ដោយៈសុផារី
ភ្នំពេញៈ វិស័យធានារ៉ាប់រងរបស់កម្ពុជា បានរាយការណ៍អំពីបុព្វលាភសរុបចំនួន២៩៣,៤លានដុល្លារ ក្នុងឆ្នាំ២០២១ កើនឡើង៩,៥ភាគរយ បើប្រៀបនិងឆ្នាំមុន បើទោះបីជាមានការធ្លាក់ចុះផ្នែកសេដ្ឋកិច្ច ពីជំងឺរាតត្បាតកូវីដ-១៩ក៏ដោយ។
នេះបើយោងតាមរបាយការណ៍ របស់និយតករធានារ៉ាប់រងកម្ពុជា (IRC) កាលពីសប្តាហ៍កន្លងមកបានឱ្យដឹងថា កំណើននេះត្រូវបានគាំទ្រដោយក្រុមហ៊ុនធានារ៉ាប់រងទូទៅចំនួន១៨ ក្រុមហ៊ុនធានារ៉ាប់រងអាយុជីវិតចំនួន១៤ ក្រុមហ៊ុនធានារ៉ាប់រងខ្នាតតូចចំនួន៧ និងក្រុមហ៊ុនធានារ៉ាប់រងបន្តចំនួនមួយ។
របាយការណ៍បានបន្ថែមថា បុព្វលាភធានារ៉ាប់រងសរុប នៃទីផ្សារធានារ៉ាប់រងទូទៅក្នុងឆ្នាំ២០២១ គឺបានជិត១២៣លានដុល្លារ កើនឡើង៧,៤ ភាគរយ ធៀបនឹងឆ្នាំ២០២០ ខណៈដែលបុព្វលាភធានារ៉ាប់រងអាយុជីវិតសរុបមានចំនួន១៧០,៤លានដុល្លារ កើនឡើង១១ភាគរយ។
អគ្គនាយកនិយតករធានារ៉ាប់រងកម្ពុជា លោកប៊ូ ច័ន្ទភីរូ បានមានប្រសាសន៍ នៅក្នុងសិក្ខាសាលាផ្សព្វផ្សាយស្តីពី អនុក្រឹត្យស្តីពីការធានារ៉ាប់រងកាលពីថ្ងៃសុក្រថា ឧស្សាហកម្មធានារ៉ាប់រងបាន និងកំពុងដើរតួនាទីយ៉ាងសំខាន់ក្នុងការគាំទ្រវិស័យសង្គម និងសេដ្ឋកិច្ច។
លោកបានបន្តថា “ជាមួយនឹងស្ថិរភាពនយោបាយ និងកំណើនសេដ្ឋកិច្ចវិជ្ជមានរបស់ប្រទេសកម្ពុជា ក្រោមការដឹកនាំរបស់សម្តេចនាយករដ្ឋមន្ត្រី ហ៊ុន សែន ទីផ្សារធានារ៉ាប់រងបាន និងកំពុងកើនឡើងយ៉ាងឆាប់រហ័ស”។
លោក ប៊ូ ច័ន្ទភីរូ បានមានប្រសាសន៍ថា ឧស្សាហកម្មធានារ៉ាប់រងបានរួមចំណែកប្រហែល១,១ភាគរយ ដល់ផលិតផលក្នុងស្រុកសរុប (GDP) របស់កម្ពុជា។
យោងតាមនិយតករធានារ៉ាប់រងកម្ពុជា ការជ្រៀតចូលនៃការធានារ៉ាប់រង របស់ប្រទេសមាន១,១ភាគរយកាលពីឆ្នាំមុន កើនឡើងបន្តិចពី ១,០៤ភាគរយកាលពីឆ្នាំមុន ខណៈដែលដង់ស៊ីតេធានារ៉ាប់រង មានចំនួន ១៧,៥ដុល្លារក្នុងមនុស្សម្នាក់ កើនឡើងពី១៦,៣ដុល្លារ៕
