ដោយៈ ម៉ាណា
ភ្នំពេញៈ សហគ្រាសធុនមីក្រូ តូច និងមធ្យម(MSME) ពិតជាកំពុងចូលរួមចំណែកយ៉ាងសកម្ម ហើយនឹងត្រូវមានតួនាទីកាន់តែធំ និងជាគន្លឹះក្នុងការនាំកម្ពុជា ទៅសម្រេចគោលដៅក្នុងការចាកចេញពីឋានៈជាប្រទេសមានការអភិវឌ្ឍតិចតួចនៅចុងឆ្នាំ ២០២៩។ នេះបើតាមសាររបស់សម្តេចធិបតីហ៊ុន ម៉ាណែតនាយករដ្ឋមន្ត្រីនៃកម្ពុជា។
ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្រោមកិច្ចសហការជាមួយសហគ្រិនខ្មែរ អង្គការGIZ អង្គការUNIDO និងធនាគារសហគ្រាសធុនតូច និងមធ្យមកម្ពុជា កាលពីថ្ងៃទី២៦ ខែមិថុនា នៅសណ្ឋាគារភ្នំពេញ បានរៀបចំទិវាជាតិសហគ្រាសមីក្រូ តូច និងមធ្យម លើកទី២ ដែលមានការចូលរួមជាគណៈអធិបតីពីលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកាលពីសប្តាហ៍មុន។
ខ្លឹមសារនៃសារលិខិតរបស់លោកនាយករដ្ឋមន្ត្រី ហ៊ុន ម៉ាណែត ក្នុងឱកាសប្រារព្ធទិវាជាតិ សហគ្រាសមីក្រូ តូច និងមធ្យម លើកទី២ ដែលអានដោយលោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងថា ការប្រារព្ធទិវាជាតិជាលើកទី ២ នេះបានបញ្ជាក់ពីសារជាថ្មី អំពីការយកចិត្តទុកដាក់ ការប្តេជ្ញាជំរុញគាំទ្រ និងការផ្តល់តម្លៃដល់សហគ្រាសមីក្រូ តូច និងមធ្យម ពីសំណាក់រដ្ឋាភិបាល ដែលតែងចាត់ទុកថាជាឆ្អឹងខ្នង និងជាកម្លាំងចលករអូសទាញកំណើនសេដ្ឋកិច្ច និងការអភិវឌ្ឍសង្គម។
សហគ្រាសធុនមីក្រូ តូច និងមធ្យម បានរួមចំណែកដល់សកម្មភាពសេដ្ឋកិច្ចគ្រប់ប្រភេទ តាមរយៈការបង្កើតការងារ ប្រាក់ចំណូល កាត់បន្ថយការធ្វើចំណាកស្រុក ជួយរក្សាលំនឹងជីវភាព រក្សាស្ថិរភាពសង្គម និងរួមចំណែកដល់ការរីកចម្រើន នៃវិស័យឯកជនផងដែរ។ សមិទ្ធផល និងវឌ្ឍនភាពដែលសហគ្រាសមីក្រូ តូច និងមធ្យម សម្រេចបានក្នុងពេលជាង២ទសវត្សរ៍កន្លងមកនេះ បានបង្កើតនូវមោទនភាពជាតិថ្មីមួយទៀតនោះ គឺការឈានឆ្ពោះទៅចាកចេញ ពីឋានៈជាប្រទេសមានការអភិវឌ្ឍតិចតួចនៅចុងឆ្នាំ ២០២៩។
លោកបានឱ្យដឹងទៀតថា លក្ខខណ្ឌពាណិជ្ជកម្ម ជំនួយអភិវឌ្ឍន៍ផ្លូវការ និងភាពអនុគ្រោះដែលបណ្តាប្រទេសជាមិត្ត និងដៃគូអភិវឌ្ឍនានាបានផ្តល់ឱ្យកម្ពុជា គឺនឹងមានការប្រែប្រួល ហើយកាន់តែតឹងរឹងជាងមុន ដែលប្រកាសនេះទាមទារឱ្យគ្រប់តួអង្គមិនថា វិស័យសាធារណៈ ឬវិស័យឯកជន ជាពិសេសសហគ្រាសគ្រប់ប្រភេទត្រូវបង្កើន និងពង្រឹងសមត្ថភាព មានការអភិវឌ្ឍនិងវិវត្តអាជីវកម្មខ្លួនជាប្រចាំ ដើម្បីទទួលបានទំនុកចិត្តពីអតិថិជន និងអាចបន្តប្រកួតប្រជែងក្នុងសង្វៀនធុរកិច្ច ពាណិជ្ជកម្ម និងវិនិយោគក្នុងយុគសម័យបច្ចេកវិទ្យាកាន់តែទំនើប និងសេដ្ឋកិច្ចពិភពលោក ដែលមានភាពមិនច្បាស់លាស់។ បង្គោលចរ ឆ្នាំ២០២៩ គឺជាវិញ្ញាសាមិនសាមញ្ញនោះទេ ប៉ុន្តែរាជរដ្ឋាភិបាលជឿជាក់ថា កម្ពុជាអាចសម្រេចបាន។
