ដោយៈ ម៉ាណា
ភ្នំពេញៈ ក្រុមការងារផ្នែកឯកជនបានជួបប្រជុំ ពិភាក្សាស្វែងយល់ពីចង្វាក់ តម្រូវការផ្គត់ផ្គង់លើទីផ្សារកម្ពុជា នៃការនាំចូលផលិតផលកសិកម្ម និងជលផល និងផ្សេងៗ នៃវេទិការាជរដ្ឋាភិបាល-ផ្នែកឯកជន។
កិច្ចប្រជុំកាលពីថ្ងៃទី៣០ មិថុនាធ្វើឡើងនៅអគ្គនាយកដ្ឋានសភាពាណិជ្ជកម្មកម្ពុជា ដឹកនាំដោយ ឧកញ៉ា បណ្ឌិត តាន់ មុនីវណ្ណ សហប្រធានក្រុមការងារតំណាងផ្នែកឯកជន និងជាអនុប្រធានសភាពាណិជ្ជកម្មកម្ពុជា។
កិច្ចប្រជុំនេះ ក៏មានការចូលរួមផងដែរពីសំណាក់ពីលោកឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា និងជាសមាជិកក្រុមការងារចំពោះកិច្ចផ្នែកឯកជន ឧកញ៉ាបណ្ឌិត ណាង សុធី ប្រធានគណៈកម្មការចំពោះកិច្ចសម្រាប់វារីវប្បកម្ម ផ្នែកឯកជន តំណាងសមាគមចុងភៅនៅកម្ពុជា តំណាងសមាគមសម្ពន្ធភាពកសិកម្ម និងបរិស្ថានកម្ពុជា តំណាងសមាគមអ្នកផ្គត់ផ្គង់ត្រីនៅកម្ពុជា តំណាងសមាគមអ្នកផលិតចំណីអាហារកម្ពុជា និងសមាជិក សមាជិកានៃក្រុមការងារផ្នែកឯកជនមួយចំនួនទៀតផងដែរ។
កិច្ចប្រជុំនេះមានគោលបំណង ដើម្បីពិនិត្យ និងពិភាក្សាលើបញ្ហាប្រឈមរួមមាន ទី១ ការកំណត់កូតានាំចូល សម្រាប់ផលិតផលកសិកម្ម និងជលផល ទី២. លទ្ធភាពនៃការផ្គត់ផ្គង់ផលិតផលកសិកម្ម និងជលផលនៅក្នុងទីផ្សារកម្ពុជា ទី៣ នីតិវិធី និងបែបបទនៃការនាំចូលផលិតផលកសិកម្ម និងជលផលមកកាន់ទីផ្សារកម្ពុជា និងទី៤ ទទួលយកធាតុចូល រួមនឹងបញ្ហាប្រឈមផ្សេងៗទៀត ដែលជាកង្វល់របស់វិស័យឯកជនផងដែរ៕
