:៤៩នាទីព្រឹកថ្ងៃអង្គារនេះ៕