ដោយ: គង់ លាងហួរ
បាងកក: លោក Pichai Chunhavajira ឧបនាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុ អះអាងថា គោលនយោបាយរបស់ថៃក្នុងការចរចាជាមួយកម្ពុជាលើតំបន់ទាមទារត្រួតស៊ីគ្នានៅឈូងសមុទ្រថៃដែលមានអណ្តូងប្រេង និងឧស្ម័នធម្មជាតិ មានគោលដៅធានាស្ថិរភាពថាមពលរបស់ប្រទេសថៃ។
លោកបានបន្តថា “ការពិភាក្សាអំពីបញ្ហាទឹកដីអាចចំណាយពេលអស់ជាង៥០ឆ្នាំ ខណៈប្រេងមិនអាចសារៈប្រយោជន៍ទៀតទេក្នុងរយៈពេល៣០ឆ្នាំខាងមុខ។យើងត្រូវផ្តោតលើការសហការជាមួយប្រទេសជិតខាងរបស់យើង ដើម្បីប្រើប្រាស់ធនធានដែលយើងមានឱ្យបានពេញលេញនៅពេលនេះ”។
លោក Pichai បានបន្ថែមថា ប្រទេសថៃអាចផលិតប្រេងចម្រាញ់ចេញពីឈូងសមុទ្រថៃក្នុងតម្លៃត្រឹមតែ២០ដុល្លារប៉ុណ្ណោះក្នុងមួយបារ៉ែល ខណៈការនាំចូលឧស្ម័នធម្មជាតិដើម្បីផលិតថាមពលអគ្គិសនីក្នុងបរិមាណដូចគ្នាមានតម្លៃ៧៥ដុល្លារ។
លោកបានថ្លែងថា “ប្រសិនបើយើងអាចប្រើប្រាស់ធនធានប្រេងនៅតំបន់ទាមទារត្រួតសុីគ្នានេះដើម្បីផលិតថាមពលអគ្គិសនីបាន នោះតម្លៃអគ្គិសនីនៅប្រទេសថៃនឹងថយចុះមកនៅទាបជាង៣,៥បាតក្នុងមួយគីឡូវ៉ាត់ម៉ោង”។
កាលពីពេលថ្មីៗនេះ តុលាការធម្មនុញ្ញថៃ បានច្រានចោលញត្តិជំទាស់នឹងភាពស្របច្បាប់នៃអនុស្សរណៈយោគយល់គ្នា (MoU) ត្រូវបានចុះហត្ថលេខានៅឆ្នាំ២០០១ រវាងថៃ និងកម្ពុជា ស្តីពីការអភិវឌ្ឍន៍រួមគ្នានៅឈូងសមុទ្រថៃ។
ញត្តិនេះត្រូវបានដាក់ដោយលោក Paiboon Nititawan អនុប្រធានគណបក្ស Palang Pracharath ដោយលោកបានអះអាងថា MoU នេះមិនត្រូវបានអនុម័តដោយសភា មុនពេលចុះហត្ថលេខា។
រដ្ឋមន្ត្រីការបរទេសថៃលោក Maris Sangiampongsa បានការពារភាពស្របច្បាប់ ដោយលោកបញ្ជាក់ថា MoU នេះពុំមែនជាសន្ធិសញ្ញា និងមិនមានចែងប្រយោគជាកាតព្វកិច្ចឡើយ។
លោក Maris បានអះអាងថា រដ្ឋាភិបាលនៃប្រទេសទាំងពីរពុំបានធ្វើព្រមព្រៀងភ្ជាប់មកជាមួយចំណងណាមួយក្រោម MoU នោះទេ។នេះបើតាមការរាយការណ៍របស់សារពត៌មាន Bangkok Post។
ប្រមុខការទូតថៃរូបនេះបញ្ជាក់បន្ថែមថា អនុស្សរណៈយោគយល់គ្នានេះពុំមានធ្វើឱ្យប៉ះពាល់ដល់អធិបតេយ្យភាពរបស់ប្រទេសថៃ លើតំបន់ទាមទារត្រួតស៊ីគ្នា (OCA) នៅលើកោះKoh Kood ក្នុងខេត្តត្រាតជាប់ព្រំដែនជាមួយកម្ពុជានោះទេ៕ប្រភព: The Nation & Thaiger៕
