ដោយៈ គង់ ម៉ាលីនណា
ភ្នំពេញៈ គណនីជួញដូរជាមួយផ្សារមូលបត្រកម្ពុជា (CSX) បានកើនឡើងដល់៥១,០៤៤ នៅដំណាច់ត្រីមាសទី១ឆ្នាំនេះ កើនឡើង៣១,៦៧ ភាគរយ។
យោងតាមទិន្នន័យដែលផ្តល់ដោយលោក ហុង សុខហួរ នាយកប្រតិបត្តិនៃផ្សារមូលបត្រកម្ពុជា កាលពីម្សិលមិញបានឱ្យដឹងថា ទំហំទឹកប្រាក់នៃការជួញដូរសរុប ក្នុងអំឡុងខែមករា ដល់ខែមីនា បានធ្លាក់ចុះជិត៣៨ភាគរយនៅឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន។
តម្លៃជួញដូរសរុបដែលបានកត់ត្រានៅ CSX ក្នុងអំឡុងពេលនេះ ក៏បានធ្លាក់ចុះប្រហែល៥៧,៩២ ភាគរយ។
ក្នុងខែមករាឆ្នាំនេះ CSX បានដាក់ចេញនូវយន្តការជួញដូរថ្មីមួយ ដែលអនុញ្ញាតឲ្យអ្នកវិនិយោគ និងពាណិជ្ជករផ្សារហ៊ុនអាចធ្វើការជួញដូរជាប្រាក់រៀល និងទូទាត់ជាប្រាក់ដុល្លារអាមេរិកបាន។
CSX ក៏បានបើកដំណើរការវេទិកា បើកគណនីជួញដូរអនឡាញ កាលពីខែវិច្ឆិកាឆ្នាំមុន ដែលអនុញ្ញាតឱ្យអ្នកវិនិយោគបើកគណនីរបស់ពួកគេបានភ្លាមៗ ក្នុងអំឡុងពេលម៉ោងធ្វើការ។
កាលពីឆ្នាំមុនបានបង្ហាញថា ជាឆ្នាំដ៏សំខាន់សម្រាប់ CSX ជាមួយនឹងកំណត់ត្រានៃការចុះបញ្ជី ដែលនាំឱ្យចំនួនក្រុមហ៊ុនចុះបញ្ជីសរុបដល់២២ រួមទាំងក្រុមហ៊ុនមូលបត្រចំនួន១១។ ក្នុងចំណោមការចុះបញ្ជីទាំងប្រាំកាលពីឆ្នាំមុន មានក្រុមហ៊ុនពីរត្រូវបានចុះបញ្ជីជាក្រុមហ៊ុនមូលធន និងបីជាក្រុមហ៊ុនសញ្ញាប័ណ្ណ។
ទន្ទឹមនឹងនេះ CSX ថ្មីៗ នេះបានក្លាយជាសមាជិកនៃសហព័ន្ធផ្សារហ៊ុនអាស៊ី-អូសេអានី (Asia-Oceania Stock Exchanges Federation -AOSEF) ដែលជាព្រឹត្តិការណ៍ដ៏សំខាន់មួយ ក្នុងការប្តេជ្ញាចិត្តរបស់ខ្លួន ដើម្បីពង្រឹងសុចរិតភាពទីផ្សារ និងពង្រីកវិសាលភាពរបស់ខ្លួន ក្នុងចំណោមសមាគមអ្នកវិនិយោគជាតិ និងអន្តរជាតិ។
AOSEF ដែលត្រូវបានបង្កើតឡើង នៅលើគោលការណ៍នៃកិច្ចសហការ និងកិច្ចសហប្រតិបត្តិការ ផ្តល់នូវវេទិកាមួយសម្រាប់ទីផ្សារភាគហ៊ុនក្នុងតំបន់ ដើម្បីផ្លាស់ប្តូរឧត្តម្មានុវត្តន៍ ផ្តល់ឱកាសក្នុងការកសាងសមត្ថភាព និងចូលរួមក្នុងកិច្ចសន្ទនាស្តីពី និន្នាការទីផ្សារដែលកំពុងរីកចម្រើន។
ការរួមបញ្ចូលរបស់ CSX នៅក្នុងសហព័ន្ធ ធ្វើឱ្យមូលបត្រអាចបង្កើនបាននូវធនធាន និងជំនាញសំខាន់ៗ ដោយពង្រឹងស្ថានភាពរបស់ខ្លួន ជាមជ្ឈមណ្ឌលហិរញ្ញវត្ថុឈានមុខគេ នៅក្នុងតំបន់អាស៊ី-អូសេអានី។
សមាជិកភាពរបស់ CSX នៅក្នុង AOSEF គូសបញ្ជាក់ពីការយកចិត្តទុកដាក់របស់ខ្លួន ក្នុងការរក្សាស្តង់ដារខ្ពស់បំផុត នៃតម្លាភាព អភិបាលកិច្ច និងការការពារវិនិយោគិន។
លោក សុខ ហួរ បានថ្លែងថា តាមរយៈការអនុលោមតាមគោលដៅរបស់ AOSEF ផ្សារមូលបត្រកម្ពុជា មានគោលបំណងជំរុញទំនុកចិត្តវិនិយោគិន ទាក់ទាញអ្នកវិនិយោគសកលចម្រុះ និងជំរុញកំណើនទីផ្សារប្រកបដោយនិរន្តរភាព។
បន្ថែមពីលើការលើកកម្ពស់សុចរិតភាពទីផ្សារ ទំនាក់ទំនងរបស់ CSX ជាមួយ AOSEF បើកឱកាសដល់អាជីវកម្មអន្តរជាតិជាច្រើន។ តាមរយៈការចូល ទៅក្នុងបណ្តាញទីផ្សារមូលបត្រ និងភាគីពាក់ព័ន្ធនានារបស់ AOSEF ផ្សារមូលបត្រកម្ពុជា នឹងធ្វើការសម្របសម្រួលលំហូរវិនិយោគឆ្លងព្រំដែន ជំរុញការអភិវឌ្ឍន៍សេដ្ឋកិច្ច និងជំរុញនវានុវត្តន៍ នៅក្នុងទិដ្ឋភាពហិរញ្ញវត្ថុរបស់កម្ពុជា។
យោងតាមសេចក្តីប្រកាសបានឱ្យដឹងថា ក្នុងនាមជាសមាជិកនៃ AOSEF ផ្សារមូលបត្រកម្ពុជា បានត្រៀមខ្លួនជាស្រេច ដើម្បីដើរតួនាទីសំខាន់ ក្នុងការជំរុញសមាហរណកម្មសេដ្ឋកិច្ច ក្នុងតំបន់ និងជំរុញការអភិវឌ្ឍន៍ប្រកបដោយចីរភាព។ ផ្សារមូលបត្រ ស្វាគមន៍ក្នុងការធ្វើកិច្ចសហប្រតិបត្តិការ ជាដៃគូសហការនៅទូទាំងតំបន់អាស៊ី-អូសេអានី ដើម្បីបើកឱកាសថ្មីៗ និងជំរុញវិបុលភាពរួម។
ផ្សារមូលបត្រកម្ពុជា (CSX) ត្រូវបានបង្កើតឡើងក្នុងឆ្នាំ២០១១ គឺជាទីផ្សារភាគហ៊ុន តែមួយគត់របស់ប្រទេសកម្ពុជា ដែលផ្តល់នូវវេទិកា សម្រាប់ធ្វើការជួញដូរមូលបត្រ និងជំរុញការអភិវឌ្ឍន៍ទីផ្សារមូលធន៕
