ដោយៈ គង់ ម៉ាលីនណា
ភ្នំពេញៈ អត្រាឥណទានមិនដំណើរការ បានកើនឡើងដល់ ៥.៤% នៅត្រឹមឆ្នាំ២០២៣ ប៉ុន្តែប្រធានសមាគមធនាគារកម្ពុជាបានអះអាងថា ស្ថានភាពនេះមិនទាន់ដល់កម្រិតប្រកាសអាសន្នទេ គឺស្ថិតក្នុងកម្រិតគ្រប់គ្រងបាន។
ប្រធានសមាគមធនាគារនៅកម្ពុជា លោក រ័ត្ន សោភ័ណបាន បញ្ជាក់កាលពីពេលថ្មីៗនេះថា ទោះបីអត្រាឥណទាន មិនដំណើរការបានកើនឡើងបន្តិចបើធៀបឆ្នាំ២០២២ ប៉ុន្តែមិនទាន់ដល់កម្រិតគោះជួង ប្រកាសអាសន្ននោះទេ។
ថ្លែងនៅក្នុងសន្និសីទក្នុងខួប៣០ឆ្នាំ នៃការបង្កើតសមាគមធនាគារនៅកម្ពុជា លោក រ័ត្ន សោភ័ណ បានបញ្ជាក់ថា “បើធៀបទំហំ និងផលប៉ះពាល់ដល់់សេដ្ឋកិច្ច បើទោះបីអត្រាឥណទានមិនដំណើរការមានការកើនឡើង ប៉ុន្តែនៅកម្រិតមួយអាចគ្រប់គ្រងបាន”។
លោកឡើងថា ក្នុងស្ថានភាពវិបត្តិ វិស័យដែលប៉ះពាល់ជាងគេគឺវិស័យអចលនទ្រព្យ និងទេសចរណ៍។ ជាមួយគ្នានេះវិស័យលក់រាយក៏រងសម្ពាធពីវិបត្តិនេះដែរ។
លោក រ័ត្ន សោភ័ណ ក្នុងពេលប្រឈមវិបត្តិជំងឺកូវីដ ខាងវិស័យធនាគារមិនត្រឹមតែទប់ទល់ ប៉ុន្តែក៏ចូលរួមចំណែកជួយដល់អតិថិជនដូចជាការសម្រួលការបង់ប្រាក់ ឬពន្យារពេលការបង់សងជាដើម។ ជាមួយគ្នានេះ ក៏មានការរៀបចំឥណទានឡើងវិញផងដែរ។
ជាមួយគ្នានេះ ក៏មានអន្តរាគមន៍ពីធនាគារ SME និងសាជីវកម្មធានាឥណទាន ដែលស្ថាប័នទាំងពីរនេះ បានធ្វើការជាមួយធនាគារពាណិកម្ម ដើម្បីផ្តល់ឥណទានដល់អាជីវកម្ម ដើម្បីកាត់បន្ថយផលប៉ះពាល់ក៏ដូចជាជំរុញកំណើនសេដ្ឋកិច្ចកម្ពុជា។
លោក រ័ត្ន សោភ័ណ បានបន្តថា វិបត្តិកូវីដបានថមថយ និងកន្លងផុត ប៉ុន្តែផលប៉ះពាល់មិនទាន់បបញ្ចប់នៅឡើយទេ។ លើសពីនេះ ការកើតមានសង្រ្គាមរវាងរុស្សី និងអ៊ុយក្រែន និងភាពតានតឹងភូមិសាស្រ្តនយោបាយ ក៏បានបង្កើនបន្ទុកលើវិបត្តិបន្ថែមទៀត។
ឆ្លងកាត់វិបត្តិជាបន្តបន្ទាប់ វិស័យធនាគារនៅកម្ពុជានៅបន្តភាពរឹងមាំ ដោយរក្សានូវសិ្ថរភាពនៃប្រព័ន្ធធនាគារ រួមជាមួយនឹងកំណើនដែលសម្រេចបានគួរជាទីមោទនៈ។
សមាគមធនាគារនៅកម្ពុជាបាបឲ្យដឹងថា គិតត្រឹមឆ្នាំ២០២៣ ទ្រព្យសកម្ម ក្នុងប្រព័ន្ធធនាគារមានទំហំ៨៤,៣ ប៊ីលានដុល្លារអាមេរិក ឬជាង២៦៥ % នៃផលិតផលក្នុងស្រុកសរុប (GDP) ខណៈឥណទានអតិថិជនកើនដល់៥៧,៦ប៊ីលានដុល្លារអាមេរិក ឬជាង១៨០% នៃផលិតផលិតផលក្នុងស្រុកសរុប។ រីឯប្រាក់បញ្ញើបានកើនឡើងដល់៤៧,៩ប៊ីលានដុល្លារអាមេរិកផងដែរ៕