ដោយ: គង់ លាងហួរ
អន្តរជាតិ: រដ្ឋមន្ត្រីឧស្សាហកម្ម លោក Suriya Jungrungreangkit បានសម្តែងសុទិដ្ឋិនិយមថា ប្ររទេសនេះនឹងអាចទាក់ទាញទុនវិនិយោគប្រមាណ២៩៩ពាន់លានដុល្លារ ពីវិនិយោគិនជប៉ុន ក្នុងកម្មវិធីរ៉ូដសូ ដើម្បីលើកកម្ពស់កំណើនរថយន្តអគ្គិសនី និងឧស្សាហកម្មអេឡិចត្រូនិកឆ្លាតវៃនៅក្នុងប្រទេសថៃ។
រថយន្ត EV និងផលិតផលអេឡិចត្រូនិកឆ្លាតវៃ គឺជាឧស្សាហកម្មគោលដៅដែលត្រូវបានផ្សព្វផ្សាយដោយរដ្ឋាភិបាល។
នាយកដ្ឋានលើកកម្ពស់ផ្នែក ឧស្សាហកម្មរបស់ក្រសួង គ្រោងនឹងចុះហត្ថលេខាលើអនុស្សរណៈនៃការយោគយល់គ្នា ជាមួយខេត្តIshikawa នៃប្រទេសជប៉ុន ដើម្បីបង្កើតទំនាក់ទំនងអាជីវកម្ម រវាងសហគ្រាសធុនតូច និងមធ្យមថៃ (SMEs) និងវិនិយោគិន។
មន្ត្រីលើកកម្ពស់ផ្នែកឧស្សាហកម្ម គ្រោងជួយគាំទ្រដល់បណ្តាអាជីវកម្មក្នុងស្រុក ជាពិសេស សហគ្រាសធុនតូច និងមធ្យម ដែលដើរតួនាទីយ៉ាងសំខាន់ ក្នុងការរួមចំណែកដល់សេដ្ឋកិច្ចជាតិ។
នៅក្នុងដំណើរទស្សនកិច្ចរយៈពេល៥ថ្ងៃ ក្រសួងឧស្សាហកម្មថៃ គ្រោងនឹងជួបលោក Hagiuda Koichi រដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន ដើម្បីពិភាក្សាអំពីឱកាសវិនិយោគរបស់ជប៉ុននៅក្នុងប្រទេសថៃ។
លោក Suriya បានមានប្រសាសន៍ថា រដ្ឋាភិបាលគ្រោងអញ្ជើញវិនិយោគិនជប៉ុន មកបណ្តាក់ទុននៅក្នុងប្រទេសថៃ ដែលជាបណ្តុំឧស្សាហកម្ម S-curve នៅក្នុងច្រករបៀងសេដ្ឋកិច្ចភាគខាងកើត (EEC)៕
