ដោយ៖ ម៉ាណេត
ភ្នំពេញ៖ ក្រុមហ៊ុនធានារ៉ាប់រង TQM កំពុងពិភាក្សារកការរួមបញ្ចូលគ្នា និងការទិញយកជាមួយក្រុមហ៊ុនធានារ៉ាប់រងនៅកម្ពុជា និងឡាវ។ នេះបើយោងតាមការលើកឡើងរបស់លោកស្រី Unchalin Punnipa ប្រធានក្រុមប្រឹក្សាភិបាលក្រុមហ៊ុន។
លោកស្រីបានបន្ថែមថា កិច្ចព្រមព្រៀងនេះត្រូវបានរំពឹងថានឹងបញ្ចប់ក្នុងឆ្នាំនេះ។ ទោះបីជាយ៉ាងណា លោកស្រីមិនបានបង្ហាញពីឈ្មោះក្រុមហ៊ុន ក្រុមហ៊ុនរបស់លោកស្រីនឹងចុះកិច្ចព្រមព្រៀងជាមួយនោះទេ។
ក្រុមហ៊ុននេះក៏កំពុងពិភាក្សាសម្រាប់កិច្ចព្រមព្រៀង M&A ស្រដៀងគ្នាជាមួយក្រុមហ៊ុនចំនួនពីរនៅប្រទេសថៃផងដែរ។
នៅរយៈពេលប៉ុន្មានខែដើមឆ្នាំដំបូងៗ ក្នុងពេលកូវីដ១៩ ចាប់ផ្ដើមរកឃើញជាបន្តបន្ទាប់នៅកម្ពុជា ការលក់ធានារ៉ាប់រងទៅលើសំណង និងការសាងសង់នានាគឺនៅមានកំណើនតិចតួច និងមានការទិញពីសំណាក់វិនិយោគជាហូរហែរ ព្រោះវាជាគម្រោងផែនការរបស់គេតាំងពីចុងឆ្នាំ ២០១៩ តែរហូតដល់អំឡុងខែឧសភា និងខែមិថុនា ហាក់ដូចជាអត់មានកំណើន ហើយក៏បានបង្ហាញពីឥទ្ធិពលនៃកូវីដ១៩ មកលើធានារ៉ាប់រងផងដែរ ហើយវានឹងបន្តជះឥទ្ធិពលថែមទៀត នៅក្នុងរយៈពេល៦ខែចុងក្រោយ ។
លោកយក់ ចំរើនឬទ្ធិ អគ្គនាយកក្រុមហ៊ុនធានារ៉ាប់រងអាយុជីវិត Forte និងជាអ្នកដែលមានបទពិសោធន៍ លើវិស័យជាង២ទសវត្សរ៍មកហើយនោះ បាននិយាយក្នុងកិច្ចសម្ភាសន៍ជាមួយទូរទស្សន៍ក្នុងស្រុកមួយថា វិស័យធានារ៉ាប់រងជាវិស័យធំមួយ និងជាសំណាញ់ធំមួយ សម្រាប់សុវត្ថិភាពសេដ្ឋកិច្ចពិភពលោក ក៏ដូចជាកំនាស់សេដ្ឋកិច្ចពិភពលោកផងដែរ ។
លោកថា “ការរកស៊ីទាំងអស់ទាំងមុខរបរឯកជន ឬក្រុមហ៊ុនធំៗ គឺត្រូវការធានារ៉ាប់រងដើម្បីផ្ដល់សុវត្ថិភាពហិរញ្ញវត្ថុជូនពួកគាត់។ ចំណែកកំនាស់សេដ្ឋកិច្ច បានន័យថា ធានារ៉ាប់រងមានទុនបម្រុងសល់ច្រើន ដែលទុនបម្រុងទាំងនោះគឺសល់ជាប្រចាំ ហើយទុនបម្រុងនោះ ត្រូវចាក់ចូលក្នុងប្រព័ន្ធសេដ្ឋកិច្ចវិញ ដែលអាចជំរុញចរន្តសេដ្ឋកិច្ចអោយវិលចុះឡើង” ៕
