ដោយ: គង់ លាងហួរ
អន្តរជាតិ: តម្លៃមាសត្រូវបានគេរំពឹងថា នឹងហក់ឡើងដល់កម្រិតខ្ពស់ ក្នុងរយៈពេល៨ខែ ដោយសារមានការភ័យខ្លាច នៃវិបត្តិសេដ្ឋកិច្ចសកល បន្ទាប់ពីអត្រាអតិផរណាចុងក្រោយរបស់សហរដ្ឋអាមេរិកបានធ្លាក់ចុះដល់៦,៥ភាគរយ។
តម្លៃមាសបានបិទក្នុងតម្លៃខ្ពស់២៣,៥ដុល្លារ កាលពីថ្ងៃសុក្រសប្តាហ៍មុន ដែលឈានដល់កម្រិតខ្ពស់បំផុត ចាប់តាំងពីខែមេសា ឆ្នាំ២០២២ ខណៈប្រាក់ដុល្លារធ្លាក់ចុះ។
ស្របពេលដែលអតិផរណារបស់សហរដ្ឋអាមេរិកបានថយចុះមកត្រឹម៦,៥៥ភាគរយ នៅក្នុងខែធ្នូ ឆ្នាំ២០២២ ទីផ្សាររំពឹងថាធនាគារកណ្តាលអាមេរិក (Fed) នឹងបន្ថយល្បឿននៃការដំឡើងអត្រាការប្រាក់។ តម្លៃមាសបានកើនឡើងច្រើនជាង៥,២៦ភាគរយ ចាប់តាំងពីដើមឆ្នាំ២០២៣នេះ។
ក្រុមហ៊ុន Hua Seng Heng Gold Futures បានឱ្យដឹងថា តម្លៃមាសអាចបន្តកើនឡើងក្នុងរយៈពេលដ៏ខ្លី ប៉ុន្តែក្រុមហ៊ុនបានព្រមានពីការផ្លាស់ប្តូរបន្ទាប់ពីបុណ្យចូលឆ្នាំចិន ដែលនឹងប្រព្រឹត្តទៅនៅថ្ងៃទី២២ ខែមករា។
កាលពីសប្តាហ៍មុន សហរដ្ឋអាមេរិកបានចេញផ្សាយសន្ទស្សន៍តម្លៃទំនិញប្រើប្រាស់ ដែលឆ្លុះបញ្ចាំងពីការធ្លាក់ចុះនៃអត្រាអតិផរណារបស់ខ្លួន។
ព្រឹត្តិការណ៍នាពេលខាងមុខមួយទៀតដែលនឹងប៉ះពាល់ដល់ចលនាតម្លៃមាសក្នុងសប្តាហ៍នេះ គឺវេទិកាសេដ្ឋកិច្ចពិភពលោក (WEF) ឆ្នាំ២០២៣ ដែលនឹងប្រារព្ធឡើងនៅទីក្រុងដាវ៉ូស នៅថ្ងៃទី១៦ ដល់ថ្ងៃទី២០ ខែមករា។
លោក Tanarat Pasawongse នាយកប្រតិបត្តិនៃក្រុមហ៊ុន Hua Seng Heng Group បានមានប្រសាសន៍ថា វិនិយោគិននឹងតាមដានយ៉ាងដិតដល់លើ វេទិកាសេដ្ឋកិច្ចពិភពលោក (WEF) នៅឆ្នាំ២០២៣នេះ ដែលក្រុមថ្នាក់ដឹកនាំនយោបាយ និងអ្នកធុរកិច្ចឈានមុខគេរបស់ពិភពលោក នឹងអញ្ជើញចូលរួម។
លោកបានបន្ថែមថា ការទប់ទល់អតិផរណា កង្វះថាមពល ដែលជាលទ្ធផលនៃសង្គ្រាមរុស្ស៊ី-អ៊ុយក្រែន និងរលកថ្មីនៃការឆ្លងមេរោគ ខណៈដែលប្រទេសចិនបានបើកដំណើរការឡើងវិញ មុនការរំពឹងទុក ត្រូវបានកំណត់ថា ជាបញ្ហាចម្បង នៅវេទិកាសេដ្ឋកិច្ចពិភពលោកនេះ។
លោក Tanarat បានមានប្រសាសន៍ថា កិច្ចប្រជុំ WEF នឹងស្វែងរកដំណោះស្រាយចំពោះបញ្ហាបច្ចុប្បន្ន និងទិសដៅនៃសេដ្ឋកិច្ចពិភពលោក។ លោកបន្តថា “ការពិភាក្សានឹងណែនាំដល់វិនិយោគិន ក្នុងការសម្រេចចិត្តវិនិយោគ នៅក្នុងទីផ្សារហិរញ្ញវត្ថុ”។
ការទិញមាសនៅប្រទេសចិន ដែលជាប្រទេសប្រើប្រាស់មាសច្រើនជាងគេក្នុងពិភពលោក បានហក់ឡើង មុនថ្ងៃចូលឆ្នាំចិន ព្រោះមាសមានទំនាក់ទំនងនឹងវប្បធម៌ និងប្រពៃណីរបស់ចិន។ ទោះជាយ៉ាងណាក៏ដោយ វិនិយោគិនរំពឹងថា វានឹងចំណាយពេលប្រហែលពី៣ទៅ៤ខែ ដើម្បីធ្វើឱ្យសេដ្ឋកិច្ចចិនងើបឡើងវិញ បន្ទាប់ពីមានការបើកប្រទេសឡើងវិញនាពេលថ្មីៗនេះ៕
