ដោយៈសាវុធ
ភ្នំពេញៈ សេវាទូទាត់រហ័សជាសេវាផ្ទេរប្រាក់ និងទូទាត់សងប្រាក់ជាប្រាក់រៀលឆ្លងគ្រឹះស្ថានដែលអាច អោយអតិថិជនទទួលបានមូលនិធិភ្លាម។
អតិថិជនអាចធ្វើប្រតិបត្តិការផ្ទេរប្រាក់ ជូនបងប្អូនឬមិត្តភក្តិ និងទូទាត់សងប្រាក់លើការទិញ ទំនិញ និងសេវាកម្មផ្សេងៗក្នុងព្រះរាជាណាចក្រកម្ពុជា។
ដើម្បីអាចប្រើប្រាស់សេវានេះបាន អតិថិជនគ្រាន់តែ ទៅគ្រឹះស្ថានធនាគារពាណិជ្ជ ឬមីក្រូហិរញ្ញវត្ថុទទួលប្រាក់បញ្ញើដែលជាសមាជិក ឬសាខាគ្រឹះស្ថានទាំងនោះ ដែលមានទីតាំងជិតលោកអ្នក នៅទូទាំងខេត្ត-ក្រុង ក្នុងព្រះរាជាណាចក្រកម្ពុជា ហើយផ្តល់ព័ត៌មានផ្សេងៗ ពាក់ព័ន្ធនឹងប្រតិបត្តិការរបស់ខ្លួនដល់មន្ត្រីផ្តល់សេវា និងធ្វើតាមការណែនាំរបស់មន្ត្រីទាំងនោះជាការស្រេច។
បច្ចុប្បន្ន អតិថិជនអាចប្រើប្រាស់សេវានេះ នៅតាមការិយាល័យ ឬសាខារបស់គ្រឹះស្ថានទាំង ១៣ ដែលជាសមាជិក រួមមាន ធនាគារ អេស៊ីលីដា កម្ពុជាសាធារណៈ កាណាឌីយ៉ា វឌ្ឍនអាស៊ី (អេប៊ីអេ) វិនិយោគនិងអភិវឌ្ឍកម្ពុជា (ប៊ីអាយឌីស៊ី) ហ្វីលីព ស្ថាបនា និងគ្រឹះស្ថានមីក្រូហិរញ្ញវត្ថុទទួលប្រាកបញ្ញើ អង្គរមីក្រូហិរញ្ញវត្ថុ (អេអឹមខេ) វីសិនហ្វាន់ ប្រាសាក់ អម្រឹត ក្រេឌីត និងហត្ថាកសិករ។
អតិថិជនអាចប្រើប្រាស់សេវានេះនៅតាម ការិយាល័យ ឬសាខារបស់គ្រប់គ្រឹះស្ថានធនាគារពាណិជ្ជ និងគ្រឹះស្ថានមីក្រូហិរញ្ញវត្ថុ ទទួលប្រាក់បញ្ញើដទៃទៀតដែលកំពុងដាក់ពាក្យចូលជាសមាជិកសេវាទូទាត់រហ័ស៕