លោកបានថ្លែងថា “ឈរលើមូលដ្ឋាននេះ ការចាកចេញពីឋានៈប្រទេសមានការអភិវឌ្ឍតិចតួចនៅដំណាច់ឆ្នាំ២០២៩ គួរត្រូវបានយើងទាំងអស់គ្នា ជាពិសេសសហគ្រាសធុនមីក្រូ តូច និងមធ្យម ចាត់ទុកជាឱកាសដែលត្រូវក្តាប់យក និងទាញប្រយោជន៍ឱ្យបានជាអតិបរមា ជាជាងការភ័យព្រួយបារម្ភ និងខ្លបខ្លាចនូវការគំរាមកំហែងក៏ដូចជាការប្រកួតប្រជែងពីខាងក្រៅ”។ លោកបន្ថែមថា “តាមរយៈបទពិសោធន៍ នៃបណ្តាសេដ្ឋកិច្ចជឿនលឿន មានតែការត្រៀមលក្ខណៈ ការពង្រឹង និងអភិវឌ្ឍសមត្ថភាព សហគ្រិនភាព នវានុវត្តន៍ និងការខិតខំព្យាយាមបំពេញអនុលោមភាពប៉ុណ្ណោះ ដែលជាកត្តាកំណត់នៃភាពជោគជ័យក្នុងដំណើរការវិវត្តនេះ”។
ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានមានប្រសាសន៍ថា ក្នុងបរិការណ៍ដែលនយោបាយ និងសេដ្ឋកិច្ចពិភពលោក ស្ថិតក្នុងភាពមិនច្បាស់លាស់នៅពេលនេះ សហគ្រាសធុនមីក្រូ តូច និងមធ្យម គឺមានភាពចាំបាច់ក្នុងការពង្រឹងសមត្ថភាពផលិតកម្មរបស់ខ្លួន ឱ្យបោះជំហានទៅមុខកាន់តែលឿនបន្ថែមទៀត។
លោកបានថ្លែង “សហគ្រាសធុនមីក្រូ តូច និងមធ្យម មានចំនួនច្រើនលើសលប់ និងជាឆ្អឹងខ្នងដ៏រឹងមាំនៃសង្គម -សេដ្ឋកិច្ចជាតិ ដែលបាននិងកំពុងចូលរួមចំណែកយ៉ាងសំខាន់ ក្នុងការបង្កើតការងារ និងមុខរបរ ការបង្កើនប្រាក់ចំណូល ការកាត់បន្ថយភាពក្រីក្រ និងការជំរុញការអភិវឌ្ឍប្រកបដោយចីរភាព បរិយាបន្ន និងភាពធន់”។
យោងតាមជំរឿនឆ្នាំ២០២២ របស់វិទ្យាស្ថានជាតិស្ថិតិនៃក្រសួងផែនការ កម្ពុជាមានសហគ្រាសធុនមីក្រូ តូច និងមធ្យមចំនួន៧៥៣, ៦៧០ មូលដ្ឋាន ដោយមានកម្លាំងពលកម្មសរុបជិត៣លាននាក់ ក្នុងនោះមានស្រ្តី៦០ភាគរយ។ វិស័យនេះរួមចំណែក៦៣ភាគរយនៃផលិត ផលក្នុងស្រុកសរុប និងនៅតែជាវិស័យស្នូល សម្រាប់មហិច្ឆតារបស់កម្ពុជាក្នុងការកសាងសេដ្ឋកិច្ច ដែលកាន់តែមានពិពិធកម្មខ្ពស់ និងផ្អែកលើនវានុវត្តន៍៕
 ពិតជាកំពុងចូលរួមចំណែកយ៉ាងសកម្ម ហើយនឹងត្រូវមានតួនាទីកាន់តែធំ និងជាគន្លឹះក្នុងការនាំកម្ពុជា ទៅសម្រេចគោលដៅក្នុងការចាកចេញពីឋានៈជាប្រទេសមានការអភិវឌ្ឍតិចតួចនៅចុងឆ្នាំ ២០២៩។ នេះបើតាមសាររបស់សម្តេចធិបតីហ៊ុន ម៉ាណែតនាយករដ្ឋមន្ត្រីនៃកម្ពុជា។){kind=link}