ដោយៈ ចំណាន
ភ្នំពេញៈ ទិន្នន័យបានបង្ហាញថា ទំហំទឹកប្រាក់នៃការធ្វើពាណិជ្ជកម្មជាអន្តរជាតិរបស់កម្ពុជា នៅតែមានភាពល្អប្រសើរ ដោយនៅក្នុងឆមាសទី១ ឆ្នាំ២០២៦ នេះមានប្រមាណ៣៧ពាន់លានដុល្លារ កើនឡើង១/៥ដង បើធៀបនឹងរយៈពេលដូចគ្នាកាលពីឆ្នាំ២០២៥
យោងតាមទិន្នន័យអគ្គនាយកដ្ឋានគយ និងរដ្ឋាករកម្ពុជា(GDCE) ចេញផ្សាយក្នុងថ្ងៃទី១០ ខែកក្កដានេះ បង្ហាញថា ចន្លោះពីខែមករា-មិថុនា ឆ្នាំ២០២៦ កម្ពុជាបាននាំចេញទំនិញទៅទីផ្សារអន្តរជាតិក្នុងទឹកប្រាក់សរុប១៧,០៨ ពាន់លានដុល្លារ កើនឡើង១៩,៥% ពីចំនួន១៤,២៩ ពាន់លានដុល្លារកាលពីរយៈពេលដូចគ្នា ឆ្នាំ២០២៥។ ទន្ទឹមនឹងនេះកម្ពុជាក៏បាននាំចូលទំនិញ ពីទីផ្សារអន្តរជាតិក្នុងទឹកប្រាក់១៩,៧៧ ពាន់លានដុល្លារ កើនឡើង២១,៤% ពីចំនួន ១៦,២៨ពាន់លានដុល្លារ។
ប្រទេសដែលជាដៃគូពាណិជ្ជកម្មធំទាំង ១០ រួមមាន ចិន សហរដ្ឋអាមេរិក វៀតណាម ជប៉ុន ថៃ សិង្ហបុរី ម៉ាឡេស៊ី ឥណ្ឌូនេស៊ី កាណាដា និងអេស្ប៉ាញ។
ផ្អែកតាមតួលេខខាងលើ គឺជញ្ជីងពាណិជ្ជកម្មអន្តរជាតិរបស់កម្ពុជាក្នុងឆមាសទី១ ឆ្នាំ២០២៦ មានឱនភាពប្រមាណ ២,៦៩ ពាន់លានដុល្លារ កើនពី ១,៩៨ ពាន់លានដុល្លារកាលពីឆមាសទី១ ឆ្នាំ២០២៥។
អនុប្រធានសភាពាណិជ្ជកម្មកម្ពុជា អ្នកឧកញ៉ាលឹម ហេង បានមានប្រសាសន៍ឲ្យដឹងថា ក្នុងនាមជាប្រទេសកំពុងអភិវឌ្ឍន៍ កម្ពុជាកំពុងខិតខំយ៉ាងខ្លាំង ក្នុងការធ្វើឱ្យសេដ្ឋកិច្ចរបស់ខ្លួន កាន់តែមានភាពរឹងមាំ និងបោះជំហានទៅមុខឱ្យកាន់តែលឿន។
លោកបន្តថា “ការដាក់ចេញនូវគោលនយោបាយថ្មីៗ និងការកសាងហេដ្ឋារចនាសម្ព័ន្ធគាំទ្រ ពីសំណាក់រាជរដ្ឋាភិបាល ព្រមទាំងការខិតខំរបស់ផ្នែកឯកជនដើម្បីទាក់ទាញ និងលើកទឹកចិត្តចំពោះវិនិយោគិនជាតិ និងអន្តរជាតិ បានធ្វើឱ្យសេដ្ឋកិច្ចកម្ពុជា សម្រេចបានសមិទ្ធិផលវិជ្ជមានជាបន្តបន្ទាប់”។ លោកបន្ថែមថា “កំណើននៃទំហំពាណិជ្ជកម្មអន្តរជាតិ គឺបញ្ជាក់ពីទំនុកចិត្តនៃការវិនិយោគថ្មីៗ និងការនាំចេញទំនិញរបស់កម្ពុជាទៅកាន់ទីផ្សារអន្តរជាតិ”៕
