ដោយ: គង់ លាងហួរ
អន្តរជាតិ: តម្លៃហាងឆេងមាសបានធ្លាក់ថ្លៃចុះ នៅព្រឹកថ្ងៃច័ន្ទនេះ ដោយសារអ្នកវិនិយោគមិនសូវត្រូវការទិញមាស ខណៈដែលហានិភ័យផ្នែកភូមិសាស្ត្រនយោបាយមួយចំនួននៅតំបន់មជ្ឈឹមបូព៌ាបានធូរស្រាល។
តួយ៉ាង តម្លៃមាស Spot Gold បានធ្លាក់ចុះ០,៣៥%ដល់២៣២៩,៤៧ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,៣៣ភាគរយដល់២៣៣៩,៤ដុល្លារ ក្នុងមួយអោន គិតត្រឹមម៉ោង៩:៥១នាទីព្រឹក។
សន្ទស្សន៍តម្លៃនៃការចំណាយលើការប្រើប្រាស់ផ្ទាល់ខ្លួន (PCE) របស់សហរដ្ឋអាមេរិកបានកើនឡើង០,៣% កាលពីខែមីនា ស្របតាមការព្យាករណ៍។ ការណ៍នេះបង្កើនការរំពឹងទុកថា ធនាគារ Federal Reserve នឹងមិនកាត់បន្ថយអត្រាការប្រាក់ក្នុងពេលឆាប់ៗនេះឡើយ។
ស្របពេលជាមួយគ្នានេះ វិនិយោគិនមើលឃើញឱកាសនៃការបញ្ចុះអត្រាការប្រាក់ដោយធនាគារកណ្តាលអាមេរិក(Fed) ប្រហែលមួយលើកប៉ុណ្ណោះនៅឆ្នាំនេះ គឺនៅក្នុងខែវិច្ឆិកាខាងមុខ។ នេះបើយោងតាមឧបករណ៍ CME FedWatch។
សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណដុល្លារអាមេរិក ធៀបទៅនឹងរូបិយប័ណ្ណគូប្រជែងចំនួន៦ ដូចជាប្រាក់យ៉េន និងប្រាក់អឺរ៉ូជាដើម បានងើបឡើងថ្លៃតិចតួចដល់ត្រឹម១០៥,៩៨ពិន្ទុ ក្នុងការជួញដូរនៅព្រឹកថ្ងៃច័ន្ទនេះ។
តម្លៃលោហៈធាតុប្រាក់ Spot silver បានងើបឡើង០,៣១ភាគរយដល់២៧,២៥ដុល្លារ ក្នុងមួយអោន ខណៈតម្លៃផ្លាទីន បានងើបឡើង០,៤៣ភាគរយដល់៩១៩,៥០ដុល្លារក្នុងមួយអោន ហើយតម្លៃ palladium បានធ្លាក់ចុះ០,៨១ភាគរយដល់៩៤៦,៥ដុល្លារក្នុងមួយអោន គិតត្រឹមម៉ោង៩:៥២នាទីព្រឹកថ្ងៃច័ន្ទនេះ៕