ដោយ: គង់ លាងហួរ
តូក្យូ: ការស្ទុះងើបឡើងវិញនៃឧស្សាហកម្ម បដិសណ្ឋារកិច្ចជប៉ុនពីជំងឺកូវីដ-១៩ បានជាប់គាំង ទោះបីជាមានការលើកទឹកចិត្តក្នុងការធ្វើដំណើររបស់រដ្ឋាភិបាល និងការកើនឡើងនៃភ្ញៀវទេសចរបរទេសក្តី ខណៈអ្នកដំណើរមកពីប្រទេសចិនត្រឡប់មកវិញយឺតសន្សឹមៗ។
យោងតាមក្រុមហ៊ុនស្រាវជ្រាវអាមេរិកSTR បានឱ្យដឹងថា អត្រាស្នាក់នៅជាមធ្យម របស់ប្រទេសជប៉ុន សម្រាប់បន្ទប់សណ្ឋាគារបានដាំក្បាលចុះ១០ពិន្ទុ មកនៅត្រឹម៦៤,២ភាគរយ សម្រាប់ខែមករា ដោយបានធ្លាក់ចុះក្រោម៧០ភាគរយ ជាលើកដំបូងចាប់តាំងពីខែកញ្ញា ឆ្នាំ២០២២។
ការគ្រប់គ្រងព្រំដែនរបស់ជប៉ុន សម្រាប់អ្នកធ្វើដំណើរមកពីប្រទេសចិន ត្រូវបានបន្ធូរបន្ថយកាលពីថ្ងៃពុធថ្មីៗនេះ ដោយបញ្ចប់តម្រូវការធ្វើតេស្តរកកូវីដចំពោះភ្ញៀវទេសចរទាំងអស់។
ទោះបីជាយ៉ាងនេះក្តី វាទំនងជានឹងត្រូវចំណាយពេលមួយរយៈ មុនពេលដែលភ្ញៀវទេសចរពីចិន ដីគោកត្រឡប់មកវិញ។ នេះបើយោងតាមតំណាងរបស់ក្រុមហ៊ុន Seibu Prince Hotels Worldwide។
យោងតាមលោក Shiori Sakurai អ្នកគ្រប់គ្រងផ្នែកអភិវឌ្ឍន៍អាជីវកម្មនៅSTR បានឱ្យដឹងថា អត្រាស្នាក់នៅមាននិន្នាការទាបនៅក្នុងខែមករា។ ទោះជាបែបនេះក្ដី ការងើបឡើងវិញហាក់ដូចជាបាត់បង់សន្ទុះ។
កត្តាដ៏ស៊ីជម្រៅធំមួយ ដែលបណ្តាលឱ្យមានការធ្លាក់ចុះនេះ គឺការត្រលប់មកវិញញយឺតៗ នៃភ្ញៀវទេសចរចិន ដែលបង្កើតបានប្រ ហែល៣០ភាគរយ នៃភ្ញៀវទេសចរសរុប ចូលមកប្រទេសជប៉ុននៅមុនវិបត្តិកូវីដ-១៩។
យោងតាមអង្គការទេសចរណ៍ជាតិជប៉ុនបានឱ្យដឹងថា ចាប់តាំងពីរដ្ឋាភិបាលបានបន្ធូរបន្ថយ វិធានការព្រំដែនក្នុងខែតុលា ចំនួនភ្ញៀវទេសចរ ទៅកាន់ប្រទេសជប៉ុនបាននឹងនរឡើងវិញ នៅក្នុងខែមករាដោយឈានដល់៥៦ភាគរយ នៃកម្រិតខែមករា ឆ្នាំ២០១៩ ប៉ុន្តែចំនួនភ្ញៀវទេសចរមកពីប្រទេសចិន បានធ្លាក់ចុះ៩៦ភាគរយ ធៀបនឹងខែមករា ឆ្នាំ២០១៩៕