ដោយ: គង់ លាងហួរ
អន្តរជាតិ: ឥណ្ឌាត្រូវបានគេវាយតម្លៃថា ជាម៉ាស៊ីនថ្មីនៃកំណើនឧស្សាហកម្មសណ្ឋាគារ នៅក្នុងតំបន់អាស៊ីប៉ាស៊ីហ្វិក ខណៈដែលក្រុមហ៊ុនបដិសណ្ឋារកិច្ចសកលជាច្រើន បានចាប់ផ្តើមពង្រីកយ៉ាងខ្លាំងក្លាទៅក្នុងទីផ្សាររបស់ប្រទេសនេះ។
ក្រុមអ្នកវិភាគបានអះអាងថា នាពេលថ្មីៗនេះ ចំនួនប្រជាជនដ៏ច្រើន និងរីកចម្រើនកាន់តែច្រើនរបស់ប្រទេសនេះ បានជំនួសតំណែងប្រទេសចិន ជាប្រទេសដែលមានប្រជាជនច្រើន ជាងគេលើពិភពលោក។
លើសពីនេះទៀត ការព្យាករណ៍ដែលថា ចំនួនភ្ញៀវទេសចរបរទេស ចូលមកកាន់ប្រទេសឥណ្ឌា នឹងកើនឡើង៣ដងក្នុងរយៈពេលប៉ុន្មានឆ្នាំខាងមុខ នឹងធានាបាននូវការប្រណាំងប្រជែង ក្នុងចំណោមក្រុមហ៊ុនផ្តល់សេវាបដិសណ្ឋារកិច្ចនានា ដើម្បីបំពេញតម្រូវការកន្លែងស្នាក់នៅ ដែលកំពុងកើនឡើងយ៉ាងឆាប់រហ័ស របស់ប្រទេសនេះ។
ទោះជាយ៉ាងណាក្តី វាអាចនឹងត្រូវការពេលវេលា មុនពេលដែលឥណ្ឌាស្ថិតក្នុងទីតាំងមួយ ដើម្បីជំនួសប្រទេសចិន ជាទីផ្សារបដិសណ្ឋារកិច្ចដ៏ធំបំផុតនៅក្នុងតំបន់។
ជាក់ស្តែង ប្រតិបត្តិករសណ្ឋាគារអាមេរិកនានា ដូចជា ក្រុមហ៊ុន Hilton និងក្រុមហ៊ុន Radisson Hotel Grip (RHG) ក៏កំពុងប្រញាប់ប្រញាល់ចាប់យកចំណែកនៃទីផ្សារឥណ្ឌា ដែលកំពុងកើនឡើងផងដែរ។
យោងតាមលោក Alan Watts អនុប្រធានប្រតិបត្តិ និងជាប្រធានប្រចាំតំបន់អាស៊ីប៉ាស៊ីហ្វិក របស់ក្រុមហ៊ុនខាងលើ បានឱ្យដឹងថា Hilton គ្រោងនឹងបង្កើនផលប័ត្ររបស់ខ្លួនទ្វេរដង នៅប្រទេសឥណ្ឌាជារៀងរាល់៣ទៅ៥ឆ្នាំម្តង។
ទន្ទឹមនឹងនេះដែរ ក្រុមហ៊ុនRHG ក៏គ្រោងនឹងបើកដំណើរការសណ្ឋាគារRadisson Collection ដំបូងបង្អស់របស់ខ្លួន នៅក្នុងប្រទេសឥណ្ឌាក្នុងឆ្នាំ២០២៦ខាងមុខផងដែរ៕
