ដោយៈ សាវុធ
ភ្នំពេញៈ គ្រឹះស្ថានធនាគារ និងគ្រឹះស្ថានមីក្រូហិរញ្ញវត្ថុនៅកម្ពុជា បានផ្តល់ការអនុគ្រោះដល់អ្នកខ្ចីប្រាក់ តាមរយៈការរៀចំឥណទានឡើងវិញ ក្នុងវិស័យសំណង់ចំនួន២១.៦៣៦គណនី ដែលស្មើនឹងទំហំទឹកប្រាក់៥៩៤,៤លានដុល្លារអាមេរិក កាលពីឆ្នាំមុន។ នេះបើយោងតាមរបាយការណ៍របស់ធនាគារជាតិនៃកម្ពុជា ចេញផ្សាយនៅថ្ងៃទី២៥ ខែមករា ឆ្នាំ២០២១ ។
របាយការណ៍បានឱ្យដឹងថា គ្រឹះស្ថានធនាគារ បានផ្តល់ការអនុគ្រោះដល់អ្នកខ្ចីប្រាក់ តាមរយៈការរៀចំឥណទានឡើងវិញ ក្នុងវិស័យសំណង់ចំនួន៧.៥៧៩គណនី ស្មើនឹង៤៧៧លានដុល្លារ ខណៈគ្រឹះស្ថានមីក្រូហិរញ្ញវត្ថុ បានផ្តល់ការអនុគ្រោះដល់អ្នកខ្ចីប្រាក់ តាមរយៈការរៀចំឥណទានឡើងវិញ ក្នុងវិស័យសំណង់ចំនួន ១៤.០៥១គណនី ស្មើនឹងទំហំទឹកប្រាក់ ១១៧,៤លានដុល្លារ។
លោកជា ចាន់តូទេសាភិបាលនៃធនាគារជាតិនៃកម្ពុជាបានថ្លែងថា ឈរលើបន្ទាត់គោលនយោបាយរបស់រាជរដ្ឋាភិបាល ធនាគារជាតិនៃកម្ពុជាបានដាក់ចេញ គោលនយោបាយរូបិយវត្ថុវិត្ថារកម្ម និងវិធានការម៉ាក្រូប្រុងប្រយ័ត្ន សំដៅបង្កើនសន្ទនីយភាពនៅក្នុងប្រព័ន្ធធនាគារ និងលើកទឹកចិត្តឱ្យគ្រឹះស្ថានធនាគារ និងហិរញ្ញវត្ថុបន្តផ្តល់ឥណទានដល់វិស័យអាទិភាព និងផ្តល់ការអនុគ្រោះដល់ប្រជាជនក្រីក្រ ដែលរងផលប៉ះពាល់តាមរយៈការរៀបចំឥណទានឡើងវិញ។
លោកថ្លែងថា “ប្រសិទ្ធភាពនៃគោលនយោបាយទាំងនេះ ត្រូវបានឆ្លុះបញ្ចាំង តាមរយៈការបន្តមានកំណើនឥណទាន កម្រិតទាបនៃឥណទានមិនដំណើរការ និងនិន្នាការថយចុះនៃចំនួនគណនី ក៏ដូចជាទឹកប្រាក់នៃឥណទានរៀបចំឡើងវិញ” ។
លោកបានឱ្យដឹងទៀតថា គោលនយោបាយរូបិយវត្ថុ អាចមានលទ្ធភាពបន្ថែមទៀត ក្នុងការស្តារ និងជំរុញសកម្មភាពសេដ្ឋកិច្ច ដូចជា ការកាត់បន្ថយអត្រាការប្រាក់នៅលើទីផ្សារ ការចាក់បញ្ចូលសាច់ប្រាក់នៅក្នុងសេដ្ឋកិច្ច និងការទិញមូលបត្ររដ្ឋ នៅពេលដែលប្រាក់រៀលត្រូវបានប្រើប្រាស់ទូលំទូលាយ និងមានវត្តមានមូលបត្ររដ្ឋ៕
