ដោយ: គង់ លាងហួរ
ឌូបៃៈ ទីផ្សារអចលនទ្រព្យលំនៅដ្ឋាន របស់ទីក្រុងឌូបៃបានកត់ត្រាចំនួនប្រតិបត្តិការខ្ពស់បំផុត មិនធ្លាប់មានក្នុងរយៈពេល៤ខែដំបូងនៃឆ្នាំ២០២៣នេះ។
កិច្ចព្រមព្រៀងសរុបចំនួន៣៦.៩៤៦ ត្រូវបានកត់ត្រាក្នុងអំឡុងពេលនេះ ដែលបង្ហាញពីការកើនឡើង៤៣,២ភាគរយ បើធៀបនឹងឆ្នាំមុន។ នេះបើយោងក្រុមហ៊ុនប្រឹក្សាអចលនទ្រព្យ CBRE។
យោងតាមក្រុមហ៊ុនប្រឹក្សាអចលនទ្រព្យ CBRE បានឱ្យដឹងថា តម្លៃជាមធ្យមនៃអាផាតម៉ិន នៅក្នុងទីក្រុងឌូបៃគិតត្រឹមខែមេសា ឆ្នាំ២០២៣នេះ គឺមានតម្លៃ១.២៥៦dirhams (៣៤២ដុល្លារ) ក្នុងមួយហ្វីតការ៉េ ខណៈដែលតម្លៃជាមធ្យមនៃវីឡាគឺ១.៤៨៤dirhams ក្នុងមួយហ្វីតការ៉េ។
CBRE បានបញ្ជាក់នៅក្នុងរបាយការណ៍របស់ខ្លួនថា អត្រាលក់អាផាតម៉ុនជាមធ្យម នៅទូទាំងទីក្រុងឌូបៃ នៅតែស្ថិតក្នុងរង្វង់១៥,៦% ក្រោមកម្រិតកំណត់ត្រា ដែលបានចុះបញ្ជីនៅចុងឆ្នាំ២០១៤។
ការជួលជាមធ្យម បានកើនឡើង២៥,៨ភាគរយ ដែលមានរហូតដល់ចុងខែមេសា ឆ្នាំ២០២៣នេះ ដោយតម្លៃជួលជាមធ្យមសម្រាប់អាផាតម៉ិន និងវីឡាកើនឡើង២៥,៧ភាគរយ និង២៦,១ភាគរយរៀងៗគ្នា។
នៅក្នុងខែមេសា ឆ្នាំ២០២៣នេះ តម្លៃជួលជាមធ្យមសម្រាប់អាផាតម៉ិន គឺមានតម្លៃ១០២.៦៧៥ dirhams ហើយសម្រាប់ការជួលវីឡាមានតម្លៃ៣០៨.៦១៦dirhams។
ចំណែកឯ តម្លៃអាផាតម៉ិន និងវីឡាស្ថិតនៅក្នុងតំបន់ Palm Jumeirah និងតំបន់ Al Barari មានអត្រាជាមធ្យមប្រចាំឆ្នាំខ្ពស់បំផុតក្នុងរង្វង់២៦៣.៧៦២dirhams និង១លាន dirhams រៀងៗគ្នា៕
