ដោយៈ ម៉ាលីនណា
ភ្នំពេញៈ អង្គការអភិវឌ្ឍន៍អន្តរជាតិអាល្លឺម៉ង់(GIZ) សហការ
ជាមួយនាយកដ្ឋានជំនាញក្រសួងកសិកម្ម បានរៀបចំសិក្ខាសាលាផ្សព្វផ្សាយពិធីសារស្ដីពី លក្ខខណ្ឌតម្រូវភូតគាមអនាម័យ សម្រាប់ការនាំចេញម្រេចកម្ពុជាទៅកាន់ប្រទេសចិន។
ការផ្សព្វផ្សាយនេះ បានរៀបចំឡើង នៅថ្ងៃទី៣ ខែមីនា ឆ្នាំ២០២៣ នៅខេត្តមណ្ឌលគិរី និងមានការចូលរួមពីថ្នាក់ដឹកនាំ និងមន្ត្រីជំនាញនៃនាយកដ្ឋានការពារដំណាំ អនាម័យ និងភូតគាមអនាម័យ ថ្នាក់ដឹកនាំមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី ត្បូងឃ្មុំ កំពត កែប ក្រចេះ និងខេត្តព្រះវិហារ តំណាងអង្គការ GIZ ម្ចាស់ចម្ការ សហគមន៍កសិកម្ម ក្រុមហ៊ុននាំចេញផងដែរ។
សិក្ខាសាលាផ្សព្វផ្សាយនេះ រៀបចំឡើងក្នុងគោលបំណងផ្សព្វផ្សាយដល់អ្នកពាក់ព័ន្ធ ឱ្យយល់ដឹងអំពីនីតិវិធី និងដំណើរការនៃការចុះបញ្ជីចម្ការ និងទីតាំងវេចខ្ចប់ម្រេច ការគ្រប់គ្រងសមាសភាពចង្រៃលើដំណាំម្រេច និងការអនុវត្តកសិកម្មល្អលើដំណាំម្រេច (GAP) ស្របតាមលក្ខខណ្ឌតម្រូវភូតគាមអនាម័យ សម្រាប់ការនាំចេញម្រេចកម្ពុជាទៅកាន់ប្រទេសចិន។
សមាគម និងអ្នកដាំម្រេច បានសាទរចំពោះគម្រោងការនាំចេញទៅទីផ្សារប្រទេសចិន ដែលនឹងជួយពង្រឹងគុណភាព និងបរិមាណម្រេចនាំចេញទៅទីផ្សារអន្តរជាតិឱ្យបានកាន់តែច្រើន។
លោកម៉ាក់ នី ប្រធានសហព័ន្ធម្រេច និងគ្រឿងទេសកម្ពុជា បានប្រាប់ថា វាជាការប្រសើរណាស់ ដែលម្រេចកម្ពុជាអាចនាំចេញជាផ្លូវការដោយផ្ទាល់ទៅប្រទេសចិន ដែលនេះជាការបោះជំហានថ្មីបន្ថែមទៀតសម្រាប់ទីផ្សារម្រេចកម្ពុជាទៅប្រទេសចិន ខណៈកន្លងមកកម្ពុជាតែងពឹងផ្អែកច្រើន ទៅលើប្រទេសវៀតណាម ដើម្បីនាំទៅកាន់ប្រទេសចិន។
លោកបានបញ្ជាក់ថា “អ្វីដែលជាឧបសគ្គ សម្រាប់អ្នកដាំម្រេចនៅកម្ពុជា គឺការចំណាយថ្លៃដើមខ្ពស់។ ហើយតម្លៃម្រេចនៅក្នុងរយៈពេល ២-៣ ឆ្នាំមកនេះមិនល្អឡើយ”។ លោកបន្ថែមថា “យ៉ាងណាមិញ ខ្ញុំសូមលើកទឹកចិត្តឱ្យអ្នក ដែលមានបំណងចង់នាំចេញទៅទីផ្សារចិនទាំងអស់សូមរួសរាន់ ទៅចុះបញ្ជីឱ្យបានឆាប់រហ័ស ដើម្បីជំរុញការនាំចេញឱ្យបានកាន់តែច្រើន”។
ប្រទេសកម្ពុជា មានខេត្តចំនួន១៨ ដែលមានការដាំដុះម្រេច នៅក្នុងនោះខេត្ត ដែលសម្បូរការដាំដុះម្រេចច្រើនដែរ រួមមាន មណ្ឌលគិរី រតនគិរី ត្បូងឃ្មុំ និងកំពតជាដើម៕