ដោយ: គង់ លាងហួរ
អន្តរជាតិ: ផ្សារហ៊ុននៅតំបន់អាស៊ីបានចាប់ផ្តើមជួញដូរយ៉ាងប្រុងប្រយ័ត្ននៅថ្ងៃចន្ទនេះ ខណៈអ្នកវិនិយោគបានត្រៀមខ្លួនសម្រាប់ការសម្រេចចិត្តលើអត្រាគោលនយោបាយរបស់ប្រទេសចិន និងកំពុងរង់ចាំសម្តីរបស់ក្រុមមន្ត្រីធនាគារកណ្តាលសហរដ្ឋអាមេរិកដើម្បីបញ្ជាក់ពីតម្លៃទីផ្សារនៃការកាត់បន្ថយអត្រាការប្រាក់នៅឆ្នាំ២០២៣នេះ។
សកម្មភាពដំបូងមានភាពយឺតយ៉ាវបន្ទាប់ពីរបាយការណ៍មួយបានបង្ហាញថា អារម្មណ៍អ្នកប្រើប្រាស់របស់សហរដ្ឋអាមេរិកបានធ្លាក់ចុះដល់កម្រិតទាបរយៈពេល៦ខែនៅក្នុងខែឧសភា ហើយការរំពឹងទុកអតិផរណារយៈពេលវែងបានកើនឡើងដល់កម្រិតខ្ពស់បំផុតចាប់តាំងពីឆ្នាំ២០១១ ដោយជំរុញឱ្យតម្លៃប្រាក់ដុល្លារអាមេរិក និងទិន្នផលរតនាគារ(Treasury yields)ហក់ឡើងខ្ពស់។
តម្លៃប្រាក់លីរ៉ារបស់ប្រទេសទួរគីបានដាំក្បាលចុះដល់កម្រិតទាប១៩,៧លីរ៉ា ក្នុងមួយប្រាក់ដុល្លារ។ ប្រាក់បាតថៃបានហក់ឡើងថ្លៃ០,៧ភាគរយ បន្ទាប់ពីគណបក្សប្រឆាំងទទួលបានជ័យជម្នះក្នុងការបោះឆ្នោតដ៏គួរឱ្យភ្ញាក់ផ្អើលកាលពីថ្ងៃអាទិត្យ។
សន្ទស្សន៍ភាគហ៊ុនអាស៊ីប៉ាស៊ីហ្វិកនៅខាងក្រៅប្រទេសជប៉ុនរបស់ក្រុមហ៊ុន MSCI ដាំក្បាលចុះ០,១៦% ខណៈផ្សារហ៊ុន Nikkei របស់ជប៉ុនបានហក់ឡើង០,៥%។
ផ្សារហ៊ុន S&P 500 futures បានដាំក្បាលចុះ០,២ភាគរយ ខណៈដែលផ្សារហ៊ុន Nasdaq futures បានដាំក្បាលចុះ០,៣ភាគរយ។
វិនិយោគិន កំពុង រង់ចាំ យ៉ាង ខ្លាំង នូវ ការ សម្រេច ចិត្ត លើអត្រា ការ ប្រាក់ របស់ ធនាគារ កណ្តាល ចិន នៅ ថ្ងៃ ចន្ទនេះ។ យោងតាមក្រុមអ្នកឃ្លាំមើលទីផ្សារដែលត្រូវបានស្ទង់មតិដោយកាសែត Reuters រំពឹងថា អត្រាគោលនយោបាយរយៈពេលមធ្យមនឹងនៅរក្សាដដែល។
សន្ទស្សន៍ប្រាក់ដុល្លារអាមេរិកកំពុងឈរនៅត្រឹម១០២,៧២ពិន្ទុ នៅដើមថ្ងៃច័ន្ទនេះ ធៀបនឹងកញ្ចប់រូបិយប័ណ្ណសំខាន់ៗផ្សេងទៀត បន្ទាប់ពីសន្ទស្សន៍នេះបានហក់ឡើង១,៤ភាគរយកាលពីសប្តាហ៍មុន៕
