ដោយៈ ម៉ាណេត
ភ្នំពេញៈ ធនាគារជាតិនៃកម្ពុជា (NBC) បានដាក់សេចក្តីសម្រេចបន្តរក្សាអត្រាប្រាក់បម្រុងកាតព្វកិច្ចក្នុងអត្រា៧% ទាំងប្រាក់រៀល និងដុល្លារអាមេរិក រហូតដល់ចុងឆមាសទី១ ឆ្នាំ២០២១ ដើម្បីផ្តល់លទ្ធភាពដល់គ្រឹះស្ថានហិរញ្ញវត្ថុ និងធនាគារមានមូលនិធិច្រើន ក្នុងការបញ្ចេញកម្ចី និងជំរុញសកម្មភាពសេដ្ឋកិច្ច។
សេចក្តីសម្រេចនេះ ត្រូវបានឡើង ដោយធនាគារជាតិនៃកម្ពុជា បន្ទាប់កិច្ចប្រជុំគណៈកម្មាធិការគោលនយោបាយ រូបិយវត្ថុលើកទី៥៤ ។ នេះបើយោងតាមសេចប្រកាសព័ត៌មានរបស់ NBC ចេញផ្សាយកាលពីថ្មីៗនេះ។
អង្គប្រជុំបានពិភាក្សាលើបច្ចុប្បន្នភាព នៃស្ថានភាពសេដ្ឋកិច្ចពិភពលោក វឌ្ឍនភាព និងបញ្ហាប្រឈម នៃស្ថិរភាពម៉ាក្រូសេដ្ឋកិច្ច និងហិរញ្ញវត្ថុកម្ពុជា ព្រមទាំងគោលនយោបាយរូបិយវត្ថុសម្រាប់អនុវត្តនាគ្រាខាងមុខ។
ដើម្បីរួមចំណែករក្សាស្ថិរភាពថ្លៃ និងលើកកម្ពស់ប្រសិទ្ធភាពគោលនយោបាយរូបិយវត្ថុសម្រាប់ ត្រីមាសបន្ទាប់ គណៈកម្មាធិការ គោលនយោបាយរូបិយវត្ថុ បានសម្រេច បន្តរក្សាអត្រាប្រាក់បម្រុងកាតព្វកិច្ច ក្នុងអត្រា៧%ទាំងប្រាក់រៀល និងដុល្លារអាមេរិក រហូតដល់ចុងឆមាសទី១ ឆ្នាំ២០២១ និងតាមការចាំបាច់។
អត្រាប្រាក់បម្រុងកាតព្វកិច្ចរបស់គ្រឹះស្ថានធនាគារ និងហិរញ្ញវត្ថុតម្រូវឱ្យរក្សាទុកពី៨ភាគរយ ចំពោះប្រាក់រៀល និង១២.៥ភាគរយចំពោះរូបិយប័ណ្ណបរទេសនៅក្នុងធនាគារជាតិនៃកម្ពុជា។ ប៉ុន្តែដោយសារផ្ទុះឡើងនៃជំងឺរាតត្បាត COVID-19 ធនាគារជាតិបន្ថយមកត្រឹម៧ភាគរយទាំងចំពោះប្រាក់រៀល និងរូបិយប័ណ្ណបរទេស ក្នុងរយៈពេល៦ខែចាប់ពីខែមេសា ឆ្នាំ២០២០ ។
ប្រាក់បម្រុងកាតព្វកិច្ច ជាឧបករណ៍គោលនយោបាយរូបិយវត្ថុមួយ ដែលធនាគារជាតិនៃកម្ពុជាប្រើ ដើម្បីគ្រប់គ្រងល្បឿនកំណើនឥណទាន។ បច្ចុប្បន្នអត្រាប្រាក់បម្រុងកាតព្វកិច្ចសម្រាប់រូបិយប័ណ្ណបរទេស (ជាពិសេស ប្រាក់ដុល្លារអាមេរិក) និងរូបិយវត្ថុជាតិ ត្រូវបានកំណត់ផ្សេងគ្នា។
អត្រាប្រាក់បម្រុងកាតព្វកិច្ច សម្រាប់រូបិយបណ្ណបរទេស និងរូបិយវត្ថុជាតិ ត្រូវបានកំណត់ក្នុងអត្រា១២,៥% និង ៨% រៀងគ្នា។ ចំពោះប្រាក់បម្រុងកាតព្វកិច្ចជារូបិយប័ណ្ណបរទេសចំនួន១២,៥% ក្នុងនោះ ៤,៥% ត្រូវបានផ្តល់ការប្រាក់ដោយធនាគារជាតិ នៃកម្ពុជា និង៨%បន្ថែមទៀត មិនត្រូវបានផ្តល់ការប្រាក់ទេ។ ចំពោះប្រាក់បម្រុងកាតព្វកិច្ចជារៀល ក៏មិនត្រូវបានផ្តល់ការប្រាក់ដែរ៕
