ដោយៈ សាវុធ
ភ្នំពេញៈ នៅក្នុងរបត់សង្គមទូទៅមិនថា នៅក្រៅប្រទេសឬក្នុងប្រទេសកម្ពុជាក៏ដោយ ជំនាញរឹងត្រូវបានគេចាត់ទុក ជាមូលដ្ឋានគ្រឹះនៃចំណេះដឹង យ៉ាងណាមិញជំនាញទន់ក៏មានសារៈសំខាន់ណាស់ដែរ ជាពិសេសសម្រាប់ទំនាក់ទំនងប្រចាំថ្ងៃ។
ថ្ងៃនេះ យើងនឹងបង្ហាញអ្នកពីជំនាញទន់ទាំង៣ ដែលអ្នកចាំបាច់ត្រូវចេះ ដើម្បីការប្រាស្រយ័ទាក់ទងល្អក្នុងជីវិត៖
ទី១) ជំនាញទំនាក់ទំនង
ជំនាញមួយនេះសំខាន់ណាស់មិនថា ក្នុងរបត់កាលៈទេសៈបែបណានោះទេ សូម្បីតែមុខរបររកស៊ី កន្លែងការងារ សាលារៀនក៏ដោយ។ អ្នកដែលមានទំនាក់ទំនងល្អជាមួយអ្នកដទៃរមែងជាអ្នកដឹកនាំល្អម្នាក់ ព្រមទាំងជាទីចូលចិត្តសម្រាប់មនុស្សទូទៅ ព្រោះពួកគាត់យល់ដឹងពីគន្លឹះ ក្នុងការប្រាស្រយ័ទាក់ទងជាមួយមនុស្សគ្រប់ស្រទាប់ និងគ្រប់ប្រភេទ។
មនុស្សជោគជ័យភាគច្រើន សុទ្ឋតែមានជំនាញទំនាក់ទំនង ពូកែទំនាក់ទំនងជាមួយមនុស្ស។
ទី២) ស្ដាប់
ស្ដាប់នេះ មិនមែនសំដៅទៅលើមុខវិជ្ជាជំនាញរឹង ដែលប្រើសោតវិញ្ញាណដើម្បីប្រលងយកពិន្ទុនោះទេ គឺសម្ដៅទៅលើបុគ្គល ដែលចូលចិត្តស្ដាប់ច្រើនជាងនិយាយ។ ដូចពាក្យចាស់បុរាណខ្មែរតែងពោលថា ចូរស្ដាប់ឲ្យបានច្រើនជាងនិយាយ។
មានន័យថា ពេលដែលយើងស្ដាប់ច្រើន យើងអាចមានពេលយកសម្ដីគេមកគិតនិងវាយតម្លៃ ព្រមទាំងជួយជៀសវាងការមានកំហុស ឬមន្ទិលសង្សយ័នានា។ ការស្ដាប់ច្រើនជាងនិយាយ គឺជាការគោរពមួយចំពោះអ្នកដទៃ ដោយបង្ហាញថាអ្នកចាប់អារម្មណ៌និងឲ្យតម្លៃទៅលើកិច្ចពិភាក្សាឬការសន្ទនា។
ទី៣) ការបង្កើតថ្មី
ជាធម្មតាប្រជាជននៅក្នុងសង្គមខ្មែរភាគច្រើន មានភាពអៀនប្រៀន ក្នុងការបញ្ចេញមតិយោបល់ឬគំនិតថ្មីៗ ព្រោះខ្លាចត្រូវគេសើចចំអក។ គំនិតអវិជ្ជមានទាំងនេះ គួរណាតែកែលម្អចេញ ហើយអ្នកត្រូវក្លាហានហ៊ានបញ្ចេញគំនិតថ្មី ប្លែករបស់ខ្លួនទៅកាន់អ្នកដទៃ។
សូមកុំគិតថា គំនិតរបស់អ្នកឆ្កួតៗ ចាកប្រធាន ឬ នឹងត្រូវគេសើចចម្អក ថាមិនត្រូវគំនិតបង្កើតថ្មីរបស់អ្នក អាចជួយក្រុមហ៊ុនរបស់អ្នក ឲ្យកាន់តែរីកចម្រើនផងក៏ថាបាន។ មនុស្សដែលមានការបង្កើតថ្មី និងចូលចិត្តគិតអ្វីក្រៅប្រអប់ មានសារៈសំខាន់ណាស់សម្រាប់ភារៈកិច្ចការងារទូទៅ៕ Spean៕
