អ្នកធុរកិច្ចកម្ពុជា តួកគីស្វែងរកកិច្ចសហប្រតិបត្តិការនិងពង្រឹងទំនាក់ទំនងកាន់តែស៊ីជម្រៅ

ដោយៈ ម៉ាលីនណា

       ភ្នំពេញៈ រដ្ឋមន្រ្តីក្រសួងពាណិជ្ជកម្មកម្ពុជា លោកប៉ាន សូរស័ក្តិ និង លោកបណ្ឌិត វ៉ាហ៊ីត គីរីស៊ី រដ្ឋមន្រ្តីក្រសួងកសិកម្ម និងរុក្ខាប្រមាញ់តួកគី អញ្ជើញជាអធិបតីចូលរួមក្នុងកិច្ចប្រជុំធុរកិច្ចរវាងកម្ពុជា និងតួកគី។

កាលពីព្រឹកថ្ងៃទី១២ ខែមករា ឆ្នាំ២០២៣ លោកប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មនៃព្រះរាជាណាចក្រកម្ពុជា និងឯកឧត្តមបណ្ឌិត វ៉ាហ៊ីត គីរីស៊ី (Vahit KIRIŞCI) រដ្ឋមន្រ្តីក្រសួងកសិកម្ម និងរុក្ខាប្រមាញ់នៃសាធារណរដ្ឋតួកគី បានអញ្ជើញជាអធិបតីចូលរួម កិច្ចប្រជុំធុរកិច្ចរវាងកម្ពុជា-តួកគី ដែលបានប្រព្រឹត្តទៅនៅសភាពាណិជ្ជកម្មកម្ពុជា និងសហការដឹកនាំដោយ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និង លោក ម៉ាហៀ អើប (Mahir Alp) ប្រធានក្រុមប្រឹក្សាភិបាលធុរកិច្ចកម្ពុជា-តួកគី ព្រមទាំងមានការអញ្ជើញចូលរួមពីថា្នក់ដឹកនាំជាន់ខ្ពស់ ធុរជន វិនិយោគិន និងពាណិជ្ជកររបស់ភាគីទាំងពីរសរុបប្រមាណ ៤០រូប។

លោកប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានថ្លែងអំណរគុណចំពោះការសហការដ៏ប្រពៃ រវាងសភាពាណិជ្ជកម្មកម្ពុជា និងក្រុមប្រឹក្សាភិបាលធុរកិច្ចកម្ពុជា-តួកគី ក្នុងការរៀបចំកិច្ចប្រជុំធុរកិច្ចនេះ ដែលផ្តល់នូវឱកាសជូនវិស័យឯកជននៃប្រទេសទាំងពីរ ឈ្វេងយល់ពីកាលានុវត្តភាពធុរកិច្ច និងវិនិយោគ ដើម្បីចាប់ដៃគូពាណិជ្ជកម្ម ព្រមទាំងពង្រីកកិច្ចសហប្រតិបត្តិការធុរកិច្ច។

ទន្ទឹមនឹងនេះ លោករដ្ឋមន្រ្តី បានជម្រាបជូនអំពីកត្តាសំខាន់ៗ ដែលញ៉ាំងឱ្យកម្ពុជាក្លាយជាទីតាំងដ៏ល្អ សម្រាប់ការធ្វើពាណិជ្ជកម្ម និងវិនិយោគ ដោយក្នុងនោះរួមមាន៖ កំណើនសេដ្ឋកិច្ចខ្ពស់ (រំពឹងកើនប្រមាណ ៦.៦% ឆ្នាំ២០២៣) ភាពធន់នៃសេដ្ឋកិច្ចតាមរយៈអតិរេកស្បៀងបម្រុង និងប្រសិទ្ធភាពគោលនយោបាយ ឆ្លើយតបនឹងវិបត្តិកូវីដ-១៩ ទីតាំងភូមិសាស្រ្តដ៏ទាក់ទាញ, ការស្តារនូវហេដ្ឋារចនាសម្ព័ន្ធរូបវ័ន្ត ជាមួយនឹងច្បាប់វិនិយោគថ្មីដែលផ្តល់ការលើកទឹកចិត្ត និងការគាំពារដ៏សំបូរបែប។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

ជាមួយគ្នានេះដែរ លោកបណ្ឌិត វ៉ាហ៊ីត គីរីស៊ី រដ្ឋមន្រ្តីក្រសួងកសិកម្មនិងរុក្ខាប្រមាញ់តួកគី បានកោតសរសើរចំពោះសន្ទុះ នៃការអភិវឌ្ឍខឿនសេដ្ឋកិច្ច ជាមួយនឹងអត្រាកំណើនខ្ពស់របស់កម្ពុជា និងបានគូសបញ្ជាក់ជាថ្មីអំពីឆន្ទៈ ជំរុញកិច្ចសហប្រតិបត្តិការពាណិជ្ជកម្ម និងវិនិយោគលើគ្រប់វិស័យ ជាពិសេសកសិកម្ម វាយនភណ្ឌ យានយន្ត ថាមពលកកើតឡើងវិញ និងកម្មន្តសាល -ល- ដោយសង្កេតឃើញពីសក្តានុពល ទីផ្សារនាំចេញដ៏សំបូរបែបរបស់កម្ពុជា (រួមមានទីផ្សារអាស៊ាន និងកិច្ចព្រមព្រៀងពាណិជ្ជកម្មសេរីនានា ដែលកម្ពុជាសម្រេចបាន)។

ក្នុងនោះដែរ លោកក៏បានបង្ហាញពីបំណងជំរុញពាណិជ្ជកម្មសេវា ជាពិសេសទេសចរណ៍ និងការសាងសង់ ព្រមទាំងបានជម្រាបពីលទ្ធភាពនៃការបញ្ជូនទីប្រឹក្សាពាណិជ្ជកម្មតួកគីមកប្រចាំកម្ពុជា នាពេលខាងមុខ។

ក្នុងឱកាសនោះផងដែរ អ្នកឧកញ៉ា គិត ម៉េង និង លោក ម៉ាហៀ អើប បានជម្រាបជូនអំពីកាលានុវត្តភាពធុរកិច្ច និងវិនិយោគ ក៏ដូចជាវិស័យ និងអនុវិស័យសំខាន់ៗ ជាមួយនឹងយថាប្រភេទនៃទំនិញ និងសេវាកម្ម ដែលមានសក្តានុពលសម្រាប់កិច្ចសហការ រវាងវិស័យឯកជនរបស់ប្រទេសទាំងពីរ។

អ្នកឧកញ៉ាគិត ម៉េងបានធ្វើបច្ចុប្បន្នភាព នៃពិពិធកម្មទីផ្សារនាំចេញរបស់កម្ពុជា ដែលសម្រេចបានក្នុងក្របខណ្ឌអាស៊ានបូកដៃគូ និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) និងក្របខណ្ឌទ្វេភាគីជាមួយចិន និងកូរ៉េ ព្រមទាំងកំពុងចរចាជាមួយអេមីរ៉ាតអារ៉ាប់រួម ផងដែរ។ ក្នុងន័យនេះ អ្នកឧកញ៉ាបានលើកទឹកចិត្តឱ្យធុរជន និងវិនិយោគិនតួកគីមកធ្វើការវិនិយោគនៅកម្ពុជា ជាពិសេសក្នុងវិស័យកែច្នៃម្ហូបអាហារ ដើម្បីអាចប្រើប្រាស់ពិពិធកម្មទីផ្សារសម្រាប់ការនាំចេញ៕

 

LEAVE A REPLY

Please enter your comment!
Please enter your name here