ដោយ៖ ម៉ាណេត
ភ្នំពេញ៖ បើទោះពីជាវិស័យសំណង់ធ្លាក់ចុះក្នុងឆ្នាំ២០២០ ធនាគារជាតិនៃកម្ពុជា បានព្យាករថា សម្រាប់ឆ្នាំនេះ វិស័យសំណង់ និងអចលនទ្រព្យនៅកម្ពុជា នឹងមានកំណើនវិជ្ជមានមកវិញក្នុងអត្រា៣ភាគរយ ដោយផ្អែកលើតាមគម្រោង ដែលបានសុំការអនុញ្ញាតកន្លងមក នឹងការរំពឹងនៃការងើបមកវិញនៃរំហូរវិនិយោគក្នុងវិស័យនេះ។
ក្នុងឆ្នាំ២០២០ វិបត្តិបានឱ្យវិស័យសំណង់ ធ្លាក់ចុះ -៣ភាគរយ (ប៉ាន់ស្មាន) ជាចម្បង ដោយសារការថយចុះនៃសកម្មភាព វិនិយោគក្នុងស្រុក និងលំហូរទុនវិនិយោគផ្ទាល់បរទេស។ ការថយចុះនេះត្រូវបានឆ្លុះបញ្ចាំងតាមរយៈ សូចនាករសំខាន់ៗ ដូចជា ការថយចុះនៃចំនួនគម្រោង តម្លៃនិងផ្ទៃក្រឡាសំណង់ដែលបានស្នើ និង ការនាំចូលសម្ភារនិងបរិក្ខារសំណង់។
កំណើនចំនួនគម្រោង តម្លៃ និងផ្ទៃក្រឡាគម្រោងសំណង់បាន ធ្លាក់ចុះ -០,៥ភាគរយ -២៥ភាគរយ និង-១៧ភាគរយ រៀងគ្នា ជាពិសេសលើប្រភេទផ្ទៃក្រឡាគម្រោងសំណង់ទេសចរណ៍ ( ធ្លាក់ចុះ -៥៥,២ភាគរយ) និងឧស្សាហកម្ម (-៣១ភាគរយ)។
ទន្ទឹមនេះ ការនាំចូលសម្ភារនិងបរិក្ខារសំណង់ គិតជាតម្លៃ បានធ្លាក់ចុះ -១០,៨ភាគរយ (ប៉ាន់ស្មាន) ដែលឆ្លុះបញ្ចាំង ពីការថមថយសកម្មភាពសាងសង់ ដោយសារការផ្អាកឬព្យួរគម្រោងមួយចំនួន ក្នុងអំឡុងពេលនៃការរីករាលដាលនៃជំងឺកូវីដ-១៩ ។
ទោះជាយ៉ាងនេះក្តី យោងតាមការព្យាករណ៍របស់ធនាគារជាតិនៃកម្ពុជាបានឱ្យដឹងថា “ផ្អែកលើតាមគម្រោង ដែលបានសុំការអនុញ្ញាតកន្លងមក និងការរំពឹងនៃការងើបមកវិញនៃរំហូរវិនិយោគក្នុងវិស័យនេះ វិស័យសំណង់ និងអចលនទ្រព្យរំពឹងថា មានកំណើនវិជ្ជមានមកវិញក្នុងអត្រា៣ភាគរយ។ ក្នុងបរិការណ៍នេះ សេដ្ឋកិច្ចកម្ពុជា ត្រូវបានរំពឹងថាងើបមកវិញជាមួយនឹងអត្រាកំណើន៣,៥ភាគរយ” ។
ប្រធានសមាគមអ្នកវាយតម្លៃ និងភ្នាក់ងារអចលវត្ថុកម្ពុជា លោក ច្រឹក សុខនីម បានមានប្រសាសន៍នៅល្ងាចថ្ងៃទី៦ ខែមករា ឆ្នាំ២០២១ថា ពេលនេះសញ្ញាវិជ្ជមាននៃទីផ្សារអចលនទ្រព្យចាប់ផ្តើមបង្ហាញបន្តិចម្ដងៗទៅតាមជំហានដែលបានផុសចេញពីតម្រូវការជាក់ស្ដែងនៅក្នុងស្រុកបន្ទាប់ពីភាពគំរាមកំហែងនៃវិបត្តិឆ្លងជំងឺនៅក្នុងសហគមន៍ត្រូវបានបញ្ចប់។
