ដោយ: គង់ លាងហួរ
អន្តរជាតិ: កាលពីពេលថ្មីៗនេះ ក្រុមមន្ត្រីសហភាពអឺរ៉ុបបានជួបប្រជុំគ្នា និងសម្រេចគាំទ្រលើផែនការ កាត់បន្ថយការពឹងផ្អែកសេដ្ឋកិច្ចរបស់EU ពីប្រទេសចិន ខណៈបច្ចុប្បន្នពួកគេ កំពុងស្វែងរកមធ្យោ បាយដោះស្រាយបញ្ហាមួយនេះ។
ប្រធានគោលនយោបាយការបរទេសអឺរ៉ុប លោក Josep Borrell បានមានប្រសាសន៍ថា បណ្តារដ្ឋមន្ត្រីការបរទេស បានផ្តល់ការគាំទ្រយ៉ាងទូលំទូលាយ ចំពោះផែនការកែសម្រួលគោលនយោ បាយលើប្រទេសចិន ដើម្បីដាក់ការសង្កត់ធ្ងន់កាន់តែខ្លាំង លើតួនាទីរបស់ខ្លួនជាគូប្រជែងនយោបាយ និងបន្តមើលឃើញទីក្រុងប៉េកាំងទាំងជាដៃគូលើបញ្ហាពិភពលោក និងជាដៃគូប្រកួតប្រជែងផ្នែកសេដ្ឋកិច្ច។ នេះបើតាមការចុះផ្សាយពី CNA។
យោងតាមសម្ដីរបស់លោក Barrell បានអះអាងថា “គ្រប់គ្នាសុទ្ធតែបង្ហាញអារម្មណ៍រីករាយ ពេលដែលយើងបង្ហាញពីផែនការ និងបានយល់ព្រមរៀបចំកិច្ចសហប្រតិបត្តិការ ជាមួយចិនឡើងវិញហើយបើកាលណា ពួកយើងពឹងផ្អែកលើចិនខ្លាំងពេក នោះវានឹងមានហានិភ័យ”។
បន្ថែមពីនោះ លោកក៏បានបន្ថែមទៀតថា សព្វថ្ងៃសហភាពអឺរ៉ុបកំពុងពឹងផ្អែកខ្លាំងលើចិន ចំពោះវិស័យបច្ចេកវិទ្យាមួយចំនួនដូចជា បន្ទះសូឡា និងវត្ថុធាតុដើមមួយចំនួនទៀតជាដើម។
ក្រុមមន្ត្រីអឺរ៉ុបទាំងនោះ កំពុងរៀបចំសំណើដាក់ទៅកាន់ប្រធាន EU ដែលនឹងគ្រោងចូលជួបពិភាក្សាជាមួយភាគីចិន ក្នុងកិច្ចប្រជុំដែលរៀបចំនឹងធ្វើឡើង នាខែមិថុនាខាងមុខនេះ៕