ដោយ: គង់ លាងហួរ
អន្តរជាតិ: ក្រុមប្រទេសសេដ្ឋកិច្ចជឿនលឿនG7 បានប្តេជ្ញាបញ្ឈប់ការប្រើប្រាស់ធ្យូងថ្ម នៅត្រឹមឆ្នាំ២០៣៤ ដែលជាផ្នែកមួយនៃកិច្ចខិតខំប្រឹងប្រែងកាន់តែខ្លាំង ដើម្បីកាត់បន្ថយ និងលុបបំបាត់ការប្រើប្រាស់ឥន្ធនៈហ្វូស៊ីល។
បណ្តារដ្ឋមន្ត្រីទទួលបន្ទុកអាកាសធាតុ ថាមពល និងបរិស្ថានរបស់ក្រុមប្រទេស G7 បានអញ្ជើញមកជួបប្រជុំគ្នា នៅទីក្រុង Turin ភាគខាងជើង នៃប្រទេសអ៊ីតាលី ដែលកំពុងដឹកនាំធ្វើជាម្ចាស់ផ្ទះនៅឆ្នាំ២០២៤នេះ។
ក្រុមរដ្ឋមន្ត្រីបណ្តាប្រទេស G7 បានឯកភាពចំពោះគោលដៅជាច្រើនទាក់ទងនឹងថាមពល និងអាកាសធាតុ រួមទាំងការលើកទឹកចិត្តដល់ការអភិវឌ្ឍ ប្រភពថាមពលកកើតឡើងវិញ បង្កើនកិច្ចសហប្រតិបត្តិការលើថាមពលនុយក្លេអ៊ែរ ការកាត់បន្ថយការបំភាយឧស្ម័នមេតាន និងឧស្ម័នផ្ទះកញ្ចក់ផ្សេងទៀត និងងាកចេញឱ្យឆ្ងាយពីការនាំចូលឧស្ម័នធម្មជាតិរបស់រុស្ស៊ី។
កិច្ចប្រជុំកំពូលថ្នាក់រដ្ឋមន្ត្រីរយៈពេល២ថ្ងៃ កន្លងមកនេះ បានផ្តោតលើ វិធានការដើម្បីលុបបំបាត់ ការប្រើប្រាស់ធ្យូងថ្ម និងឥន្ធនៈហ្វូស៊ីលទាំងអស់ ជាដំណាក់កាលក្រោយៗទៀត។ វិធានការទាំងនេះ គឺជាផ្នែកមួយនៃការប្តេជ្ញាចិត្តរបស់ក្រុមប្រទេស G7 ក្នុងការកាត់បន្ថយការបំភាយឧស្ម័នផ្ទះកញ្ចក់ ដែលរួមចំណែកដល់ការប្រែប្រួលអាកាសធាតុ។
ទោះបីជាកិច្ចព្រមព្រៀងនេះបញ្ជាក់ថា ក្រុមប្រទេសG7 នឹងលុបបំបាត់ការប្រើប្រាស់ធ្យូងថ្ម នៅឆ្នាំ២០៣៥យ៉ាងណាក្តី ក៏ប៉ុន្តែកាលផុតកំណត់នេះ អាចនឹងត្រូវបានផ្លាស់ប្តូរ ប្រសិនបើប្រទេសទាំងនេះមិនអាចសម្រេចគោលដៅទាន់ការគ្រោងទុក។
ការពន្យារពេលនោះ មានគោលបំណងផ្តល់ភាពបត់បែន និងភាពអំណោយផលកាន់តែច្រើន ដល់បណ្តាប្រទេសសមាជិក G7 មួយចំនួន ដែលពឹងផ្អែកខ្លាំងលើថាមពលធ្យូងថ្ម ដូចជាប្រទេសអាល្លឺម៉ង់ និងប្រទេសជប៉ុនជាដើម៕ប្រភព: Xinhua៕
