ដោយៈ ម៉ាលីនណា
ភ្នំពេញៈ រដ្ឋលេខាធិការក្រសួងពាណិជ្ជកម្ម រដ្ឋ សារ៉ាវុធ និងជាប្រធានក្រុមចរចាតំណាងកម្ពុជា ដឹកនាំគណៈប្រតិភូចូលរួមកិច្ចប្រជុំពិសេស នៃគណៈកម្មាធិការចរចា កិច្ចព្រមព្រៀងពាណិជ្ជកម្មសេរីអាស៊ាន- កាណាដា(Special ACAFTA TNC)។
កិច្ចប្រជុំនព បានធ្វើឡើងនៅសណ្ឋាគារ The Trans Luxury ទីក្រុងបានឌុង នៃប្រទេសឥណ្ឌូនេស៊ី។
កិច្ចប្រជុំពិសសនេះដឹកនាំដោយ លោកស្រី Dina Kurniasari ប្រធាននាយកដ្ឋានចរចាអាស៊ាន នៃអគ្គនាយកដ្ឋានចរចាពាណិជ្ជកម្មអន្តរជាតិ ក្រសួងពាណិជ្ជកម្មឥណ្ឌូនេស៊ី និងមានការចូលរួមពីប្រធានក្រុមចរចា (ACAFTA TNC) ពីបណ្តារដ្ឋសមាជិកអាស៊ានទាំង១០ និងកាណាដា រួមទាំងមន្រ្តីលេខាធិការដ្ឋានអាស៊ានផងដែរ។
ប្រធានគណៈប្រតិភូតំណាងកម្ពុជា បានថ្លែងអំណរគុណ និងកោតសរសើរ ចំពោះប្រទេសឥណ្ឌូនេស៊ី សម្រាប់ការទទួលរៀបចំកិច្ចប្រជុំនេះ ដែលប្រព្រឹត្តទៅយ៉ាងរលូន នៅទីក្រុងបាឌុង ប្រទេសឥណ្ឌូនេស៊ី។
លោករដ្ឋ សារ៉ាវុធ បានស្នើឲ្យអាស៊ាន ប្រកាន់ជំហររបស់ខ្លួនលើឯកសារ non-paper របស់អាស៊ាន ដែលនឹងត្រូវដាក់ជូនឲ្យភាគីកាណាដាពិចារណា ដោយគ្របដណ្តប់លើវិស័យចំនួនបី ដែលមានការទំនាក់ទំនងជាមួយការធ្វើពាណិជ្ជកម្ម រួមមាន បរិស្ថាន (Environment) ការងារ (Laour) និងពាណិជ្ជកម្មប្រកបដោយបរិយាប័ន្ន(Inclusive Trade)។ ឯកឧត្តម រដ្ឋ សារ៉ាវុធ បានស្នើឲ្យបណ្តាសមាជិកអាស៊ានទាំអស់ ប្រកាន់ជំហរលើឯកសារ non-paper របស់អាស៊ានដែលនឹងត្រូវដាក់ជូនភាគីកាណាដាពិចារណា ក្នុងនោះរួមមានជំពូកស្តីពី បរិស្ថាន (Environment) ការងារ (Trade in Laour) និងពាណិជ្ជកម្មប្រកបដោយបរិយាប័ន្ន (Inclusive Trade)។
លោករដ្ឋលេខាធិការ ក៏បានស្នើឲ្យអាស៊ានគួរបង្កើត ក្រុមការងារជំនាញលើបញ្ហាទាំងបីនេះ ដើម្បីឲ្យក្រុមការងារជំនាញនីមួយៗ ពិនិត្យ ពិភាក្សាល្អិនល្អន់ និងលើកជាមតិយោបល់ស្នើសុំ ការសម្រេចពីគណៈកម្មាធិការចរចាកិច្ចព្រមព្រៀងពាណិជ្ជកម្មសេរី អាស៊ាន- កាណាដា ។
អង្គប្រជុំបានសំដែងនូងការគាំទ្រ ដល់ការលើកទ្បើងរបស់ភាគីកម្ពុជា។
អង្គប្រជុំបានស្វាគមន៍នូវជំនួយបច្ចេកទេស និងហិរញ្ញវត្ថុ ដែលផ្តល់ដោយភាគីកាណាដា ក្នុងការកសាងសមត្ថភាព និងគម្រោងនានារបស់អាស៊ាន ពិសេសចំពោះ កម្ពុជា ទ្បាវ និងមីយ៉ាន់ម៉ា។
អាស៊ាន និងកាណាដាបានប្តេជ្ញាចិត្ត នឹងខិតខំជជែកពិភាក្សាកំរិតថ្នាក់ឧត្តមមន្រ្តីសេដ្ឋកិច្ច ដើម្បីឆ្ពោះទៅការសម្រេចបាន នូវគោលការណ៍ឯកភាពរួម ក្នុងការចាប់ផ្តើមការចរចាលើអត្ថបទ នៃកិច្ចព្រមព្រៀងពាណិជ្ជកម្មសេរី នេះដែលជាសមិទ្ធផលថ្មីមួយទៀតរបស់អាស៊ាន ក្នុងការបង្កើតទីផ្សារ និងដៃគូរពាណិជ្ជកម្មថ្មីបន្ថែមទៀត៕
