តម្លៃហាងឆេងមាសបានងើបឡើងថ្លៃនៅថ្ងៃសុក្រនេះ

ដោយ: គង់ លាងហួរ
អន្តរជាតិ: តម្លៃហាងឆេងមាសបាន ងើបឡើងថ្លៃ នៅព្រឹកថ្ងៃសុក្រនេះដោយសារភាពតានតឹងនៅតំបន់មជ្ឈិមបូព៌ាបានជំរុញឱ្យតម្រូវការមាសកើនឡើង បើទោះបីជាទិន្នន័យសេដ្ឋកិច្ចដ៏រឹងមាំរបស់សហរដ្ឋអាមេរិក បានបន្ទាបការរំពឹងទុកនៃការកាត់បន្ថយអត្រាការប្រាក់យ៉ាងណាក្តី។

តួយ៉ាង តម្លៃមាស Spot Gold បានងើបឡើង២,១៥%ដល់២៤១១,៤៩ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង១,១៦ភាគរយដល់២៤២៥,៩ដុល្លារ ក្នុងមួយអោន គិតត្រឹមម៉ោង៩:៤៣នាទីព្រឹក។

លោក Everett Millman ប្រធានអ្នកវិភាគទីផ្សារនៅក្រុមហ៊ុន Gainesville Coins បានលើកឡើងថា“នៅពេលដែលមានភាពតានតឹងផ្នែកភូមិសាស្ត្រនយោបាយ អ្នកវិនិយោគនឹងសម្រុកទិញមាស។  ប្រសិនបើជម្លោះកាន់តែឡើងកំដៅ តម្លៃមាសអាចហក់ឡើងដល់ខ្ទង់២.៥០០ទៅ២.៦០០ដុល្លារ ក្នុងមួយអោន។ ប៉ុន្តែ ប្រសិនបើមានបទឈប់បាញ់ នោះតម្លៃមាសអាចធ្លាក់ចុះមកនៅត្រឹមកម្រិត២.២០០ដុល្លារក្នុងមួយអោន”។

ស្របពេលជាមួយគ្នានេះ ទីផ្សារមើលឃើញឱកាសនៃការកាត់បន្ថយអត្រាការប្រាក់ ដោយធនាគារកណ្តាលអាមេរិក(Fed) នៅក្នុងកិច្ចប្រជុំគោលនយោបាយ នាខែកញ្ញាខាងមុខ។ នេះបើយោងតាមឧបករណ៍ CME FedWatch។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណដុល្លារអាមេរិក ធៀបទៅនឹងរូបិយប័ណ្ណគូប្រជែងចំនួន៦ ដូចជាប្រាក់យ៉េន និងប្រាក់អឺរ៉ូជាដើម បានងើបឡើងថ្លៃដល់ត្រឹម១០៦,២៨ពិន្ទុ នៅថ្ងៃសុក្រនេះ។

តម្លៃលោហៈធាតុប្រាក់ Spot silver បានងើបឡើង១,៦៥ភាគរយដល់២៨,៦៩ដុល្លារ ក្នុងមួយអោន ខណៈតម្លៃផ្លាទីន បានងើបឡើង១,១៧ភាគរយដល់៩៤៥,៨៥ដុល្លារក្នុងមួយអោន ហើយតម្លៃ palladium បានងើបឡើង០,៣៦ភាគរយដល់១០២៦,៥ដុល្លារក្នុងមួយអោន គិតត្រឹមម៉ោង៩:៤៧នាទីព្រឹកថ្ងៃសុក្រនេះ៕