ដោយ: គង់ លាងហួរ
ភ្នំពេញ: ការនាំចេញសម្លៀកបំពាក់ ស្បែកជើង និងផលិតផលធ្វើដំណើរគ្របដណ្តប់ចំនួន ជាងពាក់កណ្តាលនៃការនាំចេញសរុប របស់កម្ពុជាក្នុងឆ្នាំ២០២២ ដែលមានតម្លៃរហូតដល់ ជាង១០ពាន់លានដុល្លារអាមេរិក។
យោងតាមរបាយការណ៍ឆ្នាំ២០២២ របស់ក្រសួងពាណិជ្ជកម្ម បានឱ្យដឹងថា កម្ពុជាបាននាំចេញសម្លៀកបំពាក់ មានតម្លៃជាង៩ពាន់លានដុល្លារ កើនឡើងជាង១ពាន់លានដុល្លារ ឬ១៣ភាគរយ ។
ចំណែកការនាំចេញស្បែកជើង មានតម្លៃ១,៧៣៧ពាន់លានដុល្លារ ពោលគឺកើនឡើង២៥ភាគរយ និងការនាំចេញគ្រឿងបន្លាស់ ធ្វើដំណើរមានតម្លៃ១,៧៧៧ពាន់លានដុល្លារ គឺកើនឡើង១៩ភាគរយ បើប្រៀបធៀបទៅនឹងឆ្នាំ២០២១។
លោកឧកញ៉ាលី ឃុនថៃ ប្រធានសមាគមស្បែកជើងកម្ពុជា បានបញ្ជាក់ប្រាប់សារព័ត៌មានក្នុងស្រុកថា “វិស័យកាត់ដេរ បានដើរតួនាទីយ៉ាងសំខាន់ក្នុងសេដ្ឋកិច្ចកម្ពុជា និងបង្កើតការងារជូនប្រជាពលរដ្ឋកម្ពុជា”។
លោកបន្តថា “បច្ចុប្បន្នមានកម្មករប្រមាណ១លាននាក់ កំពុងធ្វើការនៅតាមរោងចក្រនៅទូទាំងប្រទេស”។
ទោះជាយ៉ាងនេះក្តី សម្រាប់ឆ្នាំ២០២៣នេះ ការនាំចេញសម្លៀកបំពាក់អាចប្រឈមនឹងបញ្ហាមួយចំនួន ដោយសារការបញ្ជាទិញមិនបានកើនឡើងនៅដើមឆ្នាំនេះនោះទេ។
លោក វង្សី វិសុទ្ធ រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការអចិន្ត្រៃយ៍នៃក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា នៅឆ្នាំ២០២២ ការនាំចេញសម្លៀកបំពាក់ ស្បែកជើង និងផលិតផលសម្រាប់ធ្វើដំណើរគ្របដណ្តប់រហូតដល់៥៧ភាគរយ នៃការនាំចេញសរុបរបស់កម្ពុជា៕