លោកបញ្ជាក់ថា “សម្រាប់ដើមឆ្នាំ២០២១ដែលទើបតែឈានចូលមកដល់ថ្មីៗនេះ យើងឃើញថា សកម្មភាពទិញលក់នៃទីផ្សារលំនៅដ្ឋានចាប់ផ្តើមកម្រើកឡើងវិញបន្ទាប់ពីព្រឹត្តិការណ៍នៃ២៨វិច្ឆិកាត្រូវបានប្រកាសបញញចប់ជាស្ថាពរ” ។
លោកបានបន្តថា ប៉ុន្តែទាំងនេះវាគ្រាន់តែជាសញ្ញាវិជ្ជមានមួយដែលបង្ហាញពីការចាប់ផ្តើមតែប៉ុណ្ណោះ ហើយតាមការរំពឹងទុកអាចចំណាយពេលរហូតដល់ពាក់កណ្តាលឆ្នាំ ឬអំឡុងឆមាសទី២ ទើបស្ថានភាពល្អប្រសើររបស់ទីផ្សារចាប់ផ្តើមមានសកម្មភាពខ្លាំងឡើងវិញ។
ជាមួយគ្នានេះ នកឧកញ៉ាលី ហួរ ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា បានមានប្រសាសន៍ថ្មីៗនេះថា នៅដើមឆ្នាំ២០២១គឺជាពេលវេលាដ៏ល្អសម្រាប់អ្នកវិនិយោគ និងអភិវឌ្ឍលំនៅដ្ឋានប្រភេទកម្រិតមធ្យមសម្រាប់ដាក់លក់នៅលើទីផ្សារនាចុងឆ្នាំ២០២១ខាងមុខនេះខណៈពេលដែលតម្រូវការទីផ្សារលំនៅដ្ឋានចាប់ផ្តើមឡើងខ្ពស់វិញ។
នៅក្នុងឆ្នាំ២០២១នេះកម្ពុជាមានរឿងល្អៗជាច្រើន ដែលក្នុងនោះវិស័យមួយចំនួននឹងវិលត្រឡប់ទៅរកភាពល្អប្រសើរវិញដូចជាវិស័យកសិកម្ម វិស័យសេវាកម្ម វិស័យឧស្សាហកម្ម ជាពិសេសវិស័យអចលនទ្រព្យដែលជាឆ្អឹងខ្នងយ៉ាងសំខាន់នៃសេដ្ឋកិច្ចជាតិក្រោមការអនុវត្តនូវកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន ការទទួលបានប្រព័ន្ធអនុគ្រោះពន្ធ GSP ពីចក្រភព និងកិច្ចព្រមព្រៀង RCEP ជាដើម។
អ្នកឧកញ៉ាលី ហួរបានមានប្រសាសន៍បញ្ជាក់ថា នៅពេលមានការចូលមកវិនិយោគពីសំណាក់ក្រុមហ៊ុនអន្តរជាតិដើម្បីផលិតសម្រាប់នាំចេញទៅកាន់ទីផ្សារតាមបណ្តាប្រទេសដែលមានកិច្ចព្រមព្រៀងដោយការរួចពន្ធនោះ កម្ពុជានឹងអាចចំណេញច្រើន មានកំណើនសេដ្ឋកិច្ចឡើងវិញ ហើយនៅពេលដែលសេដ្ឋកិច្ចមានកំណើនល្អនោះវានឹងជះឥទ្ធិពលមកដល់វិស័យអចលនទ្រព្យ។
អ្នកឧកញ៉ាបន្តថា “ខ្ញុំគិតថា យ៉ាងយូរនៅត្រឹមចុងឆ្នាំ២០២១ ទីផ្សារលំនៅដ្ឋានកម្រិតមធ្យម និងក្រោមមធ្យមនឹងកើនឡើងវិញខ្លាំង ដោយសារតែកំណើននៃចំនួនប្រជាជនកើនឡើងជាបន្តបន្ទាប់ ហើយតម្រូវការលំនៅដ្ឋានរបស់ប្រជាពលរដ្ឋក្នុងស្រុកនៅមានច្រើន ដូច្នេះទីផ្សារមួយនេះនឹងងើបឡើងជាក់ជាមិនខាន។ នេះបើតាមការមើលឃើញរបស់ខ្ញុំ” ៕