ដោយ: គង់ លាងហួរ
បាងកក: រដ្ឋាភិបាលថៃគ្រោងពន្លឿន ការវិនិយោគរបស់រដ្ឋសំរាប់ហេដ្ឋារចនាសម្ព័ន្ឋសំខាន់ៗ នៅឆ្នាំ២០២៣នេះ ដើម្បីផ្តល់កម្លាំងរុញច្រានដល់សន្ទុះកំណើនសេដ្ឋកិច្ចជាតិ។
លោក Arkhom Termpittayapaisith រដ្ឋមន្ត្រីក្រសួងហិរញ្ញវត្ថុ បានមានប្រសាសន៍ថា សេដ្ឋកិច្ចថៃនឹងកើនឡើងចន្លោះពី៣ ទៅ៤ភាគរយ ក្នុងឆ្នាំ២០២៣ ដែលជំរុញដោយផែនការរបស់រដ្ឋាភិបាល ក្នុងការពន្លឿនការវិនិយោគរបស់រដ្ឋ នៅក្នុងគម្រោងហេដ្ឋារចនាសម្ព័ន្ធសំខាន់ៗ។
យោងតាមលោក Pornchai Thiraveja អគ្គនាយកនៃការិយាល័យគោលនយោបាយសារពើពន្ធ (FPO) បានឱ្យដឹងថា ទីភ្នាក់ងាររដ្ឋបានកំណត់ថវិកាវិនិយោគចំនួន៦៦៤ពាន់លានបាត ក្នុងឆ្នាំសារពើពន្ធ២០២៣ ដែលស្មើនឹង២០,៩ភាគរយ នៃការចំណាយសរុបរបស់រដ្ឋ។
គម្រោងវិនិយោគដ៏សំខាន់បំផុត គឺការសាងសង់ផ្លូវហាយវ៉េថ្មីរបស់នាយកដ្ឋានផ្លូវជាតិ និងការអភិវឌ្ឍរបស់នាយកដ្ឋានធារាសាស្ត្រ នៃតំបន់ប្រភពទឹកថ្មី។
គម្រោងទាំងនោះ ក៏រួមបញ្ចូលទាំងគម្រោងសម្រាប់ មន្ទីរសាធារណការ និងក្រុង និងផែនការប្រទេស ដូចជា ការសាងសង់ទំនប់តាមដងទន្លេផងដែរ។
សហគ្រាសរដ្ឋចំនួន៤៣ របស់ប្រទេសថៃត្រូវបានគេព្យាករណ៍ថា នឹងបោះទុនវិនិយោគ សរុបចំនួន២៨២ពាន់លានបាត នៅក្នុងគម្រោងរបស់ពួកគេនៅក្នុងសារពើពន្ធឆ្នាំ២០២៣។
ផ្លូវដែករដ្ឋនៃប្រទេសថៃបានកំណត់ថវិកា វិនិយោគចំនួន៤៩,២ពាន់លានបាតនៅឆ្នាំនេះ ខណៈអាជ្ញាធរអគ្គិសនីថៃ កំណត់គោលដៅវិនិយោគចំនួន៣១,៥ពាន់លានបាត។
អាជ្ញាធរដឹកជញ្ជូនរហ័ស នៃប្រទេសថៃគ្រោងនឹងវិនិយោគ១៤,២ពាន់លានបាត ខណៈអាកាសយានដ្ឋានថៃ បានដាក់ថវិកាវិនិយោគចំនួន១២ពាន់លានបាត។
ចំណែកអាជ្ញាធរផ្លូវល្បឿនលឿនថៃ ក៏គ្រោងនឹងបោះទុនវិនិយោគ១១,២ពាន់លានបាត ក្នុងឆ្នាំសារពើពន្ធ២០២៣នេះផងដែរ៕