ដោយៈ គង់ ម៉ាលីនណា
ភ្នំពេញៈ ទិន្នន័យពាណិជ្ជកម្មចុងក្រោយរបស់អគ្គនាយកដ្ឋានគយ និងរដ្ឋាករបានឱ្យដឹងថា កម្ពុជារកចំណូលបាន៣១៧លានដុល្លារ ពីការនាំចេញកៅស៊ូ ក្នុងត្រីមាសទីមួយនៃឆ្នាំនេះ កើនឡើង៨៨,៦ ភាគរយ ធៀបនឹងរយៈពេលដូចគ្នាកាលពីឆ្នាំមុន។
ទិន្នន័យបានបង្ហាញថា និន្នាការកើនឡើងក្នុងការនាំចេញកៅស៊ូរបស់កម្ពុជា ដែលបានចាប់ផ្តើម នៅពាក់កណ្តាលឆ្នាំ២០២២ បន្តដល់ឆ្នាំ២០២៤ផងដែរ។ ការនាំចេញបានកើនឡើង ទោះបីជាមានការធ្លាក់ចុះ នៃការផលិតកៅស៊ូធម្មជាតិជាសាកល រួមនឹងការឡើងថ្លៃក៏ដោយ។
កម្ពុជារកចំណូលបាន៩១៩លានដុល្លារ ពីការនាំចេញកៅស៊ូ និងផលិតផលពីកៅស៊ូនៅឆ្នាំ២០២៣ ដែលមានកំណើន៦៩,៦ ភាគរយ ធៀបនឹងឆ្នាំមុន។ ទីផ្សារកៅស៊ូកម្ពុជាភាគច្រើនរួមមាន ចិន វៀតណាម ម៉ាឡេស៊ី សិង្ហបុរី ឥណ្ឌា និងសហភាពអឺរ៉ុប។
យោងតាមសមាគមប្រទេសផលិតកៅស៊ូធម្មជាតិ (ANRPC) ដែលមានមូលដ្ឋាន នៅទីក្រុងកូឡាឡាំពួរបានឱ្យដឹងថា ការផ្លាស់ប្តូរជាវិជ្ជមាននៃតម្លៃកៅស៊ូធម្មជាតិ ភាគច្រើនអាចបណ្តាលមកពីការផ្គត់ផ្គង់ទំនិញតឹងតែង ដែលមិននឹកស្មានដល់ ជាពិសេសប្រទេសផលិតកៅស៊ូធម្មជាតិជាច្រើន ឈានចូលដល់រដូវស្លឹកឈើជ្រុះ។
យោងតាមអ្នកជំនាញបានឱ្យដឹងថា ទីផ្សារកៅស៊ូធម្មជាតិនៅតែបន្តប្រឈមមុខនឹងបញ្ហាធំៗ ជាពិសេសដោយសារតែកំណើនសេដ្ឋកិច្ចចិនតិចជាងការរំពឹងទុក នៅក្នុងឆមាសទីពីរនៃឆ្នាំមុន។ ប្រទេសចិន គឺជាប្រទេសផលិតសំបកកង់ធំបំផុតនៅលើពិភពលោក។
បន្ថែមលើនេះ គឺជាផលប៉ះពាល់នៃសង្គ្រាមរុស្ស៊ី-អ៊ុយក្រែន និងអ៊ីស្រាអែល-ហាម៉ាស ដែលអូសបន្លាយពេលយូរ និងការចំណាយលើកម្ចីដែលមានអត្រាការប្រាក់ខ្ពស់។
យោងតាមក្រសួងកសិកម្ម រុក្ខាប្រមាញ់ និងនេសាទ គិតត្រឹមឆ្នាំ២០២១ កម្ពុជាមានចម្ការកៅស៊ូជាង៤០ម៉ឺនហិកតា។ កម្ពុជាក៏មានរោងចក្រកែច្នៃកៅស៊ូ និងមជ្ឈមណ្ឌលសិប្បកម្មចំនួន១៦៨ ក្នុងខេត្តចំនួន១១៕
