ដោយៈ ហ្វីអូណា
ភ្នំពេញៈ គណៈកម្មាធិការជាតិជំរុញចលនាភូមិ១ ផលិតផល១ ក្នុងឆ្នាំ ២០២៤ នេះ នឹងទទួលបានការចុះបញ្ជីចូលជាសមាជិកថ្មីចំនួន៣០០បន្ថែមទៀត ដែលនឹងធ្វើឲ្យស្ថាប័ននេះ មានសមាជិកកាន់តែច្រើន នឹងមានផលិផលកាន់ច្រើនសម្រាប់លក់លើទីផ្សារ។ លោកបណ្ឌិត សួង ណយ អនុប្រធានគណៈកម្មាធិការជាតិជំរុញចលនាភូមិ១ផលិតផល១ លើកឡើងក្នុងកិច្ចសម្ភាសន៍ ជាមួយភ្នាក់ងារអ្នកយកព័ត៌មានស្តីពី ការចុះបញ្ជីផលិតផលចូលជាសមាជិក នៃគណៈកម្មាធិការជាតិ ជំរុញចលនាភូមិ១ផលិតផល១នេះថា ជុំវិញសហគ្រាស និងសិប្បកម្មវេចខ្ចប់ក្នុងស្រុក គណៈកម្មាធិការជាតិបានខិតខំប្រឹងប្រែង និងជួយជ្រោមជ្រែងលើកកម្ពស់ ដល់សហគ្រាសក្នុងស្រុក ឲ្យបន្តក្នុងខ្សែច្រវាក់ផលិតកម្ម ដើម្បីផ្គត់ផ្គង់ទំនិញចូលទីផ្សារឲ្យបានកាន់តែច្រើន មានមុខរបរ និងជីវភាព រស់កាន់តែសមរម្យ។
លោកបន្តថា ជាក់ស្តែងសមាជិក នៅក្នុងគណៈកម្មាធិការជាតិជំរុញចលនាភូមិ១ផលិតផល១ មកដល់បច្ចុប្បន្ន មានការរីកចម្រើនគួរកត់សម្គាល់ ក្នុងនោះផលិតកម្មជាច្រើន បានអនុវត្តស្របតាមស្តង់ដារត្រឹមត្រូវ ដោយបានគិតដល់បញ្ហាសុវត្ថិភាព គុណភាព និងអនាម័យ ហើយនៅក្នុងឆ្នាំ២០២៤នេះ គណៈកម្មាធិការជាតិជំរុញចលនាភូមិ១ផលិតផល១ រំពឹងថា នឹងទទួលបាន សមាជិកបន្ថែមទៀត ដែលនឹងធ្វើឲ្យផលិតផល នៅក្នុងចលនាភូមិ១ផលិតផល១ មានកាន់តែច្រើន ដើម្បីរួមគ្នាផលិតរុញចូលទីផ្សារ ឲ្យបានកាន់តែច្រើន។
គិតមកដល់បច្ចុប្បន្ន គណៈកម្មាធិការជាតិជំរុញចលនាភូមិ១ផលិតផល១ មានសមាជិកសរុបប្រមាណ៦០០ ក្រុមហ៊ុន/សហគ្រាស ហើយសមាជិកនីមួយៗ មានផលិតផលសម្រាប់ចែកចាយនៅតាមទីផ្សារ ចាប់ពី១ផលិតផលឡើងទៅ ក្នុងនោះបើគិតជាផលិតផលសរុបមានប្រមាណ១ពាន់មុខរយ។
ក្នុងឆ្នាំ២០២៤នេះ គណៈកម្មាធិការជាតិ ជំរុញចលនាភូមិ១ផលិតផល១បានរំពឹងថា នឹងទទួលបានការចុះបញ្ជីជាសមាជិកចំនួន ៣០០ក្រុមហ៊ុន/សហគ្រាស ដែលនឹងដែលអាច ធ្វើឲ្យមានផលិតផលកាន់តែច្រើន សម្រាប់លក់នៅលើទីផ្សារ និងការនាំចេញផងដែរ៕
