តម្លៃ​ប្រេង​ឆៅនៅលើទីផ្សារអន្តរជាតិបាន​កើនឡើង​នៅ​ថ្ងៃ​ច័ន្ទ​នេះ

ដោយ: គង់ លាងហួរ
អន្តរជាតិ: តម្លៃ​ប្រេង​ឆៅបាន​កើនឡើង​នៅ​ព្រឹកថ្ងៃ​ច័ន្ទ​នេះ ដោយសារសកម្មភាព​រោងចក្រ​​នៅក្នុង​ប្រទេស​ចិនកើនឡើង​ និង​ខណៈ​ដែលអុីស្រាអែល​បាន​បន្ត​ការ​វាយប្រហារ​លើ​ប្រទេស​លី​បង់ ទោះបី​ជាមាន​កិច្ចព្រមព្រៀង​បទ​ឈប់​បាញ់​យ៉ាងណាក្តី។

តួយ៉ាង តម្លៃប្រេងឆៅ Brent futures បានកើនឡើង៨សេនដល់៧១,៩២ដុល្លារក្នុងមួយបារ៉ែលគិតត្រឹមម៉ោងសកល 0107 GMT ខណៈតម្លៃប្រេងឆៅ West Texas Intermediate របស់អាមេរិកបានកើនឡើង៩សេនដល់៦៨,០៩ដុល្លារក្នុងមួយបារ៉ែល។

តម្លៃប្រេងឆៅបានកើនឡើងបន្ទាប់ពីការស្ទង់មតិផ្លូវការមួយបង្ហាញថា សកម្មភាពរោងចក្ររបស់ប្រទេសចិនបានកើនឡើងតិចតួចរយៈពេល២ខែជាប់គ្នាគិតត្រឹមខែវិច្ឆិកាកន្លងទៅ។ នេះជាសញ្ញាបង្ហាញថា វិធានការជំរុញសេដ្ឋកិច្ចថ្មីៗចុងក្រោយរបស់ទីក្រុងប៉េកាំងកំពុងជះឥទ្ធិពលសន្សឹមៗលើតម្រូវការប្រេងឥន្ធនៈ។

បទឈប់បាញ់រវាងអុីស្រាអែល និងលីបង់បានចូលជាធរមានកាលពីថ្ងៃពុធសប្តាហ៍មុន។ ប៉ុន្តែភាគីទាំងពីរបានចោទប្រកាន់គ្នាទៅវិញទៅមកថា បានរំលោភលើបទឈប់បាញ់នេះ។

ក្រសួង​សុខាភិបាល​លីបង់​បាន​អះអាង​ក្នុង​សេចក្តី​ថ្លែងការណ៍​មួយ​ថា មនុស្ស​ជា​ច្រើន​នាក់​បាន​រង​របួស​ក្នុង​ការ​វាយ​ប្រហារ​របស់​អុីស្រាអែល​ចំនួនពីរ​លើក​នៅ​ភាគ​ខាង​ត្បូង​នៃប្រទេស​លីបង់៕