ដោយៈម៉ាណេត
ភ្នំពេញៈ ទេសាភិបាលធនាគារជាតិនៃកម្ពុជា (NBC) បានបញ្ជាក់សាជាថ្មីថា វិស័យធនាគារមានស្ថិរភាពរឹងមាំ និងបានចូលរួមយ៉ាងសកម្ម ក្នុងការគាំទ្រសកម្មភាពសេដ្ឋកិច្ច និងកាត់បន្ថយផលប៉ះពាល់នៃវិបត្តិ មកលើអាជីវកម្មនិងប្រជាជនក្រីក្រ ស្របតាមគោលនយោបាយរបស់រាជរដ្ឋាភិបាល។
លោកជា ចាន់តូ ទេសាភិបាលធនាគារជាតិនៃកម្ពុជា បានលើកឡើងនៅថ្ងៃទី២០ ខែមករា ឆ្នាំ២០២១ អំឡុងពេលធនាសន្និបាតបូកសរុបលទ្ធផល ការងារប្រចាំឆ្នាំ២០២០ និងទិសដៅការងារឆ្នាំ២០២១ នៅអគារធនាគារជាតិនៃកម្ពុជា សែនសុខ។
លោកបានថ្លែងថា “សេដ្ឋកិច្ចកម្ពុជាក្នុងឆ្នាំ២០២០ បានទទួលរងការធ្លាក់ចុះអវិជ្ជមានជាលើកដំបូង ក្នុងរយ:ពេលជាង២ទសវត្សរ៍ចុងក្រោយ ដែលជាចម្បងដោយសារ ការធ្លាក់ចុះវិស័យទេសចរណ៍ ការនាំចេញផលិតផលកាត់ដេរ និងវិស័យសំណង់” ។ លោកបន្តថា “ទោះស្ថិតក្នុងស្ថានភាពនៃវិបត្តិជំងឺកូវីដ-១៩ វិស័យធនាគារមានស្ថិរភាពរឹងមាំ និងបានចូលរួមយ៉ាងសកម្ម ក្នុងការគាំទ្រសកម្មភាពសេដ្ឋកិច្ច និងកាត់បន្ថយផលប៉ះពាល់នៃវិបត្តិមកលើអាជីវកម្មនិងប្រជាជនក្រីក្រ ស្របតាមគោលនយោបាយរបស់រាជរដ្ឋាភិបាល” ។
ជាមួយគ្នានេះ កម្ពុជានៅតែអាចសម្រេចបាននូវស្ថិរភាពថ្លៃ និងអត្រាប្តូរប្រាក់ ហើយទុនបម្រុងអន្តរជាតិ ត្រូវបានគរពូនជាលំដាប់ និងមានកម្រិតខ្ពស់ជាង៣ដង នៃកម្រិតដែលប្រទេសកំពុងអភិវឌ្ឍន៍គួរមាន។
ដើម្បីចូលរួមកាត់បន្ថយផលប៉ះពាល់ នៃការធ្លាក់ចុះនិងបញ្ហាប្រឈម ធនាគារជាតិនៃកម្ពុជា បានដាក់ចេញនូវវិធានការគាំទ្រមួយចំនួន ដល់គ្រឹះស្ថានធនាគារ និងហិរញ្ញវត្ថុ ក្នុងនោះរួមមាន ការរៀបចំឥណទានឡើងវិញ ដែលបានដាក់ឱ្យអនុវត្តកាលពីខែមីនា ឆ្នាំ២០២០កន្លងមក និងបន្តអនុវត្តដល់ដំណាច់ខែមិថុនា ឆ្នាំ២០២១នេះ។
លោកជា ចាន់តូ បានបន្តថា ការរៀបចំឥណទានឡើងវិញ ត្រូវបានអនុញ្ញាតរហូតដល់ទៅបីដង ដោយមិនមានប៉ះពាល់ដល់ ចំណាត់ថ្នាក់ឥណទាននោះទេ។ បទប្បញ្ញត្តិបន្ថែមរួមមាន៖ ការកាត់បន្ថយអត្រាការប្រាក់ និងការលើកលែងថ្លៃសេវាជាដើម។ ការដាក់ចេញនេះ បានធ្វើឱ្យឥណទានមិនដំណើរការស្ថិតក្នុងកម្រិតទាប ២,៥% ។
ប្រទេសកម្ពុជា ក៏បានជំរុញការប្រើប្រាស់ប្រព័ន្ធធនាគារឌីជីថល។ ធនាគារជាតិនៃកម្ពុជា បានដាក់ឱ្យដំណើរការជាផ្លូវការនូវប្រព័ន្ធបាគង កាលពីខែតុលា ឆ្នាំ២០២០ ដែលបានរួមចំណែក លើកកម្ពស់បរិយាបន្នហិរញ្ញវត្ថុនៅកម្ពុជា ដោយសារមានក្រុមហ៊ុនឯកជនជាច្រើនបើកប្រាក់បៀវត្សរ៍ ជូនបុគ្គលិករបស់ខ្លួនជាសាច់ប្រាក់នៅឡើយ។
ប្រព័ន្ធបាគងត្រូវបានបង្កើតឡើង ដោយប្រើប្រាស់បច្ចេកវិទ្យាប្លុកឆេន និងអាចធ្វើប្រតិបត្តិការទូទាត់បាន ទាំងជាប្រាក់រៀលនិងប្រាក់ដុល្លារអាមេរិក តាមរយៈទូរស័ព្ទដៃ ដោយអ្នកប្រើប្រាស់អាចស្កេនលេខកូដ ឬវាយបញ្ចូលលេខទូរស័ព្ទរបស់អ្នកទទួលប្រាក់។ ប្រព័ន្ធបាគងមានសមាជិកប្រមាណ២០ធនាគារ។
ម្យ៉ាងទៀត រូបិយវត្ថុជាតិក៏ត្រូវបានជំរុញ ឱ្យប្រើប្រាស់យ៉ាងខ្លាំងក្លាផងដែរ សំដៅជំរុញកំណើនប្រកបដោយចីរភាព និងអភិវឌ្ឍប្រព័ន្ធធនាគារប្រកបដោយប្រសិទ្ធភាព និងជាពិសេសកាត់បន្ថយការពឹងផ្អែក លើប្រាក់ដុល្លារអាមេរិក។ បច្ចុប្បន្នការទូទាត់ដែលមានទឹកប្រាក់តិចជាង១០០ដុល្លារអាមេរិក ត្រូវបានធ្វើឡើងជាប្រាក់រៀល ខណៈដែលការប្រើប្រាស់ក្រដាសប្រាក់ដុល្លារអាមេរិក ដែលមានទំហំទឹកប្រាក់តូចបានថយចុះជាបណ្តើរ៕
