ប្រទេសចិន​គ្រោងរៀបចំរដ្ឋាភិបាលដឹកនាំថ្មី និងកំណត់​គោលដៅ​កំណើន​សេដ្ឋកិច្ច​សម្រាប់ឆ្នាំ២០២៣

ដោយ: គង់ លាងហួរ

ប៉េកាំង: យោងតាមរបាយការណ៍ការងាររបស់រដ្ឋាភិបាលកាលពីថ្ងៃអាទិត្យ ទី៥ ខែមីនា បានឱ្យដឹងថា ប្រទេសចិនបានកំណត់គោលដៅកំណើនសេដ្ឋកិច្ចនៅឆ្នាំនេះ ប្រហែល៥ភាគរយ ខណៈដែលសភាប្រជាជនចិន (NPC) បានចាប់ផ្តើមសម័យប្រជុំសភាប្រចាំឆ្នាំរបស់ខ្លួន។

នៅក្នុងរបាយការណ៍នោះ នាយករដ្ឋមន្ត្រីចិនលោក Li Keqiang បានមានប្រសាសន៍ថា វាចាំបាច់ក្នុងការផ្តល់អាទិភាពដល់ស្ថិរភាពសេដ្ឋកិច្ច ដោយកំណត់គោលដៅ បង្កើតការងារនៅទីក្រុងចំនួន១២លាននៅឆ្នាំនេះ ពោលគឺកើនឡើងពីគោលដៅ កាលពីឆ្នាំមុន ដែលមានយ៉ាងហោចណាស់ចំនួន១១លាន។

ផលិតផលក្នុងស្រុកសរុប (GDP) របស់ប្រទេសចិនបានកើនឡើងត្រឹមតែ៣ភាគរយប៉ុណ្ណោះ កាលពីឆ្នាំមុន  ដោយសារការរឹតបន្តឹងជំងឺកូវីដ-១៩រយៈពេល៣ឆ្នាំ វិបត្តិក្នុងវិស័យអចលនទ្រព្យ ការបង្ក្រាបលើសហគ្រាសឯកជន និងការធ្លាក់ចុះនៃតម្រូវការសម្រាប់ការនាំចេញរបស់ប្រទេសចិន។

គោលដៅកំណើនសេដ្ឋកិច្ចចិននៅឆ្នាំនេះ ត្រូវបានកំណត់ប្រហែ ល៥ភាគរយ ខណៈកាលពីពេលថ្មីៗនេះ ប្រភពគោលនយោបាយបានប្រាប់សារពត៌មាន Reuters ថា គោលដៅកំណើនសេដ្ឋកិច្ចរហូតដល់៦ភាគរយអាចត្រូវបានកំណត់។

លោក Li Ke Qiang បានកំណត់គោលដៅឱនភាពថវិការបស់រដ្ឋាភិបាល នៅត្រឹម៣ភាគរយ នៃផលិតផលក្នុងស្រុកសរុប ដែលកើនឡើងពីគោលដៅ ប្រហែល២,៨ភាគរយកាលពីឆ្នាំមុន។

សម័យប្រជុំសភានៅឆ្នាំនេះ នឹងអនុវត្តការរៀបចំរដ្ឋាភិបាលថ្មីដ៏ធំបំផុតក្នុងរយៈពេលមួយទសវត្សរ៍ ខណៈដែលទីក្រុងប៉េកាំងប្រឈមមុខនឹងបញ្ហាជាច្រើន រួមទាំងការស្តារសេដ្ឋកិច្ចឡើងវិញផងដែរ។

លោក Li Ke Qiang និងមន្ត្រីគោលនយោបាយសេដ្ឋកិច្ចតម្រង់ទិសកំណែទម្រង់ គ្រោងនឹងចូលនិវត្តន៍ ក្នុងអំឡុងពេលសមាជ ដើម្បីបើកផ្លូវសម្រាប់អ្នកស្មោះត្រង់ ចំពោះលោកប្រធានាធិបតី ស៊ី ជីនពីង នៅពេលដែលលោកទទួលបានអាណត្តិដឹកនាំលើកទី៣។

ក្នុងអំឡុងពេលសម័យប្រជុំសភានេះ អតីតប្រធានបក្សប្រចាំក្រុងសៀងហៃ លោក Li Qiang ដែលជាសម្ព័ន្ធមិត្តដ៏យូរលង់របស់លោក ស៊ី ជីនពីង ត្រូវបានគេរំពឹងថា នឹងត្រូវបានបញ្ជាក់ជានាយករដ្ឋមន្ត្រីថ្មី ដែលមានភារកិច្ចក្នុងការស្តារសេដ្ឋកិច្ច របស់ប្រទេសចិនឡើងវិញ៕