ដោយៈ គង់ ម៉ាលីនណា
ភ្នំពេញៈ ក្នុងរយៈពេល៤ខែ ឆ្នាំ២០២៤ កម្ពុជារកចំណូលបានជាង១២៥លានដុល្លារអាមេរិក ពីការលក់ផលិតផលកៅស៊ូ។
យោងតាមរបាយការណ៍ របស់អគ្គនាយកដ្ឋានកៅស៊ូ ដែលទើបទទួលបាននៅថ្ងៃទី១៤ ខែឧសភា ឆ្នាំ២០២៤បានបង្ហាញថា ចំណូលពីការនាំចេញជ័រកៅស៊ូ គិតត្រឹមខែមេសា ឆ្នាំ២០២៤ មានចំនួន១២៥,១៥៦,៨៣៦ដុល្លារ។ ចំណែកការនាំចេញឈើកៅស៊ូ មានចំនួន៦១៧,១១៤ដុល្លារ។
របាយការណ៍ដដែលបានបន្តថា គិតត្រឹមខែមេសា ឆ្នាំ២០២៤ ជ័រកៅស៊ូ មានតម្លៃ១,៥៣២ដុល្លារក្នុង១តោន កើនឡើងចំនួន២ដុល្លារ ក្នុង១តោន ស្មើនឹង១.១៣% ធៀបនឹងខែមុន និងបានកើនឡើងចំនួន៩៤ដុល្លារ ក្នុងមួយតោនស្មើនឹង៧% ធៀបនឹងរយៈពេលដូចគ្នា នៃឆ្នាំមុន។
ចំណែកតម្លៃ នៃការនាំចេញឈើកៅស៊ូ ជាមធ្យមក្នុងខែមេសា ឆ្នាំ២០២៤ មានតម្លៃ១២៦ដុល្លារ ក្នុងមួយម៉ែត្រគីប។
លោកឃុន កក្កដា អគ្គនាយកស្ដីទី នៃអគ្គនាយកដ្ឋានកៅស៊ូ បានឲ្យដឹងថា ស្ថានភាពកៅស៊ូកម្ពុជា បើនិយាយអំពីតម្លៃគឺល្អ ហើយការប្រមូលផល ចាប់ផ្ដើមពីខែឧសភា ឆ្នាំ២០២៤នេះ បានចាប់ផ្ដើមចូលជៀរជ័រកៅស៊ូឡើងវិញហើយ។
លោកបញ្ជាក់ថា “ស្ថានភាពមកដល់ពេលនេះ វាល្អជាងបណ្ដាលឆ្នាំកន្លងទៅ ព្រោះដោយសារ តម្លៃអាចទទួលយកបាន ទោះបីមិនទាន់ដល់កម្រិតមួយដូចពីមុន ប៉ុន្ដែតម្លៃចាប់ពី១,៧០០ដុល្លារ ដល់២,០០០ដុល្លារ ក្នុងមួយតោនឲ្យតែថេរគឺល្អ”៕