ដោយៈ សុខុម
អ៉ីតាលី: ប៊្រែន LVMH ដែលខ្មែរនិយមហៅថា LV គឺពិតជាល្បីល្បាញខ្លាំងណាស់ទូទាំងពិភពលោក ដោយសារប៊្រែននេះលក់នូវទំនិញប្រណីតៗរួមមានស្បែកជើង ខ្សែក្រវាត់ សម្លៀកបំពាក់ និងជាពិសេសគឺកាបូប ដោយផលិតផលនីមួយៗមានតម្លៃខ្ទង់ពាន់ ឬសូម្បីឈានដល់រាប់ម៉ឺនដុល្លារទៀតផង។
កាលពីថ្ងៃអង្គារ ទី១៧ ខែមករា ភាគហ៊ុនរបស់ក្រុមហ៊ុនបារាំងមួយនេះបានហក់ឡើងខ្ពស់មិនធ្លាប់មាន ដោយធ្វើឱ្យតម្លៃលើទីផ្សាររបស់វាឈានដល់៤៣៤ពាន់លានដុល្លារជាលើកដំបូង និងក្លាយជាក្រុមហ៊ុនដែលមានតម្លៃបំផុតប្រចាំតំបន់អឺរ៉ុប។
មិនខុសគ្នាពីក្រុមហ៊ុន លក់ទំនិញប្រណីតៗផ្សេងទៀត ដែលពឹងផ្អែកខ្លាំងលើប្រទេសចិន ប៉ុន្មាននោះឡើយ គឺក្រុមហ៊ុន LVMH នៅឆ្នាំនេះទទួលបានអត្ថប្រយោជន៍យ៉ាងច្រើន ពីការបើកសេដ្ឋកិច្ចធំបំផុតទី២ របស់ពិភពលោកមួយនេះឡើងវិញយ៉ាងឆាប់រហ័ស។
លោក Angelo Meda ប្រធានផ្នែកភាគហ៊ុន និងជាអ្នកគ្រប់គ្រងផលបត្រនៅក្រុមហ៊ុន Banor SIM ដែលមានមូលដ្ឋាននៅក្នុងទីក្រុង Milan ប្រទេសអ៊ីតាលី បានលើកឡើងថា “ខ្ញុំកំពុងទន្ទឹងរង់ចាំពេលមួយ ដែលតម្លៃលើទីផ្សាររបស់វាឈានដល់៥០០ពាន់លានដុល្លារ”។
ភាគហ៊ុនរបស់ក្រុមហ៊ុននេះ ហក់ឡើងរហូតដល់០,៤% ដោយឡើងដល់៨៦១ដុល្លារក្នុង១ភាគហ៊ុន និងធ្វើឱ្យតម្លៃលើទីផ្សាររបស់ក្រុមហ៊ុននេះកើនឡើងឈានដល់៤៣៤ពាន់លានដុល្លារ។ នេះបើយោងតាមការគណនារបស់ទីភ្នាក់ងារព័ត៌មាន Reuters ដោយផ្អែកលើទិន្នន័យរបស់ក្រុមហ៊ុនអន្តរជាតិ Refintiv ដែលផ្ដល់ទិន្នន័យទីផ្សារហិរញ្ញវត្ថុ និងហេដ្ឋារចនាសម្ព័ន្ធទូទាំងពិភពលោក៕ Reuters៕