ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃ នៅព្រឹកថ្ងៃព្រហស្បតិ៍នេះ បើទោះបីជាទិន្នន័យបង្ហាញថា អត្រាអតិផរណាប្រចាំខែមីនា នៅសហរដ្ឋអាមេរិក បានកើនឡើងក្នុងកម្រិតខ្ពស់ជាងការរំពឹងទុកយ៉ាងណាក្តី។
តួយ៉ាង តម្លៃមាស Spot Gold បានងើបឡើង០,៣៣%ដល់២៣៤០,៤៩ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,៤៥ភាគរយដល់២.៣៥៩ដុល្លារ ក្នុងមួយអោន គិតត្រឹមម៉ោង៩:៣៦នាទីព្រឹក។
ក្រុមប្រឹក្សាមាសពិភពលោកបានសរសេរនៅក្នុងកំណត់ត្រាមួយថា “មូលដ្ឋានគ្រឹះ ដែលជំរុញឱ្យតម្លៃហាងឆេងមាសហក់ឡើងខ្ពស់ នាពេលបច្ចុប្បន្ន រួមមាន កត្តាហានិភ័យភូមិសាស្ត្រនយោបាយ ការទិញមាសដោយបណ្តាធនាគារកណ្តាល និងតម្រូវការគ្រឿងអលង្ការ”។
យោងតាមរបាយការណ៍របស់ក្រសួងការងារអាមេរិកបានបង្ហាញថា នៅក្នុងខែមីនា សន្ទស្សន៍តម្លៃទំនិញប្រើប្រាស់(CPI)បានកើនឡើង០,៤% លើមូលដ្ឋានប្រចាំខែ បើធៀបនឹងការព្យាករណ៍ត្រឹមតែ០,៣% ដែលការណ៍នេះបានដាក់សម្ពាធទៅលើទស្សនវិស័យអត្រាការប្រាក់របស់ធនាគារកណ្តាលអាមេរិក។
ស្របពេលជាមួយគ្នានេះ ទីផ្សារមើលឃើញឱកាសចំនួន១៨ភាគរយប៉ុណ្ណោះ នៃការកាត់បន្ថយអត្រាការប្រាក់ ដោយធនាគារកណ្តាលអាមេរិក(Fed) នៅក្នុងកិច្ចប្រជុំគោលនយោបាយ នាខែមិថុនាខាងមុខ។ នេះបើយោងតាមឧបករណ៍ CME FedWatch។
សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណដុល្លារអាមេរិក ធៀបទៅនឹងរូបិយប័ណ្ណគូប្រជែងចំនួន៦ ដូចជាប្រាក់យ៉េន និងប្រាក់អឺរ៉ូជាដើម បានងើបឡើងថ្លៃយ៉ាងគំហុកដល់១០៥,១៣ពិន្ទុ នៅថ្ងៃព្រហស្បតិ៍នេះ។
តម្លៃលោហៈធាតុប្រាក់ Spot silver បានធ្លាក់ចុះ០,០២ភាគរយដល់២៧,៩៧ដុល្លារ ក្នុងមួយអោន ខណៈតម្លៃផ្លាទីន បានងើបឡើង០,៧៤ភាគរយដល់៩៦៦,៨៥ដុល្លារក្នុងមួយអោន ហើយតម្លៃ palladium បានងើបឡើង០,១១ភាគរយដល់១.០៥២ដុល្លារក្នុងមួយអោន គិតត្រឹមម៉ោង៩:៤៦នាទីព្រឹកថ្ងៃព្រហស្បតិ៍នេះ៕
