ដោយ៖ សុផារី
ភ្នំពេញ៖ ទីផ្សារធានារ៉ាប់រងកម្ពុជា បាននិងកំពុងមានកំណើនឆាប់រស័ស ប្រមាណ២០ភាគរយ រយៈពេល៥ឆ្នាំចុងក្រោយនេះ ទោះប្រឈមជំងឺកូវីដ-១៩ក្តី ទីផ្សារធានារ៉ាប់រងកម្ពុជា បន្តរក្សាកំណើនប្រមាណ១០ភាគរយ ធៀបនឹងឆ្នាំ២០២០។
នេះជាការលើកឡើងរបស់លោក ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា នៅក្នុងពិធីចែករំលែកចំណេះដឹងដល់អ្នកសារព័ត៌មាន អំពីកិច្ចដំណើរការទីផ្សារធានារ៉ាប់រងនៅកម្ពុជា ថ្ងៃទី ១៥ ខែ កក្កដា។
លោកបន្តថា បុព្វលាភធានារ៉ាប់រងដុលកើនឡើងដល់ប្រមាណ៣០០លានដុល្លារក្នុងឆ្នាំ២០២១។ អត្រាភាគទានធានារ៉ាប់រងក្នុងសេដ្ឋកិច្ចកម្ពុជា មានតែ១,១១ភាគរយ និងការប្រើប្រាស់សេវាធានារ៉ាប់រង ជាដង់ស៊ីតេធានារ៉ាប់រង មានតែ១៨,៧៥ដុល្លារ សម្រាប់មនុស្សម្នាក់ ដែលតួលេខនេះ ទាបជាងបណ្តាប្រទេសនានាក្នុងតំបន់ និងសកលលោក។
អគ្គនាយកនៃនិយ័តករធានារ៉ាប់រងកម្ពុជា បានលើកឡើងថា ទីផ្សារធានារ៉ាប់រងនៅកម្ពុជា នៅមានសក្តានុពលធំធេងសម្រាប់ការរីកចម្រើននៅពេលអនាគត។
ប្រធានសមាគមធានារ៉ាប់រងកម្ពុជា លោក ហ៊ុយ វ៉ាថារ៉ូ បានលើកឡើងថា បច្ចុប្បន្នមានក្រុមហ៊ុនធានារ៉ាប់រងប្រមាណ ៣៨ក្រុមហ៊ុន កំពុងធ្វើអាជីវកម្មនៅកម្ពុជា។ លោកបានឱ្យដឹងថា ”ទីផ្សារធានារ៉ាប់រងយើងនៅមានទំហំតូចនៅឡើយ មានន័យថា ប្រជាពលរដ្ឋកម្ពុជា ជាច្រើន ពុំមានធានារ៉ាប់រង ដើម្បីការពារស្ថានភាពហិរញ្ញវត្ថុ ដែលប៉ះពាល់ដោយការកើតឡើងនូវហានិភ័យផ្សេងៗនោះទេ”។
លោកបន្តថា ដើម្បីដោះស្រាយបញ្ហាចំពោះមុខ ក្នុងការលើកកម្ពស់ ចំណេះដឹងសាធារណៈអំពីធានារ៉ាប់រង និយ័តករធានារ៉ាប់កម្ពុជា និងសមាគមធារ៉ាប់រងកម្ពុជា បាននិងកំពុងអនុវត្តនូវសកម្មភាពជាកស្តែងជាច្រើន ក្នុងការអប់រំ និងផ្សព្វផ្សាយដល់សាធារណជន អំពីគោលការណ៍គ្រឹះធានារ៉ាប់រង ក៏ដូចជាស្ថានភាពទូទៅនៃតីផ្សារធានារ៉ាប់រងនៅកម្ពុជា។
លោក ហ៊ុយ វ៉ាថារ៉ូ បានសង្កត់ធ្ងន់ថា សារសំខាន់នៃធានារ៉ាប់រង ត្រូវបានទទួលស្គាល់ជាទូទៅ ជាពិសេសនៅក្នុងបណ្តាប្រទេសដែលមានសេដ្ឋកិច្ចជឿនលឿន ដោយសារវាជាសំណាញ់សុវត្ថិភាពហិរញ្ញវត្ថុ ដែលអាចជួយដល់សាធារណជន រួចផុតពីទុក្ខលំបាកផ្នែកហិរញ្ញវត្ថុ នៅពេលមានគ្រោះអកុសលកើតឡើង គ្រោះថ្នាក់ដល់ជីវិត អគ្គិភ័យ និងគ្រោះថ្នាក់ចរាចរណ៍ជាដើម៕