ដោយ: គង់ លាងហួរ
អន្តរជាតិ: តម្លៃហាងឆេងមាសបានធ្លាក់ថ្លៃចុះ នៅព្រឹកថ្ងៃច័ន្ទនេះ ដោយសារការងើបឡើងថ្លៃនៃប្រាក់ដុល្លារអាមេរិក និងការបន្ធូរបន្ថយភាពតានតឹងនៅតំបន់មជ្ឈឹមបូព៌ា បន្ទាប់ពីអុីរ៉ង់បានប្រកាសថា ខ្លួនពុំមានផែនការសងសឹកទៅលើអុីស្រាអែលឡើយ។
តួយ៉ាង តម្លៃមាស Spot Gold បានធ្លាក់ចុះ០,៥៣%ដល់២៣៧៧,៨៥ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ១,០១ភាគរយដល់២៣៨៩,៤ដុល្លារ ក្នុងមួយអោន គិតត្រឹមម៉ោង៩:៣៩នាទីព្រឹក។
លោក David Meger នាយកផ្នែកជួញដូរលោហធាតុនៅក្រុមហ៊ុន High Ridge Futures បានលើកឡើងថា “ប្រសិនបើស្ថានការណ៍ជម្លោះនៅតំបន់មជ្ឈឹមបូព៌ា កាន់តែធូរស្រាល នោះតម្លៃហាងឆេងមាសនឹងធ្លាក់ថ្លៃចុះមកវិញ ដោយសារសន្ទុះនៃការទិញមាសថយចុះ”។
ស្របពេលជាមួយគ្នានេះ ទីផ្សារមើលឃើញឱកាសប្រមាណ៦៧ភាគរយនៃការកាត់បន្ថយអត្រាការប្រាក់ ដោយធនាគារកណ្តាលអាមេរិក(Fed) នៅក្នុងកិច្ចប្រជុំគោលនយោបាយ នាខែកញ្ញាខាងមុខ។ នេះបើយោងតាមឧបករណ៍ CME FedWatch។
សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណដុល្លារអាមេរិក ធៀបទៅនឹងរូបិយប័ណ្ណគូប្រជែងចំនួន៦ ដូចជាប្រាក់យ៉េន និងប្រាក់អឺរ៉ូជាដើម បានស្ថិតនៅត្រឹមកម្រិតខ្ពស់បំផុត ក្នុងរង្វង់ជាង១០៦ពិន្ទុ នៅថ្ងៃច័ន្ទនេះ។
តម្លៃលោហៈធាតុប្រាក់ Spot silver បានធ្លាក់ចុះ១,២១ភាគរយដល់២៨,៣១ដុល្លារ ក្នុងមួយអោន ខណៈតម្លៃផ្លាទីន បានងើបឡើង០,៤១ភាគរយដល់៩៣៥,៤៣ដុល្លារក្នុងមួយអោន ហើយតម្លៃ palladium បានធ្លាក់ចុះ០,៥៦ភាគរយដល់១០២០,៧៥ដុល្លារក្នុងមួយអោន គិតត្រឹមម៉ោង៩:៥៦នាទីព្រឹកថ្ងៃច័ន្ទនេះ៕