ដោយៈ ម៉ាណេត
ភ្នំពេញៈ ទីផ្សារលំនៅដ្ឋាននៅកម្ពុជាទាំងផ្ទះជាប់ដី និងខុនដូឬអាគារសហកម្មសិទ្ឋនៅតែមានតម្រូវការខ្ពស់នៅកម្ពុជា ដែលក្រុមហ៊ុនជាតិ អន្តរជាតិនៅតែបន្តសំរុកសាងសង់ទាំងនៅក្នុង និងជាយរាជធានីភ្នំពេញ។
ទីប្រឹក្សាសមាគមអចលនទ្រព្យសកល លោកយិន លាងគង់បានមានប្រសាសន៍ ឲ្យដឹងតាមទូរស័ព្ទកាលពីថ្ងៃទី២៦ វិច្ឆិកាកន្លងមកថា កំនើនតម្រូវការលំនៅដ្ឋាននៅរាជធានីភ្នំពេញ និងតាមបណ្តាខេត្តមានសេដ្ឋកិច្ចរីកចម្រើន មិនមែនជាភាពចៃដន្យនោះទេ ប៉ុន្តែវាបណ្តាលមកពីកត្តាជាសត្យានុម័តមួយចំនួនដូចជា ទី១ ប្រជាជនកម្ពុជាមានអាយុចាប់ពី១៨ដល់៣០ឆ្នាំមាន៦០ភាគរយ នៃប្រជាជនសរុប ដែលពួកគេជាវ័យដែលមានតម្រូវការលំនៅដ្ឋាន ក្រោយពេលរៀបការ និងបែកពីគ្រួសារ។
ទី២ កត្តាសំខាន់ដទៃទៀត គឺការកើនឡើងនូវការរីកចម្រើនផ្នែកនគរូបនីយកម្មទីក្រុង ដែលធ្វើឲ្យចំនួនប្រជាសាស្ត្រកើនឡើងនៅតាមទីក្រុង និងតាមទីប្រជុំជននានា ទី៣ ការកើនឡើងនូវសេដ្ឋកិច្ចជាតិ ដោយប្រាក់ចំណូលរបស់ប្រជាពលរដ្ឋកើនឡើងខ្ពស់ ដែលធ្ចើឲ្យពួកគេមានសាច់ប្រាក់ ដើម្បីបំពេញតម្រូវការ ទី៤ ការផ្តល់ឥណទានពីសំណាក់ធនាគារនានាកាន់តែមានភាពងាយស្រូល និងការប្រាក់បាននិងកំពុងបន្តធ្លាក់ចុះ និងទី៥ កត្តាវប្បធ៌មប្រពៃណី គឺប្រជាជនវ័យក្មេងកម្ពុជា និយមរស់នៅឯករាជ្យ បែកពីឳពុកម្តាយ ទៅរកលំនៅដ្ឋានថ្មី ជាជាងការរស់នៅបែបប្រមូលផ្តុំក្នុងគ្រួសាររួម។នេះបើតាមការលើកឡើងរបស់លោកយិន លាងគង់។
លោកបន្តថា “ការរីកចម្រើននៃវិស័យលំនៅដ្ឋាននៅកម្ពុជា នៅតែមានកំនើនខ្ពស់បន្តទៀតសំរាប់រយៈពេល៥ទៅ១០ឆ្នាំខាងមុខ ដោយសារកត្តាសំខាន់ៗខាងលើនេះ” ។
យោងតាមឯកសារដែលមានចំណងជើងថា “ភ្នំពេញឆ្នាំ2030 ” បានឱ្យដឹងថា លំនៅឋានដែលបាននិង កំពុងសាងសង់នឹងកើនឡើង៣ដង ក្នុងរយៈពេល១៣ឆ្នាំខាងមុខ។ ក្រុមហ៊ុនវាយតម្លៃខាងលើបានអះអាងថា បច្ចុប្បន្នចំនួនលំនៅឋានសរុបមានចំនួន ១៥០,០០០ខ្នង ប៉ុន្តែនឹងកើនឡើងដល់ ៤៥០,០០០ខ្នងនៅឆ្នាំ២០៣០ ។
របាយការណ៍ដដែលបន្តថា នៅក្នុងចំណោមខណ្ឌទាំង១៤ នៅរាជធានីភ្នំពេញមានខណ្ឌចំនួន៧បាន និងកំពុងមានសកម្មភាពមមាញឹក ក្នុងការសាងសង់សំណង់លំនៅឋាន ដើម្បីផ្គត់ផ្គង់ទៅតាមតម្រូវការ ដែលនឹងធ្វើឱ្យកើនឡើងរហូតដល់ជិតកន្លះ លានខ្នងនៅឆ្នាំ២០៣០ ។
កំណើននេះ អាចបណ្តាលមកពីការអភិវឌ្ឍ គម្រោងរៀបចំហេដ្ឋារចនាសម្ព័ន្ធនានា ដែលកាន់តែបង្កភាពងាយស្រួលក្នុងការធ្វើដំណើរ ចេញចូលក្រុង ជាពិសេសការតភ្ជាប់បណ្តាញផ្លូវនានា រួមជាមួយលំហូរនៃចំនួន ប្រជាសាស្ត្រចូលកាន់តែច្រើន ។
លោកង៉ែត ជូអ្នកជំនាញសេដ្ឋកិច្ចបានមានប្រសាសន៍ឱ្យដឹងថា កំណើនលំនៅដ្ឋានកាន់តែច្រើនឡើងៗ នឹងបណ្តាលឱ្យតម្លៃអចលនទ្រព្យកាន់តែខ្ពស់ ក្នុងរយៈពេលប៉ុន្មានឆ្នាំចុងក្រោយនេះ។ តម្លៃដីធ្លីមានការកើនឡើងចន្លោះពី៧-១០ភាគរយ ក្នុងមួយឆ្នាំអាស្រ័យទៅតាមទីតាំងផ្សេងៗគ្នា។
លោកបន្តថា “ការផ្គត់ផ្គង់លំនៅឋានតម្លៃសមរម្យនាពេលបច្ចុប្បន្ន មិនឆ្លើយតបនឹងកម្រិតជីវភាពរបស់កម្មករទេ ព្រោះផ្ទះមួយខ្នងត្រូវចំណាយប្រាក់យ៉ាងតិច២៥,០០០ ដុល្លារ។ វិបត្តិនេះកើតឡើងរួចហើយនៅហុងកុង ដូច្នេះកម្ពុជាគួរតែរៀមខ្លួនជាមុន” ។
របាយការណ៍របស់ក្រសួងសេដ្ឋកិច្ច និងហិរញ្ញវត្ថុបានចេញផ្សាយកាលពីពេលថ្មីៗនេះថា គម្រោងសំណង់លំនៅឋាននៅតែបន្ត មានកំណើនល្អដែលនៅក្នុងរយៈពេល៨ខែ ឆ្នាំ២០២០នេះ មានចំនួន ២,៨១៩ គម្រោង ឬ ស្មើនឹង៨៤% នៃ គម្រោងសាងសង់សរុប ។ គម្រោងសំណង់លំនៅឋាននេះកើនឡើង ៦.៥% បើធៀបនឹងរយៈពេលដូចគ្នា កាលពីឆ្នាំមុន៕
