ដោយ: គង់ លាងហួរ
សេអ៊ូល:ក្រុមហ៊ុនថាមពលពន្លឺព្រះអាទិត្យ របស់កូរ៉េខាងត្បូង Qcells គ្រោងបោះទុនវិនិយោគ ប្រមាណ២,៥ពាន់លានដុល្លារ ដើម្បីពង្រីកសមត្ថភាពផលិតកម្មរបស់ខ្លួន នៅក្នុងរដ្ឋGeorgia នៃសហរដ្ឋអាមេរិក។
សេចក្តីប្រកាសនេះ គឺជាការប្តេជ្ញាចិត្តផលិតកម្មសាជីវកម្ម ដ៏ធំបំផុតមួយ ចាប់តាំងពីមានការអនុម័តច្បាប់កាត់បន្ថយអតិផរណា (IRA) របស់ប្រធានាធិបតីសហរដ្ឋអាមេរិក លោក ចូ បៃដិន ដោយច្បាប់នេះរួមបញ្ចូលនូវការឧបត្ថម្ភធន ជាង៣០០ពាន់លានដុល្លារ ដើម្បីដោះស្រាយការប្រែប្រួលអាកាសធាតុ។
វិធានការលើកទឹកចិត្តមួយចំនួន មានគោលបំណងជំរុញការផលិតក្នុងស្រុក នៃផលិតផលថាមពលស្អាត ដែលបច្ចុប្បន្នត្រូវបានផលិតជាចម្បងនៅក្នុងប្រទេសចិនដូចជា បន្ទះសូឡា និងបន្ទះក្តារជាដើម។
យោងតាមសេចក្តីថ្លែងការណ៍មួយ បានឱ្យដឹង ក្រុមហ៊ុនQcells បានបញ្ជាក់ថា ខ្លួននឹងពង្រីករោងចក្រផលិតបន្ទះ ស្រូបពន្លឺព្រះអាទិត្យ ដែលមានស្រាប់ នៅក្នុងទីក្រុង Dalton នៃរដ្ឋ Georgia និងបើករោងចក្រថ្មីទីពីរនៅ ក្នុងទីក្រុង Cartersville ។
រោងចក្រថ្មីនេះ នឹងផលិតធាតុផ្សំនៃបន្ទះស្រូបពន្លឺព្រះអាទិត្យ រួមទាំងសារធាតុស៊ីលីកុន បន្ទះសៀគ្វី និងកោសិកា ក៏ដូចជាម៉ូឌុលខ្លួនឯងផងដែរ។
បច្ចុប្បន្ននេះ បន្ទះស្រូបពន្លឺព្រះអាទិត្យភាគច្រើន ដែលបានដំឡើងនៅសហរដ្ឋអាមេរិក បានប្រើប្រាស់សមាសធាតុ ដែលផលិតនៅតំបន់អាស៊ី។
ក្រុមហ៊ុន Qcells បានអះអាងថា ខ្លួនក៏នឹងពង្រីកប្រតិបត្តិការដំឡើងបន្ទះស្រូបពន្លឺព្រះអាទិត្យ ដែលមានស្រាប់ នៅក្នុងទីក្រុងDalton ចំនួន២ជីហ្គាវ៉ាត់ ក្នុងមួយឆ្នាំ រហូតដល់៥,១ជីហ្គាវ៉ាត់នៅឆ្នាំ២០២៣នេះ៕