ដោយៈ សាវុធ
ភ្នំពេញៈ មនុស្សម្នាក់ៗតែងប្រាថ្នាចង់ទទួលបានជោគជ័យ ក្នុងអាជីពរបស់ខ្លួន ហើយជាការពិត គេមិនអាចធ្វើការតែមួយកន្លែងអស់មួយជីវិតបានទេ ដោយពួកគេត្រូវផ្លាស់ប្តូរពីអាជីពមួយ ទៅអាជីពមួយទៀតនៅពេលណាមួយជាចាំបាច់។
ភាពជោគជ័យ ក្នុងអាជីពអាស្រ័យលើកត្តាច្រើនយ៉ាង តែកត្តាដែលសំខាន់ជាងគេ គឺការចេះត្រៀមលក្ខណៈ និងអភិវឌ្ឍន៍ខ្លួនឯងឲ្យស្របតាមបរិការសង្គមបច្ចុប្បន្ន។
គន្លឹះមួយចំនួនខាងក្រោម អាចជាជំនួយស្មារតី ក្នុងការបង្កើនភាពជោគជ័យក្នុងអាជីពរបស់អ្នក ដូចជា ទី១ យកចិត្តទុកដាក់សរសេរប្រវត្តិរូបរបស់អ្នក (CV) ឲ្យត្រូវតាមបទពិសោធន៍ ជាពិសេសស្នាដៃទាំងឡាយ ដែលអ្នកសម្រេចបានរហូតមកដល់បច្ចុប្បន្ន។ ប្រៀបធៀបលក្ខណៈសម្បត្តិដែលអ្នកមាន ជាមួយនឹងតម្រូវការទីផ្សារបច្ចុប្បន្ន តើមានអ្វីខ្លះ ដែលអ្នកត្រូវបំពេញបន្ថែម ឬចំនុចណាខ្លះអ្នកមានគុណសម្បត្តិពិសេស ជាងមនុស្សទូទៅ។
ទី២ រឹតចំណងទាក់ទងជាមួយ ជនមានឥទ្ធិពលក្នុងអង្គភាព។ អ្នកគួរចំណាយពេលប្រាស្រ័យទាក់ទង ឲ្យបានកាន់តែជិតស្និទ្ធជាមួយពួកគេ។ នេះជាគន្លឹះដ៏សំខាន់ដែលអាចឲ្យអ្នក ឈានទៅកាន់មុខតំណែងខ្ពស់ជាងមុន ព្រោះបើមានមុខតំណែងណាទំនេរ ពួកគេមុខតែនឹងគិតដល់អ្នកមុនគេ។
ទី៣ ឧស្សាហ៍ប្រាស្រ័យទាក់ទង និងស្គាល់មនុស្សថ្មីៗខាងក្រៅ អង្គភាពយ៉ាងហោចណាស់ឲ្យបានមួយ ទៅបីនាក់ក្នុងមួយខែ។ នៅពេលទំនាក់ទំនងមានភាពជិតស្និទ្ធហើយអ្នកអាចសុំរាប់អានមិត្តភក្តិ ឬអ្នកផ្សេងទៀតដែលពួកគេស្គាល់បន្ថែមទៀត។
ទី៤ ចូលរួមកម្មវិធីផ្សេងៗក្នុងវិស័យរបស់អ្នក រួចនាំយកព័ត៌មានមកចែករំលែកជាមួយសហការី។ ទី៥ ធ្វើខ្លួនឲ្យសក្តិសមជាអ្នកមានវិជ្ជាជីវៈ។ ចូរយកចិត្តទុកដាក់លើ សម្លៀក បំពាក់ គ្រឿងតុបតែង … ។ល។ លៃយ៉ាងណាឲ្យមើលទៅឃើញថា អ្នកជាបុគ្គលដ៏គួរឲ្យទុកចិត្ត និងជាអ្នកអាជីព។
ទី៦ អភិវឌ្ឍន៍ខ្លួនឯងជាប្រចាំ ជាពិសេសជំនាញទំនាក់ទំនង និងចិត្តសាស្ត្រមនុស្សនិងចំណុចទី៧ ត្រួតពិនិត្យមើលការរីកចម្រើនរបស់ខ្លួនជាប្រចាំ៕