ដោយគង់ ម៉ាលីន
ភ្នំពេញៈ មន្ត្រីជាន់ខ្ពស់ធនាគារជាតិនៃកម្ពុជាបានថ្លែងថា ចំណេះដឹងនិងជំនាញជាមូលដ្ឋានផ្នែកហិរញ្ញវត្ថុ ជាការចេះគិតគូរអំពីចំណូលចំណាយ ព្រមទាំងចេះគិតគូរនិងធ្វើផែនការចំណាយសមស្រប និងចំណូលរបស់ខ្លួនដែលកត្តាទាំងនេះ ជាផ្នែកមួយយ៉ាងសំខាន់នៃជីវិតនិងជីវភាពរស់នៅរបស់ប្រជាជនកម្ពុជា។
ទេសាភិបាលរងធនាគារជាតិនៃកម្ពុជា លោកស្រីនាវ ច័ន្ទថាណាបានមានប្រសាសន៍ថា ចំណេះដឹងនិងជំនាញនេះ ជាផ្នែកដ៏សំខាន់មួយនៃជីវិត និងជីវភាពរស់នៅរបស់ប្រជាពលរដ្ឋ។ ចំណេះដឹង និងជំនាញជាមូលដ្ឋានផ្នែកហិរញ្ញវត្ថុ ជាការចេះគិតគូរអំពីចំណូលចំណាយព្រមទាំងចេះគិតគូរ និងធ្វើផែនការចំណាយសមស្រប និងចំណូលរបស់ខ្លួន។
លោកស្រីបានមានប្រសាសន៍ថា ចំណេះដឹងផ្នែកហិរញ្ញវត្ថុ អាចជាការយល់ដឹងអំពីគោលការណ៍ និងបែបបទសំខាន់ៗពាក់ព័ន្ធ និងហិរញ្ញវត្ថុ។ ឧទាហរណ៍ដូចជាកម្រិតហានិភ័យ និងកម្រិតប្រាក់ចំណូល និងការស្វែងរកការប្រឹក្សាយោបល់ជាមួយ អ្នកជំនាញផ្នែកហិរញ្ញវត្ថុ។ ជាទូទៅប្រជាពលរដ្ឋ ដែលមានចំណេះដឹងផ្នែកហិរញ្ញវត្ថុ នឹងមានសមត្ថភាពសម្រេចចិត្តបានប្រសើរជាងប្រជាពលរដ្ឋ ដែលពុំមានចំណេះដឹងផ្នែកហិរញ្ញវត្ថុ។
លោកស្រីបានបន្តថា សម្រាប់ចំណេះដឹងផ្នែកហិរញ្ញវត្ថុ នឹងរួមចំណែកដល់ការលើកកម្ពស់កម្រិតបរិយាប័ន្នហិរញ្ញវត្ថុ ដោយជំរុញឱ្យប្រជាពលរដ្ឋ អាចទទួលបាននិងប្រើប្រាស់សេវាហិរញ្ញវត្ថុ ផ្លូវការបានកាន់តែច្រើន ប៉ុន្តែគ្រឹះស្ថានធនាគារនិងហិរញ្ញវត្ថុក៏ត្រូវមានកាតព្វកិច្ចផ្តល់សេវាហិរញ្ញវត្ថុ ប្រកបដោយការទទួលខុសត្រូវ និងប្រកបដោយតម្លាភាពនិងធានាថា សិទ្ធិនិងផលប្រយោជន៍ស្របច្បាប់ របស់អ្នកប្រើប្រាស់សេវាហិរញ្ញវត្ថុត្រូវបានការពារដោយត្រឹមត្រូវ៕
