ដោយៈលក្ខិណា
ភ្នំពេញៈ ដើម្បីជំរុញដល់ការនាំចេញ និងពង្រីកទីផ្សារនៃផលិតផលរបស់ខ្លួនកម្ពុជា តាមរយៈក្រសួងពាណិជ្ជកម្ម បានបន្តស្វែងរកទីផ្សារបន្ថែមទៀត តាមរយៈកិច្ចព្រមព្រៀងពាណិជ្ជកម្មសេរី ទាំងទ្វេភាគីនិងពហុភាគី។
ជាក់ស្ដែងក្នុងឆ្នាំ ២០២១នេះ កម្ពុជាអាចនឹងទទួលបានកិច្ចព្រមព្រៀងពាណិជ្ជកម្មសេរីធំៗចំនួន៣ ។
លោកប៉ាន សូរស័ក្តិរដ្ឋមន្ត្រីក្រសួងពាណិជ្ជកម្ម បានមានប្រសាសន៍កន្លងមកថ្មីៗនេះថា ថ្វីត្បិតតែកម្ពុជា មានទីផ្សារទូលំទូលាយទៅហើយក្ដី តែកម្ពុជានៅតែបន្តស្វែងរកទីផ្សារថ្មីៗបន្ថែមទៀត ដើម្បីជំរុញដល់ការនាំចេញផលិតផលពីប្រទេសកម្ពុជា ក្នុងនោះកម្ពុជា បានសម្រេចចុះហត្ថលេខារួចហើយ នូវកិច្ចព្រមព្រៀងពាណិជ្ជកម្មសេរីភាពជាដៃគូសេដ្ឋកិច្ចគ្រប់ជ្រុងជ្រោយតំបន់( RCEP )ដែលមានប្រទេសអាស៊ានបូក៥ កិច្ចព្រមព្រៀងពាណិជ្ជកម្មសេរីកម្ពុជា ជាមួយចិន ហើយក៏កំពុងចរចានូវកិច្ចព្រមព្រៀងពាណិជ្ជកម្មសេរីជាមួយប្រទេសកូរ៉េខាងត្បូងផងដែរ ។
លោកបន្តថា “ពេលនេះកម្ពុជា ក៏បានត្រៀមខ្លួនក្នុងការចូលទៅកាន់ទីផ្សារ ដែលខ្លួនបានចរចា និងកំពុងចរចា ដើម្បីនាំទំនិញរបស់ខ្លួនទៅកាន់ទីផ្សារទាំងនោះ និងត្រូវរកទីផ្សារបន្ថែមទៀត ជំរុញទំហំពាណិជ្ជកម្មបន្ថែមទៀតនៅពេលខាងមុខនេះ” ។
ក្រសួងពាណិជ្ជកម្មក៏បានបើកកិច្ចប្រជុំជាបន្តបន្ទាប់ ដើម្បីរៀបចំយុទ្ធសាស្ត្រពាណិជ្ជកម្ម ដើម្បីទាញប្រយោជន៍ពីកិច្ចព្រមព្រៀងពាណិជ្ជកម្មសេរី ដូចជាការកំណត់យកមុខទំនិញណាដែលមានអាទិភាព សម្រាប់ការនាំចេញដោយមិនអស់ពន្ធជាដើម ។
យោងតាមរបាយការណ៍របស់ក្រសួងពាណិជ្ជកម្មកម្ពុជាបានបង្ហាញថា កម្ពុជាបាននាំចេញទំនិញនិងផលិតផលសំខាន់ៗ ទៅកាន់គោលដៅប្រមាណ៦០ប្រទេស លើពិភពលោក និងកំពុងចរចានាំចេញដោយផ្ទាល់ ទៅកាន់ប្រទេសជាច្រើនទៀត ដែលមានអាទិភាព ខណៈកម្ពុជាមានទំនិញច្រើនដែលត្រូវនាំចេញទៅកាន់ទីផ្សារអន្តរជាតិ៕