ដោយៈ ម៉ាណេត
ភ្នំពេញៈ បើទោះបីវិបត្តិកូវីដ១៩ បង្កផលប៉ះពាល់ដល់សេដ្ឋកិច្ចពិភពលោកក៏ ក៏ធនាគារ ដែលកំពុងផ្តល់ឥណទានរាប់ពាន់លានដុល្លារ នៅតែជាកម្លាំងចលករមួយដ៏សំខាន់ ក្នុងការជំរុញកំណើនវិស័យសំណង់ និងអចលនទ្រព្យ ដែលកំពុងមានការរីកចម្រើនខ្លាំង ក្នុងរយៈពេលមួយទសវត្សរ៍ចុងក្រោយនេះ។
លោកប៉ូ អ៊ាវគង់ អគ្គនាយក និងជាស្ថាបនិកក្រុមហ៊ុន Advance Real Estate Co,. Ltd បានថ្លែងប្រាប់កាលពីពេលថ្មីៗនេះថា ធនាគារពិតជាដើរតួនាទីសំខាន់ណាស់ ក្នុងការជំរុញវិស័យសំណង់ និងអចលនទ្រព្យនៅកម្ពុជា ព្រោះអ្នកទិញលំនៅឋានបច្ចុប្បន្នភាគច្រើនប្រើប្រាស់ឥណទានរបស់ធនាគារនានា។
លោកបានបន្តថា “អ្នកខ្លះបានប្រើប្រាស់ការបង់រំលស់ តាមរយៈក្រុមហ៊ុន និងខ្លះទៀត បានប្រើប្រាស់ឥណទានរបស់ធនាគារ” ។ លោកបន្តថា “អ្នកប្រើប្រាស់ឥណទានធនាគារភាគច្រើនជាប្រជាជនវ័យក្មេង ដែលទើបរៀបការហើយបែកពីគ្រួសារ មករស់នៅជាមួយប្តី ប្រពន្ធរបស់ពួកគេ” ។
ប៉ុន្តែសម្រាប់មនុស្សវ័យចំណាស់ មិនសូវប្រើប្រាស់ឥណទានរបស់ធនាគារនោះទេ ពួកគេតែងតែប្រើប្រាស់សាច់ប្រាក់សុទ្ធ ដើម្បីទិញលំនៅឋានសម្រាប់រស់នៅក៏ដូចជាទិញលំនៅឋានសម្រាប់កូនរបស់ពួកគេ។
សមតុល្យឥណទានលក្ខណៈបុគ្គលចំនួន ៩,៧៦ពាន់លានដុល្លារ គិតត្រឹមត្រីមាសទី៤ ឆ្នាំ២០២០ ដែលក្នុងនោះកម្ចីអចលនទ្រព្យ មានលើសពីពាក់កណ្តាល នៃសមតុល្យឥណទានលក្ខណៈបុគ្គលសរុប៥២% ។ ចំណែកឯសមតុល្យឥណទានហិរញ្ញវត្ថុផ្ទាល់ខ្លួនមានចំណែក៤៧,៤% ។ នេះបើយោងតាមការរបាយការណ៍របស់ក្រុមហ៊ុនក្រេឌីត ប្យួរ៉ូ ខេមបូឌា ខូ អិលធីឌី (CBC) ។
លោកជា ចាន់តូ ទេសាភិបាលធនាគារជាតិនៃកម្ពុជា (NBC) ធ្លាប់លើកកាលពីដើមឆ្នាំនេះថា វិស័យធនាគារមានស្ថិរភាពរឹងមាំ និងបានចូលរួមយ៉ាងសកម្ម ក្នុងការគាំទ្រសកម្មភាពសេដ្ឋកិច្ច និងកាត់បន្ថយផលប៉ះពាល់នៃវិបត្តិ មកលើអាជីវកម្មនិងប្រជាជនក្រីក្រ ស្របតាមគោលនយោបាយរបស់រាជរដ្ឋាភិបាល។
លោកបានថ្លែងថា “សេដ្ឋកិច្ចកម្ពុជាក្នុងឆ្នាំកន្លងទៅ បានទទួលរងការធ្លាក់ចុះអវិជ្ជមានជាលើកដំបូង ក្នុងរយ:ពេលជាង២ទសវត្សរ៍ចុងក្រោយ ដែលជាចម្បងដោយសារ ការធ្លាក់ចុះវិស័យទេសចរណ៍ ការនាំចេញផលិតផលកាត់ដេរ និងវិស័យសំណង់” ។ លោកបន្តថា “ទោះស្ថិតក្នុងស្ថានភាពនៃវិបត្តិជំងឺកូវីដ-១៩ វិស័យធនាគារមានស្ថិរភាពរឹងមាំ និងបានចូលរួមយ៉ាងសកម្ម ក្នុងការគាំទ្រសកម្មភាពសេដ្ឋកិច្ច និងកាត់បន្ថយផលប៉ះពាល់នៃវិបត្តិមកលើអាជីវកម្ម និងប្រជាជនក្រីក្រ ស្របតាមគោលនយោបាយរបស់រដ្ឋាភិបាល” ៕